1 Samuel 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Sool ni daa kuli ti tuhi Filistianim’ maa ka labina ka bɛ yɛl’ o, “Nyama Dauda be Ɛngɛdi.”

2Di saha ka Sool daa bɔ Izraɛl tiŋgbɔŋ ni ninvuɣ’ tusaata bɛn nyɛ tɔbutuhiri’ biinsi n-chaŋ ni o ti bɔ Dauda min’ o niriba maa shee Yɔbuhi Tampima tooni polo.

3Ka o daa kana ti paai piɛri biɛhigu shee ka tampiŋ voli daa be nimaani so’ naŋgbanyee; ka Sool daa kpe di puuni ni o ti damdi yɔɣu ni ka Dauda min’ o niriba gba daa be voli maa puuni ha.

4Ka Dauda niriba maa daa yɛl’ o, “Zuŋɔ n-nyɛ dabisi’ shɛli Yawɛ ni daa yɛl’ a, ‘Nyama, n zaŋ a dim’ niŋ a nuu ni, niŋm’ o a ni bɔri shɛm la.’ ” Di saha ka Dauda daa puɣisi chaŋ ti sɔɣi ŋmaai Naa Sool kparibu naŋgbambili.

5Di nyaaŋa ka di daa muɣisi Dauda pam, o ni daa ŋmaai Sool binyɛrigu maa zuɣu.

6Ka o daa yɛl’ o niriba maa, “Yawɛ di saɣi ka n niŋ n dan’ ŋun nyɛ Yawɛ ni booi kpam bahi so zuɣu ŋɔ lala. O di saɣi ka n zaŋ n nuu shih’ o, dama o nyɛla Yawɛ ni booi kpam bihi so zuɣu ni.”

7Yɛtɔɣa ŋɔ ka Dauda daa zaŋ yɛl’ o niriba maa, ka daa bi saɣi ni bɛ chaŋ ti liri Sool Ka Sool daa ti yiɣisi voli maa ni yina chaŋ o chandi.

8Di nyaaŋa ka Dauda gba daa yiɣisi voli maa ni yina nti kuhi boli Naa Sool, “N dan’ naa!” Ka Sool daa ŋmaligi lih’ o nyaaŋa, ka Dauda damdi zaŋ o zuɣu silim tiŋa n-lu o sizuura,

9ka bɔh’ o, “Bɔ n-niŋ ka a wumdi ninvuɣ’ shɛb’ bɛn yɛr’ a, ‘Nyama, Dauda lo a zaɣ’ biɛɣu la yɛtɔɣa?’

10Nyama, a nya Yawɛ ni zaŋ a niŋ n nuu ni shɛm vol’ la ni zuŋɔ dabisili ŋɔ, ka n niriba shɛb’ di yɛli ni n kum’ a, amaa ka man’ lee tilig’ a. N di yɛlimi, ‘Man’ ku zaŋ n nuu shihi n dana, dama o nyɛla Yawɛ ni booi kpam bahi so zuɣu ni.’

11M ba, nyam’ a binyɛrigu naŋgbambili n nuu ni. Yɛlimaŋli, n ni ŋmaag’ a binyɛrigu naŋgbambili ka bi ku a ŋɔ, di simdi ni a baŋ ni taali bee zaɣ’ biɛ’ shɛli ka n sani ni nyini. M bi tum a taal’ shɛli, hal a ni kul kariti dol’ ma ni a ku ma maa zaa yoli.

12Yawɛ ni woligi ti m min’ a, Yawɛ ni bɔh’ a biɛri ti ma, amaa man’ ku zaŋ n nuu shih’ a.

13Kaman kurimbuni ha yɛtɔɣ’ ŋahili ni yɛli shɛm la, ‘Ninvuɣ’ biɛɣu kɔbili ni ka ninvuɣ’ biɛtali yirina.’ Amaa man’ ku zaŋ n nuu shih’ a.

14Ŋuni ka Izraɛl naa lee yina kariti doli ŋɔ? Ŋuni ka a lee kariti doli ni a ku ŋɔ? A kariti dolila ba’ kpiŋ! A kariti dolila buduli zaɣ’ bila.

15Dinzuɣu Yawɛ ni leei ti sariakarita, o ni woligi ti m min’ a. O ni lihi ti yɛtɔɣa ŋɔ zuɣu, ka zani n nyaaŋa n-fa ma a nuu ni bahi.”

16Dauda ni daa yɛli Sool lala naai, ka Sool bɔhi, “M bia Dauda, a kukoli m-bala?” Ka Sool daa duh’ o yee kum pam,

17ka yɛli Dauda, “A nyɛla wuntizɔra pam gari ma, dama a tum ma din viɛla, ka man’ zaŋla zaɣ’ biɛɣu yo a samli.

18Ka zuŋɔ dabisili ŋɔ, a kahigi wuhi ma a ni niŋ ma zaɣ’ viɛlli shɛm, ka bi ku ma saha shɛli Yawɛ ni di zaŋ ma niŋ a nuu ni la.

19Dama nir’ yi nya o dindana ŋ-ŋɔ, o ni chɛ o ni alaafee? Dinzuɣu a ni niŋ ma shɛm zuŋɔ ŋɔ, Yawɛ ni yo a sam’ viɛlli.

20Pumpɔŋɔ nyama, biɛhiŋ kani, m mi ni a ni leei naa, ka Izraɛl nam ti nya zaashee zani a kɔbili ni.

21Dinzuɣu pom’ Yawɛ ni a ti ku ku n zuliya n kalinsi nyaaŋa bee n-kpihim n daŋ birili.”

22Ka Dauda daa po lala pɔri maa Sool sani. Di saha ka Sool daa kuli, ka Dauda min’ o niriba maa mi labi bɛ sɔɣisili maa shee.

← Chapter 23 Jump to: Chapter 25 →