1 Samuel 21

Dagbani Bible (Naawuni Kundi Kasi)

← Chapter 20 Jump to: Chapter 22 →

1Di saha ka Dauda daa zo n-chaŋ Nɔb nti chaŋ Ahimɛlɛk ŋun daa nyɛ maligumaana la sani. Ka Ahimɛlɛk daa kana ti tuhi Dauda soli ka o niŋ’ sɔhira; ka o bɔhi Dauda, “Bɔ n-niŋ ka a kɔŋko ka kpe na, ka so bi dol’ a na?”

2Ka Dauda daa yɛli Ahimɛlɛk ŋun daa nyɛ maligumaana maa, “Naa n-tim ma ni n ti niŋ shɛli ka yɛli ma, ‘Di chɛ ka so baŋ timsim maa yɛla bee n ni tim a ni a ti niŋ shɛli maa.’ Amaa m mini nachimba bɛn chani maa, n wuhi ba bɛ ni yɛn paai ma luɣ’ shɛli;”

3ka bɔh’ o, “Ka bindir’ bɔ ka a lee mali? Tim’ ma bɔrɔbɔro kpila anu bee a ni kul mali bindir’ shɛli kpe.”

4Ka maligumaana maa daa garigi yɛli Dauda, “N ka bɔrɔbɔro ziŋ’ kpe, bɔrɔbɔro kasi n-naɣ’ beni; nachimba maa bɛn’ dee mini paɣiba yi bi dɔni, bɛ ni tooi ŋub’ li.”

5Ka Dauda daa yɛli maligumaana maa, “Yɛlimaŋli, hal’ ti yi kul yɛn chaŋ chandi shɛli din bi tibisi gba, ti mini paɣiba bi lan miriti taba din ni chɛ ka bɛ be kasi, bɛ di ti yɛri ti ni chani chandi gahindili shɛli zuŋɔ ŋɔ, dinzuɣu bɛ niŋgbuna zaa bela kasi.”

6Di saha ka maligumaana maa daa zaŋ bɔrɔbɔro kasi maa ti Dauda, dama bɔrɔbɔro shɛli daa ka nimaani n-naɣ’ pahila bɔrɔbɔro shɛli bɛ ni daa zaŋ zali Yawɛ tooni la. Ka bɛ daa kpuɣ’ li ni bɛ ti bo bɔrɔbɔro tula na ti zali di zaashee bɛ ni kpuɣ’ li dahin’ shɛli maa.

7Dindali maa Sool tumtumdib’ ni do’ so daa bela nimaani ni o mali maligu shɛli Yawɛ tooni, o daa nyɛla Ɛdom nira ka o yuli booni Doɛg, ŋuna n-daa nyɛ Sool piɛgul’ kpɛma.

8Ka Dauda daa bɔhi Ahimɛlɛk, “A ka takɔbi bee kpani kpe n-zaŋ ti ma? Dama naa tuma maa ni bɔri yomyom shɛm zuɣu chɛ ka m bi tooi zaŋ n takɔbi bee m bidibbin’ shɛli.”

9Ka maligumaana maa yɛl’ o, “A ni daa ku Filistia do’ so ŋun yuli booni Goliat Ɛla Vinvamli ni la takɔbi la n-naɣ’ beni. Nyama, ti zaŋla tani vil’ li, di be tan’ shɛli din ŋmani mukuru ŋɔ nyaaŋa; a yi ni zaŋ li, nyin’ zaŋm’ li. Dama shɛli lan kani m-pahi di zuɣu.” Ka Dauda daa yɛli, “Din viɛl’ gari li yi kani m-pahi di zuɣu, nyin’ zaŋm’ li ti ma.”

10Ka Dauda daa yiɣisi dindali maa n-zo Sool sani kuli Gaat Naa Akishi sani.

11Ka Naa Akishi kpambaliba daa bɔh’ o, “Pa Dauda ŋɔ n-nyɛ o ya naa la? Pa o yɛla ka bɛ daa wari waa ka yiini yila yɛra, ‘Naa Sool kula niriba tuhilituhili, ka Dauda mi ku tuhi’ piapia la?’ ”

12Ka yɛtɔɣa maa daa kpe Dauda suhu ni pam, ka dabiɛm gbaag’ o zaŋ chaŋ Gaat Naa Akishi maa polo.

13Dinzuɣu ka Dauda daa taɣ’ o biɛhigu bɛ sani n-niŋdi kaman o nyɛla yinyaa la, ka bo bini n-chihiri dunɔdali punu chiha, ka chɛ ka o nintɔri zɔri dolisir’ o teeŋkɔbiri.

14Di saha ka Naa Akishi daa bɔh’ o kpambaliba maa, “Nyamiya, yi nya ka doo ŋɔ nyɛla yinyaa, ka yi zaŋ o kani n sanna?

15N yɛli ya ni yinyahi m-pooi ma, ka yi ti zaŋ doo ŋɔ na ni o ti tumd’ o yinyahili tuma ŋɔ n tooni? Doo ŋɔ ni tooi be n yili ŋɔ?”

← Chapter 20 Jump to: Chapter 22 →