Zechariah 13

Chuvash (CHB) (БИБЛИ) 2009

← Chapter 12 Jump to: Chapter 14 →

1Ҫавӑ кун Давид килӗпе Иерусалим ҫыннисемшӗн ҫылӑхсемпе тасамарсенчен ҫӑвӑнса тасалма ҫӑл уҫӑлӗ.

2Ҫавӑ кун ҫапла пулӗ, тет Саваоф Ҫӳлхуҫа: Эпӗ ҫак ҫӗр ҫинчен йӗрӗхсен ячӗсене пӗтерсе тӑкӑп, вӗсене вара текех асӑнмӗҫ, ҫавӑн пекех суя пророксемпе усал сывлӑша ҫӗр ҫинчен хӑваласа ярӑп.

3Ҫавӑн чухне, кам та пулин малашне пулассине калать пулсан, ӑна ҫуратнӑ ашшӗпе амӑшӗ: «эсӗ пурӑнма тивӗҫлӗ мар, эсӗ Ҫӳлхуҫа ячӗпе суя сӑмах калатӑн» тейӗҫ; вара ӑна, пулассине каланӑ чухне, хӑйне ҫуратнӑ ашшӗпе амӑшӗ вӗлерсе пӑрахӗ.

4Ҫавӑ кун ҫапла пулӗ: малашне пулассине каланӑ чухне ҫав суя пророксем кашнийӗ хӑйне мӗн курӑннинчен намӑсланса кайӗ те, хӑй малашнехине пӗлтерекенӗ иккенне кӑтартма шӑла пир тумтир тӑхӑнса улталаса ҫӳрекенскер, текех ун пек тӑхӑнмӗ те.

5Вара кашниех ҫапла калӗ: эпӗ пророк мар, эпӗ ҫӗр ӗҫлекен, эпӗ ачаранпах ҫӗр ӗҫлесе пурӑнатӑп, тейӗ.

6Ӑна: мӗншӗн-ха сан аллу ҫинче ҫӗвӗсем пур? тейӗҫ; вӑл ҫапла хуравласа калӗ: мӗншӗн тесен мана хама юратакансен килӗнче хӗненӗ, тейӗ.

7Эй хӗҫ! Манӑн кӗтӳҫӗм ҫине, Манӑн ҫывӑх ҫыннӑм ҫине ҫӗклен, тет Саваоф Ҫӳлхуҫа: кӗтӳҫне ҫапса ӳкер те — сурӑхӗсем сапаланса кайӗҫ! Эпӗ вара Хамӑн аллӑма кӗҫӗннисем енне тӑсӑп.

8Мӗнпур ҫӗр ҫинче вара ҫапла пулӗ, тет Ҫӳлхуҫа, ун ҫинче икӗ пайӗ тӗп пулӗ, вилсе пӗтӗ, виҫҫӗмӗшӗ чӗрӗ юлӗ.

9Ҫав виҫҫӗмӗш пайне вут-ҫулӑма илсе кӗрӗп те вӗсене кӗмӗле шӑратнӑ пек шӑратӑп, ылтӑна тасатнӑ пек тасатӑп: вӗсем Мана чӗнме тытӑнӗҫ, Эпӗ вӗсене илтӗп те калӑп: «ку Манӑн халӑх» тейӗп, вӗсем вара: «Ҫӳлхуҫа — манӑн Туррӑм!» тейӗҫ.

← Chapter 12 Jump to: Chapter 14 →