Deuteronomy 17

Dagbani Bible (Naawuni Kundi Kasi)

← Chapter 16 Jump to: Chapter 18 →

1Miriya ka yi ti zaŋ nahu bee piɛɣu ŋun mali daŋ’ mini binshɛɣukam din bi niŋ kamaata mali sara ti ŋun’ Yawɛ ŋun nyɛ yi Naawuni ŋɔ, dama di nyɛla din chihiri ŋun’ Yawɛ ŋun nyɛ yi Naawuni ŋɔ sani.

2Yi yi ti nya ka doo bee paɣa ŋun be yi ni tum tuumbiɛɣu ŋun’ Yawɛ ŋun nyɛ yi Naawuni ŋɔ sani, ŋun’ Yawɛ ŋun nyɛ yi Naawuni ŋɔ ni zaŋ tin’ shɛŋa tin ya ŋɔ tin’ shɛl’ ni m-birig’ o daalikauli la,

3ka di nyɛla o chaŋmi ti jɛm wuna, di yi nyɛla wuntaŋa bee goli bee saŋmarisi din nyɛ din chihiri n san’ la,

4bɛ yi yɛli ya di yɛla bee yi yi wum di yɛla, ka yi vihi li viɛnyɛliŋga, ka di nyɛla yɛlimaŋli ni din chihiri maa shiri tumiya Izraɛl tiŋgbɔŋ ni,

5dindina yin’ zaŋmiya do’ so bee paɣ’ so ŋun tum tuumbiɛɣu maa ti zali tiŋ’ maa dunɔdali gbini n-labi doo maa bee paɣa maa kuɣa ku o.

6Niriba ayi bee niriba ata yi di shɛhira yin’ kumiy’ o. Miriya ka yi ku nira ninvuɣ’ yino kɔŋkɔ shɛhira dibu zuɣu.

7Di simdi ni shɛhiranim’ maa n-nyɛ ninvuɣ’ shɛb’ bɛn ni daŋ zaŋ bɛ nuhi niŋ bɛ ni yɛn ku ninvuɣ’ so maa kubu ni, di nyaaŋa ka sokam naanyi zaŋ bɛ nuhi kpɛhi di ni. Lala ka yi yɛn niŋ yihi zaɣ’ biɛɣu maa yi sunsuuni.

8Ninvuɣ’ kubo yɛtɔɣ’ shɛli yi ti beni, ka di ŋmaabu to yi sani bee zaŋ chaŋ nir’ ni su binshɛli polo bee yɛtɔɣ’ shɛli zaŋ chaŋ nir’ lir’ o kpee polo bee naŋgbankpeeni yɛtɔɣ’ shɛli din be yi tinsi maa ni, di saha yin’ zaŋmiya li yomyom tahi Yawɛ ŋun nyɛ yi Naawuni ŋɔ ni yɛn pii tin’ shɛli ni

9nti mali Lɛvi nir’ ŋun nyɛ maligumaana mini sariakarita ŋun be tuma ni di dabisa maa ni saawara, ka bɛ ti wuhi ya yi ni yɛn ŋmaai yɛtɔɣa maa shɛm.

10Kul niŋmiya bɛ ni wuhi ya ni yi ŋmaai yɛtɔɣa maa shɛm Yawɛ ni pii tin’ shɛl’ maa ni, ka doliya bɛ ni wuhi ya ni yi niŋ shɛlikam zaa viɛnyɛliŋga.

11Di simdi ni yi doli bɛ ni kahigi zaligu maa wuhi shɛm bee bɛ ni ŋmaai yɛtɔɣa maa shɛm. Di ti ŋmaligiya kpa yi nudirigu polo bee yi nuzaa polo ka chɛ bɛ ni ŋmaai yɛtɔɣa maa shɛm tin ya.

12Ninvuɣ’ so yi ti yi n-zani ni o zaɣisi Yawɛ ŋun nyɛ yi Naawuni ŋɔ ni pii maligumaana so bee sariakarita so zali nimaani yɛligu maa, bɛn’ kum dilana. Lala ka yi yɛn niŋ yihi zaɣ’ biɛɣu maa Izraɛl tiŋgbɔŋ ni.

13Ka niriba zaa wum di yɛla, ka dabiɛm gbahi ba, ka bɛ ku lan niŋ tipawumli yaha.

14Yi yi ti paai Yawɛ ŋun nyɛ yi Naawuni ŋɔ ni zaŋ tiŋgbɔn shɛli tin ya maa ni ti dee’ li su n-ʒini di ni ka yɛli, “Ti ni bo naa ka o su ti kaman zuliya kam bɛn gil’ ti ŋɔ ni mali nanim’ shɛm,”

15yɛlimaŋli, yi ni tooi zaŋ Yawɛ ŋun nyɛ yi Naawuni ŋɔ ni pii ninvuɣ’ so n-leei yi naa ka o sun ya. Yi ni tooi zaŋ yi zuliya ni nira n-leei yi naa. Miriya ka yi ti zaŋ tinzun nira ŋun pa yi mabia n-leei yi naa.

16Hal di yi niŋ lala ŋun’ di laɣim yuri pam lo bee n-chɛ ka niriba maa labi Ijipti ni bɛ ti laɣim yuri pam na ti pahi; dama Yawɛ daa yɛliya, “Di lan labiya nimaani yaha.”

17Di mi bi simdi ni o ti kpuɣi paɣiba pam niŋ o paɣiba, di yi niŋ lala o suhu ni lɛbigi. O mi di ti va anzinfa bee salima pam mali.

18Ka o yi ti ʒin’ o nam ʒiishee, ŋun chɛ ka bɛ yaai zaligu ŋɔ niŋ litaafi ni Lɛvinim’ bɛn nyɛ maligumaaniba la ninni ti o,

19ka di be o sani, ka o karindi li dabisili kam o biɛhigu ni din ni chɛ ka o bɔhim Yawɛ ŋun nyɛ o Naawuni ŋɔ sizuura lubu, ka doli yɛtɔɣ’ shɛŋa din be zaligu ŋɔ ni mini zaligu shɛŋa din pahi viɛnyɛliŋga.

20Ka lala chɛ ka o ku duh’ omaŋ’ yaɣ’ o mabihi maa sani, ka mi ku birigi fukumsi zaligu maa n-kpa nudirigu polo bee nuzaa polo din ni chɛ ka o min’ o zuliya ti di nam yuui Izraɛl tiŋgbɔŋ maa ni.

← Chapter 16 Jump to: Chapter 18 →