Deuteronomy 21

Dagbani Bible (Naawuni Kundi Kasi)

← Chapter 20 Jump to: Chapter 22 →

1Yi yi nya ka ninsal’ kpi n-do mɔɣu ni ka yi bi mi ŋun ku o, Yawɛ ŋun nyɛ yi Naawuni ŋɔ ni yɛn zaŋ tiŋgbɔn shɛli tin ya ka yi su li maa ni,

2dindina yi kpamba mini sariakaritiba bɛn cham’ ti buɣisi o ni do luɣ’ shɛli maa zaŋ chaŋ fɔntin’ shɛŋa din miri nimaani wɔɣilim,

3ka fɔntin’ shɛli din ti miri kpim’ maa ni do luɣ’ shɛli maa kpamba ni bo naɣisa’ so bɛ ni na ʒi n-zaŋ tum tuma bee n-zaŋ dapua pa o nyiŋgoli zuɣu.

4Ka fɔntiŋ’ maa kpamba zaŋ naɣisaa maa chaŋ vinvamli ni kulibɔŋ shɛli din kom zɔr’ ni, ka so na ʒi n-ko nimaani bee m-biri binshɛli nimaani nti kabi naɣisaa maa nyiŋgoli vinvamli maa ni.

5Di saha ka maligumaaniba bɛn nyɛ Lɛvi bidibisi la ni kana, dama Yawɛ ŋun nyɛ yi Naawuni ŋɔ m-pii ba ni bɛ tumd’ o tuma, ka zaŋdi ŋun’ Yawɛ yuli suhiri alibarika niŋdi niriba ni, ka bɛ ni yɛli shɛm n-nyɛ din ŋmaari naŋgbankpeeni mini tab’ liribu yɛtɔɣa zaa.

6Ka tin’ shɛli din miri kpim’ maa ni do luɣ’ shɛli maa kpamba zaa ni paɣi bɛ nuhi bahi bɛ ni kabi naɣisa’ so nyiŋgoli vinvamli maa ni la zuɣu

7ka yɛli, “Ti nuhi ka doo ŋɔ ʒim yihibu ni bee n-di di shɛhira.

8Yawɛ, di zaŋ a niriba Izraɛlnim’ bɛn nyɛ a ni tiligi shɛb’ ŋɔ taali; ka di chɛ ka ŋun ka taali ŋɔ ʒim yihibu taali be a niriba Izraɛlnim’ sunsuuni.” Di saha ka bɛ ni yi ʒim yihibu taali ni.

9Lala ka yi ni ti niŋ n-yihi ŋun ka taali maa ʒim yihibu taali yi sunsuuni. Dama di simdi ni yi niŋ din tuhi Yawɛ sani.

10Yi yi ti lo tɔbu chaŋ ni yi ti tuhi yi dimnima, ka Yawɛ ŋun nyɛ yi Naawuni ŋɔ zaŋ ba niŋ yi nuu ni, ka yi gbahi ba daba,

11di yi niŋ ka a nya paɣ’ viɛlli yi ni gbahi shɛb’ daba maa ni, ka bɔri ni a zaŋ o leeg’ a paɣa,

12ka zaŋ o kuli a yiŋa, di simdi ka o pini o zuɣu, ka ŋmah’ o nyinyɛhi,

13ka yeeg’ o dabitim binyɛrigu, ka o niŋ a yiŋa goli muni n-kum o banim’ min’ o manim’ kuli. Dimbɔŋɔ nyaaŋa a ni tooi zaŋ o niŋ a paɣa, ka a leeg’ o yidana ka o mi leeg’ a paɣa.

14Amaa a nini yi ti bi tiɣ’ o, nyin’ bahim’ o ka o chaŋ, ka di zaŋ o kɔhi. Di bi simdi ni a niŋ o kaman dabili la, a ni zaŋ o dɔni m-baŋ o daashil’ la zuɣu.

15Doo yi mali paɣiba ayi ka yuri yino ka bi yuri ŋun’ la, ka o ni yuri paɣ’ so maa min’ o ni bi yuri paɣ’ so maa zaa dɔɣ’ o bidibisi, ka o ni bi yuri paɣ’ so maa bidibiga n-nyɛ o bituuli,

16ka o yi ti zal’ o ni yɛn pirig’ o ni su shɛli ti ba dahin’ shɛli, o ka soli ni o niŋ o ni yuri paɣ’ so maa bidibiga kaman o bikpɛm’ sani, ka chɛ o ni bi yuri o paɣ’ so maa bia ŋun nyɛ kpɛm’ maa.

17Amaa di simdi ni o baŋ ni o bidib’ tuuli nyɛla o ni bi yur’ paɣ’ so la bidibiga maa, ka pirig’ o ni su shɛli maa ʒiibuyi zuɣu ti o, dama ŋuna n-nyɛ o kpiɔŋ saha bia, ka bituuli tarili nyɛla o dini.

18Ka do’ so yi mali bidibiga ŋun nyɛ tipawumlilana ŋun bi deer’ o ba min’ o ma noli, ka bɛ yi darig’ o tibili o ni bi deeri bɛ yɛligu zuɣu,

19dindina o ba min’ o ma maa bɛn’ gbaam’ o n-zaŋ o tahi bɛ ya kpamba sani nti zaŋ o zali tiŋ’ maa dunɔdali ni,

20ka yɛli tiŋ’ maa kpamba maa, “Ti bia ŋɔ nyɛla tipawumlilana ni nɔzaɣisira; o bi deeri ti noli; o nyɛla pulaandana ni danyura.”

21Di saha tiŋ’ maa dɔbba zaa bɛn’ labim’ o kuɣa ku o. Lala ka yi ni niŋ n-yihi zaɣ’ biɛɣu maa yi sunsuuni, ka Izraɛlnim’ zaa wum di yɛla ka dabiɛm gbahi ba.

22So yi tum taali din simdi ni bɛ ku o, ka bɛ zaŋ o yili tia ku o,

23yin’ di chɛ ka o gbe tia maa zuɣu, amaa yin’ sɔɣimiy’ o dindali maa, dama bɛ ni yili ninvuɣ’ so mia nyɛla Naawuni noli ni di so, di bi simdi ni yi ta Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya ni yi su maa daɣiri.

← Chapter 20 Jump to: Chapter 22 →