1 Samuel 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Dauda ni daa kul yɛli Sool lala naai, ka Jɔnatan suhu dii gbaai Dauda, ka o daa yur’ o kaman o ni yur’ omaŋ’ shɛm.

2Ka Sool daa zaŋ Dauda ti niŋ o yiŋ’ dindali maa, ka bi saɣi ni o lan kul’ o ba yiŋa.

3Di saha ka Jɔnatan daa lo Dauda alikauli, dama o daa yur’ o mi kaman o ni yur’ omaŋ’ shɛm la.

4Ka Jɔnatan daa yeeg’ omaŋmaŋ’ kparibu shɛli o ni ye n-ti Dauda, ka zaŋ o gbaɣino ti o, hal ka zaŋ o takɔbi min’ o tɔbu ni o gban’ shɛli o ni mali lɔr’ o shee ni ti o pahi.

5Ka Sool daa yi kul tim Dauda luɣ’ shɛlikam zaa, o ti nyarila nasara, lala zuɣu ka Sool daa zaŋ Dauda leei tɔbbihi zuɣulana, ka lala daa tiɣi niriba zaa nini, ka lan tiɣi Sool tumtumdiba zaa nini.

6Dauda ni daa ku Filistia doo maa ka labina ka bɛ kuni yiŋa, ka paɣiba daa yi Izraɛl tinsi zaa ni na n-yiini suhupiɛlli yila, ka ŋmɛri biŋkumda ka chaɣisiri chaɣisanim’ wari waa kanna ni bɛ ti tuhi Naa Sool soli.

7Ka paɣiba maa suhuri daa paligi ka bɛ yiini yila yɛri taba, “Sool kula tuhilituhili, ka Dauda mi ku tuhi’ piapia.”

8Ka Sool suhu daa yiɣisi pam, dama yɛtɔɣa maa daa bi niŋ o nyaɣisim ka o yɛli, “Bɛ zaŋ tuhi’ piapia ti Dauda, ka zaŋla tuhilituhili ti m mi, ka bɔ n-lee lan kpalim ka pa ni n nam ŋɔ ka o yɛn deei?”

9Dindali maa zaŋ chana, ka Sool daa piligi m-bɔri Dauda soya.

10N-daa yi biɛɣu ka Naawuni chɛ ka alizin’ biɛɣu siɣi Naa sol zuɣu na, ka o be o yiŋ’ tahira, ka Dauda daa yaa ŋmɛri mɔɣilo niŋd’ o kaman o ni daa yi pun niŋdi shɛm dabisili kam la, ka Sool daa gbib’ o kpani o nuu ni;

11ka tɛh’ o suhu ni ni o dii zaŋ kpani maa to Dauda tabili dukpini, amaa ka Dauda daa fɔhi li buyi zaa.

12Ka dabiɛm daa gbaai Sool zaŋ chaŋ Dauda polo, dama Yawɛ daa chɛ ŋun’ Sool, ka bela Dauda sani.

13Lala zuɣu ka Sool daa yihi Dauda o sani n-zaŋ o leei tɔbbihi tuhili zuɣulana, ka o daa zaŋdi ba chani tɔbu ka labirina.

14Ka Dauda daa yi kul chaŋ luɣ’ shɛlikam o dirila nasara; dama Yawɛ daa be o sani.

15Ka Sool daa nya Dauda ni diri nasara shɛm maa ka dabiɛm maan gbaag’ o pam pahi.

16Amaa ka Izraɛlnim’ mini Judanim’ zaa daa yuri Dauda, dama ŋuna n-daa yi zaŋdi ba chani tɔb’ ni ka zaŋdi ba labirina.

17Ka Sool daa ti yɛli Dauda. “Nyama, m bipuɣin’ kpɛm’ Mɛrab m-bɔŋɔ, a yi ni mali suhukpeeni m-be n sani tuhiri Yawɛ tɔbu ŋɔ, n ni zaŋ o ti a ka a niŋ a paɣa.” Dama Naa Sool daa tɛhimi ni di bi simdi ni omaŋmaŋ’ ku Dauda, amaa ni o lee ni chɛ ka Filistianim’ ku o.

18Ka Dauda daa yɛli Sool, “M mi lee nyɛ ŋuni, ka n daŋ niriba lee nyɛ banima bee m ba zuliya mi lee nyɛ banim’ Izraɛl tiŋgbɔŋ ni ka n ti yɛn leei naa deemba?”

19Amaa saha shɛli bɛ ni daa ti yɛn zaŋ Mɛrab ti Dauda, bɛ daa ŋmalig’ o mi ti do’ so ŋun yuli booni Adiriɛl ka o nyɛ Mɛholat nir’ la, ka o niŋ’ o paɣa.

20Di saha ka Sool bipuɣiŋga ŋun pah’ ayi ka o yuli daa booni Mikal la suhu daa yu Dauda pam, ka bɛ daa yɛli Sool di yɛla, ka di daa niŋ o nyaɣisim pam.

21Ka Sool daa tɛh’ o suhu ni, “N ni zaŋ o ti Dauda ka o leei tɔŋ gbaag’ o, ka Filistianim’ ku o.” Dinzuɣu ka Sool daa lan yɛli Dauda pahi buyi, “Pumpɔŋɔ a yi pa ni leei n deemba.”

22Ka Sool daa yɛl’ o tumtumdiba, “Chamiya ti nya Dauda ashilɔni yɛl’ o, ‘Nyama, naa suhu yur’ a pam, ka o tumtumdib’ zaa nini tiɣ’ a, dinzuɣu pumpɔŋɔ leemi naa deemba!’ ”

23Ka Sool tumtumdiba maa daa yɛli Dauda yɛtɔɣa maa. Ka Dauda bɔhi ba, “Yi tɛhiya ni di nyɛla asama ni n leei naa deemba? Dama yi nya ka n nyɛla faralana, ka pa yulilana.”

24Ka tumtumdiba maa daa chaŋ ti yɛli Sool Dauda ni yɛli shɛm.

25Di saha ka Sool daa yɛli ba, “Yɛlimiya Dauda, ‘Naa bi bɔri paɣibɔr’ liɣiri a sani n-naɣi pahila Filistianim’ yokol’ gbana kɔbiga din ni chɛ ka ŋun’ naa bɔh’ o dimnim’ maa biɛri.’ ” Sool daa tɛhiya ni lala ni chɛ ka Filistianim’ maa ku Dauda.

26Bɛ ni daa yɛli Dauda yɛtɔɣa maa, ka di niŋ o nyaɣisim pam o ni yɛn leei naa deemba maa zuɣu. Ka bɛ ni zali saha shɛli maa daa ti yɛn paai,

27ka Dauda yiɣisi zaŋ o tɔbbihi pa omaŋ’ zuɣu chaŋ ti ku Filistianim’ kɔbisiyi, ka ŋmahi bɛ yokol’ gbana n-zaŋ di zaa ti ti naa din ni chɛ ka o leei naa deemba. Ka Sool daa zaŋ o bipuɣiŋga Mikal ti o ka o niŋ o paɣa.

28Amaa Sool ni daa nya ka Yawɛ be Dauda sani, ka o bipuɣiŋga Mikal gba yur’ o maa,

29ka dabiɛm lan gbaag’ o pahi zaŋ chaŋ Dauda polo. Dinzuɣu ka Dauda daa kul nyɛ Sool dima di saha maa zaŋ chana.

30Ka Filistia tɔbbihi daa kul lɔri tɔbu na ti tuhiri ba, amaa bɛ daa yi kul lo tɔb’ na, Dauda n-tuhiri diri nasara gariti Sool sapashinnim’ maa zaa, ka di zuɣu daa chɛ ka Dauda yuli du pam.

← Chapter 17 Jump to: Chapter 19 →