1 Samuel 27

Dagbani Bible (Naawuni Kundi Kasi)

← Chapter 26 Jump to: Chapter 28 →

1Ka Dauda daa yɛl’ o suhu ni, “Pumpɔŋɔ Sool ni ti bahi ku ma dahin’ shɛli. N lan ka n ni yɛn niŋ shɛm pahila n zo n-kuli Filistianim’ tiŋgbɔŋ ni din ni chɛ ka Sool yihi n shee bɔbu tahima Izraɛl tiŋgbɔŋ ŋɔ ni, ka n yi o nuu ni”

2Di saha ka Dauda mini ninvuɣ’ kɔbisiyɔbu bɛn daa be o sani maa daa yiɣisi zo n-kuli Gaat Naa Akishi ŋun daa nyɛ Maok bia la sani.

3Ka Dauda min’ o niriba maa ni bɛ yinsinim’ zaŋ tabili ŋun’ Dauda paɣiba ayi la, Ahinɔam ŋun daa nyɛ Jɛziriil nir’ la mini Nabal pakoli Abigeel ŋun daa nyɛ Kamɛl nir’ la zaa daa be Gaat Akishi sani.

4Ka bɛ daa yɛli Sool ni Dauda zo n-kuli Gaat, ka o daa chɛ o shee bɔbu.

5Ka Dauda daa ti yɛli Akishi, “A suhu yi yu ma, nyin’ tim ma a tiŋgbɔŋ ŋɔ ni tinsi ŋɔ ni luɣ’ shɛli ka n ʒini, dama wula ka man’ ŋun nyɛ a dabili ŋɔ min’ a lee yɛn laɣim ʒi na’ tiŋ’ ŋɔ ni?”

6Ka Akishi daa zaŋ Zikilag ti o dindali maa, dinzuɣu ka Juda nanim’ na kul su Zikilag hal ni zuŋɔ.

7Ka Dauda daa be Filistianim’ maa sani yuuni ni chira anahi.

8Ka Dauda min’ o niriba maa daa yiri chani ti liriti Gɛshurinim’ mini Gɛrizinim’ ni Amalɛknima n-tuhiri ba ka fari bɛ nɛma; dama bɛna n-daa nyɛ tiŋ’ maa tiŋbihi kurimbuni ha. Dauda min’ o niriba maa daa yi chanimi hal ti paai Shur n-zaŋ hal ni Ijipti tiŋgbɔŋ ni.

9Ka Dauda daa ku tinsi maa niriba zaa, ka bi chɛ ka paɣa bee doo kpalim; ka daa gbahi bɛ piɛri mini niɣi, ni bunsi ni laakumnima, ka va bɛ situra pahi n-lab’ Akishi sanna.

10Ka Akishi daa yi bɔh’ o, “Banim’ ka a lee liri zuŋɔ?” Dauda yɛr’ o mi, “Nɛgɛb’ din be Juda tiŋgban’ ni la nim’ ka n liri.” Bee ŋun yɛli, “Nɛgɛb din be Jɛramiil polo la nim’ ka n liri bee Nɛgɛb din be Kɛn tiŋgban’ ni la nim’ ka n liri.”

11Dauda daa na ʒi n-chɛ doo bee paɣa, bɛ ti chaŋ Gaat ti yɛli ba zuɣu. O daa tɛhimi, “Di yi pa lala, bɛ ni chaŋ Gaat ti yɛli ti yɛla.” ka yɛli, “Dauda n-tum shɛm maa.” Lala ka Dauda min’ o niriba maa daa kul niŋdi saha shɛli zaa bɛ ni daa be Filistianim’ sani maa.

12Ka Akishi daa niŋ Dauda naani pam ka yɛli, “O chɛ ka o niriba Izraɛlnim’ bi lan bɔr’ o yɛlli zaa, dinzuɣu o kul ni nyɛ n tumtumda sahakam.”

← Chapter 26 Jump to: Chapter 28 →