Deuteronomy 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Lɛvinim’ bɛn nyɛ maligumaaniba la, Lɛvi zuliya niriba maa zaa ti ku mali tarili bee fali Izraɛl tiŋgbɔŋ ni, bɛ ni ti dirila sara binshɛŋa din nyɛ Yawɛ dini.

2Amaa bɛ ku mali fali bɛ mabihi sani, Yawɛ n-nyɛ bɛ fali kaman o ni daa lo ba alikauli shɛm la.

3Maligumaaniba ni su shɛli niriba maa sani n-nyɛ: Ŋunkam yɛn mali sara, ka di nyɛla nahu bee piɛɣu, di simdi ka o yihi bimbɔɣigbini mini yɛno ni bimpuli ti maligumaana.

4Zaŋmiya yi kawaan’ daŋda mini yi wain daŋda ni yi kpa’ daŋda ni yi ni tuui chɛ biŋkɔbiri kɔb’ shɛŋa ti o.

5Dama Yawɛ ŋun nyɛ yi Naawuni ŋɔ m-pii Lɛvi yi zuliya zaa ni ni o min’ o bihi zani zaŋ ŋun’ Yawɛ yuli tumdi tuma sahakam.

6Lɛvi zuliya ni nira yi yi tin’ shɛl’ ni o ni pun be Izraɛl tiŋgbɔŋ ni n-ka Yawɛ ni yɛn pii luɣ’ shɛli na (ka o mi ni tooi kana o ni bɔri saha shɛli),

7dindina o ni tooi zaŋ Yawɛ ŋun nyɛ o Naawuni ŋɔ yuli tum tuma kaman o Lɛvi tab’ zaa ni zaani Yawɛ tooni tumdi tuma nimaani shɛm.

8Ka bɛ zaa dihili ni ti nyɛla dɛde hal bɛ ni mali tarili bɛ dɔɣiriba ni kɔhiri bɛ daŋ ni neen’ shɛŋa ni la zaa yoli.

9Yi yi ti paai Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya maa ni, yin’ miriya ka yi ti tumdi zuliya shɛb’ bɛn be nimaani tuun’ shɛŋa din tumbu chihiri la.

10Yi ni so miri ka o ti zaŋ o bidibiga bee o bipuɣiŋga nyo buɣim mali sara bee n-ŋmɛri bihigu bee m-buɣiri baɣa bee n-nyɛ bɔha bee bukpaha

11bee n-niŋdi shiriku bee n-nyɛ dɔdihira bee kpilikparisilana.

12Dama ŋunkam niŋdi dimbɔŋɔnima nyɛla Yawɛ ni bi bɔri so, binyɛra din chihiri ŋɔ niŋbu zuɣu ka Yawɛ ŋun nyɛ yi Naawuni ŋɔ daŋ kariti ba maa.

13Di simdi ni yi kul ʒe Yawɛ ŋun nyɛ yi Naawuni ŋɔ yim.

14Dama yi ni yɛn kari zuliya shɛb’ maa nyɛla bɛn doli baɣisi mini bihiŋmɛriba yɛligu, amaa yinim’ bɛna, Yawɛ ŋun nyɛ yi Naawuni ŋɔ bi saɣi ni yi niŋ lala.

15Yawɛ ŋun nyɛ yi Naawuni ŋɔ ni ti chɛ ka anabi yi yimaŋmaŋ’ niriba ni na kaman n ni be shɛm ŋɔ, ti wummiya anabi maa yɛligu.

16Yi ni daa suhi Yawɛ ŋun nyɛ yi Naawuni ŋɔ dahin’ shɛli yi ni daa laɣim Sinai Zoli gbini la yɛli shɛm m-bɔŋɔ, “Ti yi lan wum Yawɛ ŋun nyɛ ti Naawuni ŋɔ kukoli pahi bee n-nya buɣim titali ŋɔ yaha, ti ni kpi.”

17Di saha ka Yawɛ daa garigi yɛli ma, “Bɛ ni yɛli shɛm maa tuhiya.

18N ni chɛ ka anabi ŋun be kaman nyini ŋɔ yi bɛmaŋmaŋ’ niriba maa ni na m-be bɛ sani, ka n zaŋ n zilinli niŋ anab’ maa nol’ ni, ka o ti yɛri ba n ni zal’ o ni o yɛli ba shɛlikam zaa.

19Ka ŋunkam ti zaɣisi anab’ maa ni yɛn zaŋ n yuli tɔɣisi yɛtɔɣ’ shɛŋa maa wumbu, mmaŋmaŋ’ ni ti kari dilan’ saria.

20Amaa anabi so ŋun ti zaŋ wuna yuya tɔɣisiri yɛtɔɣa bee anab’ so ŋun zaŋ n yuli tɔɣisiri yɛtɔɣ’ shɛŋa n ni bi zal’ o ni o tɔɣisi, di daanab’ maa ni kpi.

21Yi ni tooi bɔhi yimaŋa, ‘Wula ka ti lee yɛn niŋ baŋ yɛtɔɣ’ shɛli Yawɛ ni bi yɛli?’

22Anabi yi zaŋ Yawɛ yuli tɔɣisi yɛtɔɣ’ shɛli ka di bi niŋ bee ka shɛli bi wuhi ni di nyɛla yɛlimaŋli, di pala Yawɛ ni yɛli yɛtɔɣ’ shɛli: Anabi maa n-kul ŋme nyɔɣu n-tɔɣisi yɛtɔɣa maa; yin’ di chɛ ka dabiɛm mali ya.”

← Chapter 17 Jump to: Chapter 19 →