1 Samuel 19

Dagbani Bible (Naawuni Kundi Kasi)

← Chapter 18 Jump to: Chapter 20 →

1Ka Sool daa yɛl’ o bia Jɔnatan min’ o tumtumdiba zaa ni bɛ kum Dauda. Amaa o bia Jɔnatan daa yuri Dauda yɛla pam.

2Ka Jɔnatan daa yɛli Dauda, “M ba Sool bɔrimi ni o ku a, dinzuɣu biɛɣuni asiba sa miri ka a yi palo; sa sɔɣimi luɣ’ shɛli polo.

3N sa ni doli m ba kana nti zani baɣil’ o a ni sɔɣi luɣ’ shɛli maa ka yɛl’ o a yɛla, ka o yi sa yɛli shɛlikam, n ni yɛl’ a.”

4Ka Jɔnatan daa zaŋ Dauda din viɛl’ zaa yɛla yɛl’ o ba Sool, ka lan yɛl’ o, “Naa, di bi simdi ni a tum taali zaŋ chaŋ a dabili Dauda polo, dama o na ʒi n-tum’ a taali, ka o tuma zaa lan nyɛ din sɔŋd’ a.

5Dama o daa zaŋ o nyɛvili pa talima ku Filistia doo la, ka Yawɛ daa tum nasara dibu tuun’ kara ti Izraɛlnim’ zaa. A daa nya dimbɔŋɔ ka di’ niŋ a nyaɣisim, ka bɔ n-niŋ ka a bɔri ni a ku Dauda ka di ka daliri, ka di zuɣu chɛ ka a tum alahichi ŋun ka taali ʒim yihibu ni?”

6Ka Sool daa wum Jɔnatan ni yɛl’ o shɛm maa zaa, ka po pɔri yɛli, “Hal ka Yawɛ ŋun be ŋɔ zuɣu, n ku lan ku o.”

7Ka Jɔnatan daa boli Dauda na ti yɛl’ o dimbɔŋɔ zaa, ka zaŋ o tahi Sool sani, ka Dauda ti lan be o sani kaman o ni daa yi pun be o sani shɛm la.

8Dahin shɛli ka tɔbu daa ti lan lu bɛ mini Filistianim’ sunsuuni, ka Dauda daa chaŋ ti liri ba n-tuhi nyaŋ ba, ka bɛ ŋmaligi guui.

9Dahin shɛli ka Sool daa ʒi o yiŋa n-gbibi kpani o nuu ni, ka Yawɛ daa chɛ ka alizin’ biɛɣu yaa siɣ’ o zuɣu na, ka Dauda ŋmɛri mɔɣilo niŋd’ o.

10Ka Sool daa ti zaŋ kpani maa m-bɔr’ ni o to Dauda tabili dukpini, amaa ka Dauda daa fɔhi Sool, ka o zaŋ kpani maa to n-nyɔɣila dukpini. Ka Dauda daa guui n-zo n-tiligi yuŋ maa.

11Dindali maa ka Sool daa tim ninvuɣ’ shɛba ni bɛ chaŋ ti gu Dauda o yiŋa, o daa lomi ni o ku o asiba. Amaa ka Dauda paɣa Mikal daa yɛl’ o, “A yi bi tilig’ a nyɛvili yuŋ ŋɔ, biɛɣuni bɛ sa ni ku a.”

12Ka Mikal daa sɔŋ Dauda ka o doli takɔro ni yi n-zo n-tiligi.

13Ka Mikal daa zaŋ biŋŋmahindili na ti sɔŋ garo zuɣu n-zaŋ bukɔbiri difiɛli sɔŋ zaŋ di zuɣu kuɣ’ li, ka zaŋ chinchini pil’ li.

14Ka Sool daa tim tuumba ni bɛ ti zaŋ Dauda na, ka paɣ’ maa yɛli ba, “O biɛrimi.”

15Ka Sool daa tim tuumba ni bɛ chaŋ ti nya Dauda, ka lan yɛli ba “Ʒimiy’ o min’ o garo maa zaa na ka n ti ku o.”

16Ka tuumba maa daa kana ti kpe duu maa ni n-nya ka biŋŋmahindili maa do garo zuɣu, ka di zuɣu kuɣi bukɔbiri difiɛli.

17Ka Sool daa bɔhi Mikal, “Bɔ n-niŋ ka a yɔhim ma lala n-chɛ ka n dim’ maa zo n-tiligi?” Ka Mikal garigi yɛl’ o, “O yɛli ma mi, ‘Chɛ ka n chaŋ; a yi bi chɛ ka n chaŋ n ni ku a.’ ”

18Ka Dauda daa zo n-chaŋ Samuɛl sani Rama ti yɛl’ o Sool ni niŋ o shɛlikam maa zaa. Ka o mini Samuɛl daa chaŋ ti be Naiɔt.

19Ka bɛ daa yɛli Sool, “Nyama, Dauda be Naiɔt Rama tiŋgban’ ni.”

20Di saha ka Sool daa tim tuumba ni bɛ chaŋ ti gbaai Dauda na. Ka bɛ daa paai ti nya anab’ bɔbili, ka bɛ tɔɣisir’ anabitali yɛtɔɣa, ka Samuɛl nyɛ bɛ zuɣulana, ka Naawuni Shia daa siɣi Sool tuumba maa zuɣu na ka bɛ gba tɔɣis’ anabitali yɛtɔɣa.

21Ka bɛ daa yɛli Sool di yɛla ka o lan tim tuun’ shɛba, ka bɛ gba ti tɔɣisi anabitali yɛtɔɣa. Ka Sool daa lan tim tuun’ shɛb’ yaha m-pahi buta, ka bɛ gba daa tɔɣisi anabitali yɛtɔɣa.

22Di saha ka omaŋmaŋ’ daa yiɣisi chaŋ Rama nti chaŋ kɔbil’ titali din be Sɛku la gbini ti bɔhi, “Ya ka Samuɛl mini Dauda lee be la?” Ka so yɛl’ o, “Nyama bɛ be Naiɔt Rama tiŋgban’ ni.”

23Di saha ka Sool daa lu soli chani Naiɔt Rama tiŋgban’ ni, ka Naawuni Shia daa siɣ’ o zuɣu na, ka o gba dii gbaai anabitali yɛtɔɣa tɔɣisibu m-mali lala hal ti paai Naiɔt Rama tiŋgbani maa ni.

24Ka o gba daa fuɣ’ o situra zaa ka tɔɣisi anabitali yɛtɔɣa Samuɛl tooni, ka daa do o zaɣim dindali maa wuntaŋ’ ni mini yuŋ zaa. Dindali maa ka bɔhigu ŋɔ daa piligi, “Sool gba nyɛla anabi?”

← Chapter 18 Jump to: Chapter 20 →