Deuteronomy 26

Dagbani Bible (Naawuni Kundi Kasi)

← Chapter 25 Jump to: Chapter 27 →

1Yi yi ti paai Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya ni di leei yi fali shɛli yi ni yɛn su la ni, ka yi deei li su n-ʒini di ni,

2yin’ ti piimiya yi ni yɛn tuui kpuɣi puu atam shɛli Yawɛ ŋun nyɛ yi Naawuni ŋɔ ni zaŋ tiŋgbɔn shɛli tiri ya maa ni zaa niŋ piɛri puuni n-zaŋ li chaŋ ŋun’ Yawɛ ŋun nyɛ yi Naawuni ŋɔ ni yɛn pii luɣ’ shɛli ni o yuli be nimaani la.

3Ka yi ti chaŋ maligumaana ŋun tumdi tuma di saha maa sani ti yɛl’ o, “Zuŋɔ dabisili ŋɔ n wuhi Yawɛ ŋun nyɛ a Naawuni ŋɔ ni m paai ŋun’ Yawɛ ni daa po pɔri yɛli ti yaannim’ ni o ni zaŋ tiŋgbɔn shɛli ti ti la ni.”

4Maligumaana maa yi ti deei piɛɣu maa yi nuu ni n-zaŋ li zali Yawɛ ŋun nyɛ yi Naawuni ŋɔ sara maligu bimbini gbini,

5yin’ yɛlimiya: ‘Ti yab’ daa nyɛla Aram nira ŋun chani ginda, ka o daa ti chaŋ ti ʒini Ijipti n-nyɛ sana, bɛ kalinli daa bi yaɣi lala. Nimaani ka o zuliya daa ti nabi n-galisi ka mali yaa pam.

6Ka Ijiptinim’ maa daa ti niŋdi ti putɔɣu, ka muɣisiri ti n-chɛ ka ti tumdi tuun’ kpɛma.

7Ka ti daa kuhi niŋ Yawɛ ŋun nyɛ ti yaannim’ Naawuni ŋɔ, ka Yawɛ daa wum ti kuhigu maa, ka nya ti wahala mini ti tuun’ kpɛma tumbu ni ti muɣisigu maa.

8Ka ŋun’ Yawɛ daa zaŋ o nuu din mali yaa ka teeg’ o bɔɣu n-tum yiko tuma din mali dabiɛm, ka tum alahiziba tuma ka wuhi shihira n-yihi ti Ijipti maa

9n-zaŋ ti tahi kpe na nti zaŋ tiŋgbɔŋ ŋɔ ti ti, di nyɛla tiŋgbɔn shɛli din mali bihim mini shiri pam.

10Dinzuɣu pumpɔŋɔ n zaŋla nyin’ Yawɛ ni ti ma tiŋgbani ŋɔ ni atam din daŋ niŋbu na ti ti a.’ “Ka a zaŋ li zali tiŋa Yawɛ ŋun nyɛ a Naawuni ŋɔ tooni, ka kurim tiŋa Yawɛ ŋun nyɛ a Naawuni ŋɔ tooni.

11Di saha a mini Lɛvinim’ ni saan’ shɛb’ bɛn be yi sani zaa ni puhi chuɣu Yawɛ ŋun nyɛ yi Naawuni ŋɔ ni ti a min’ a yiŋnim’ binshɛŋa zaa o nirilim puuni maa zuɣu.

12“Ka yi yi ti yo yi puri atam pirigibu bupia kam zuɣu yim naai yuuni din pahir’ ata, ka nyɛ yuun’ shɛli puuni yi ni yɔri pirigibu bupia kam zuɣu yim tiri Lɛvinim’ mini saamba ni kpibisi ni pakoya ni bɛ gba di n-tiɣi yi tinsi ni la,

13di saha ka yi ni ti yɛli Yawɛ ŋun nyɛ yi Naawuni ŋɔ tooni, ‘Ti yihi a tarili din nyɛ kasi maa ti yinsi, ka zaŋ li ti Lɛvinim’ mini saamba bɛn be ti sani ni kpibisi ni pakoya kaman a zaligu shɛŋa zaa a ni zali ti la ni wuhi shɛm. Ti bi birigi a zaligu shɛli bee n-tam di yɛla.

14Saha shɛli n ni daa kumdila, n daa bi di li; saha shɛli n ni daa be daɣiri ni la, n daa bi pii di shɛli. Ka m mi daa bi zaŋ li mali kpiimba. Ti deei nyin’ Yawɛ ŋun nyɛ ti Naawuni ŋɔ noli. Ti tum a ni zali ti ni ti tum shɛm zaa.

15Be a biɛhigu shee din be kasi alizanda ni ka lihi tiŋ’ na n-niŋ alibarika niŋ a niriba Izraɛlnim’ min’ a ni zaŋ tiŋgbɔn shɛli ti ti ŋɔ ni kaman a ni daa po pɔri yɛli ti yaannima ni di nyɛla tiŋgbɔn shɛli din mali bihim mini shiri pam la.’

16“Zuŋɔ dabisili ŋɔ ka Yawɛ ŋun nyɛ yi Naawuni ŋɔ zali ya ni yi doli zaligunim’ ŋɔ mini zaligu shɛŋa din pahi, dinzuɣu doliya li viɛnyɛliŋga ni yi suhuri zaa ni yi shihi zaa.

17Zuŋɔ dabisili ŋɔ yi deei Yawɛ daalikauli ni o nyɛ yi Naawuni ka yi ni dol’ o soli ka gbib’ o fukumsi zaligunim’ mini zaligu shɛŋa din pahi ka deeg’ o noli.

18Ka Yawɛ mi deei yi daalikauli zuŋɔ dabisili ŋɔ ni yi nyɛla omaŋmaŋ’ niriba kaman o ni daa lɔn ya alikauli ni di simdi ni yi dol’ o zaligunim’ la

19din ni chɛ ka o duhi ya, ka yi nyari paɣibu mini yudua ni jilima n-gari o ni nam zuliya shɛb’ zaa, ka chɛ ka yi ti niŋ zuliya kasi ŋun’ Yawɛ ŋun nyɛ yi Naawuni ŋɔ sani kaman o ni daa lɔn ya alikauli shɛm la.”

← Chapter 25 Jump to: Chapter 27 →