Deuteronomy 34

Dagbani Bible (Naawuni Kundi Kasi)

← Chapter 33 Jump to:

1Dimbɔŋɔ nyaaŋa ka Musa daa yi Mɔab bɔpiɛligu maa ni n-du Nɛbo Zoli nti paai Pisiga Zo’ shɛli din be Jɛriko tooni polo la zuɣu. Ka Yawɛ daa wuh’ o tiŋgbɔŋ maa zaa, zaŋ Giliad hal ni Dan.

2Naftali tiŋgbani zaa mini Ifriim tiŋgbani ni Manaasa tiŋgbani ni Juda tiŋgbani zaa zaŋ hal ni wulinluhili polo teeku noli,

3zaŋ Nɛgɛb mini bɔpiɛligu din nyɛ Jɛriko vinvamli, ka nyɛ tin’ shɛli din mali dɔbino tihi la hal ni Zɔa.

4Ka Yawɛ daa yɛl’ o, “Tiŋgbɔŋ ŋɔ ka n daa po pɔri yɛli Ibrahimma mini Yisahaku ni Yaakubu, ‘N zaŋ li ti yi Zuliya.’ N chɛ ka a nini nya li, amaa a ku paai nimaani.”

5Di saha ka Musa ŋun daa nyɛ Yawɛ dabili maa daa kpi nimaani Mɔabnim’ tiŋgbɔŋ ni kaman Yawɛ ni daa zali shɛm maa.

6Ka bɛ daa sɔɣ’ o Mɔabnim’ tiŋgbɔŋ maa vinvamli din be Bɛtipɛɔr tooni polo la. Amaa so bi mi bɛ ni daa sɔɣ’ o luɣ’ shɛli maa hal ni zuŋɔ.

7Musa ni daa kpi saha shɛli maa, o yuma daa nyɛla yuun’ kɔbiga ni pisi. O nina daa na kul nɛmi viɛnyɛliŋga, ka o niŋgbuŋ ni yaa daa bi filim.

8Ka Izraɛlnim’ daa kum Musa kuli Mɔabnim’ bɔpiɛligu maa ni hal ni biɛɣu pihita, di nyaaŋa ka Musa kuli maa kumbu daa naai.

9Ka yɛm shia daa pali Nan bia Jɔshua, dama Musa daa zaŋla o nuhi pa Jɔshua zuɣu, dinzuɣu ka Izraɛlnim’ maa daa deeg’ o noli, ka niŋ kaman Yawɛ ni daa zali Musa shɛm.

10Anab’ so daa bi lan yiɣisi Izraɛl tiŋgbɔŋ ni ŋ-ŋmani Musa, ka Yawɛ min’ o nini daa nya taba.

11Ka so daa bi tooi wuhi shihira, ka tum alahiziba tuma kaman Yawɛ ni daa tim o ka o ti tum tuun’ shɛŋa Ijipti tiŋgbɔŋ ni n-jɛndi Firawuna min’ o kpambaliba ni o tiŋgbɔŋ maa nim’ zaa la

12ni o ni daa chɛ ka Musa tum tuun’ kar’ shɛŋa zaa ni o ni daa wuhi yiko din mali dabiɛm Izraɛlnim’ zaa ninni shɛm la.

← Chapter 33 Jump to: