Deuteronomy 30

Dagbani Bible (Naawuni Kundi Kasi)

← Chapter 29 Jump to: Chapter 31 →

1N ni zaŋ alibarika shɛli mini noli yɛlibu shɛli zali yi tooni ŋɔ yi ti niŋdi ya, ka yi teeri di yɛla Yawɛ ŋun nyɛ yi Naawuni ŋɔ ni yɛn kari ya tahi zuliya shɛba zaa ni ŋɔ sani,

2ka yi ŋmaligi labi Yawɛ ŋun nyɛ yi Naawuni ŋɔ sani ka yi mini yi bihi ti deeg’ o noli ni yi suhuri zaa mini yi shihi zaa kaman n ni zaani ya shɛm zuŋɔ dabisili ŋɔ,

3dindina Yawɛ ŋun nyɛ yi Naawuni ŋɔ ni labisi yi daazichi tin ya ka zɔn ya nambɔɣu, ka laɣim ya yihi Yawɛ ŋun nyɛ yi Naawuni ŋɔ ni daa wurim ya kpɛhi zuliya shɛb’ zaa ni la na.

4Hal bɛ yi kari ya tahi dunia ŋɔ ni luɣilikam, Yawɛ ŋun nyɛ yi Naawuni ŋɔ ni laɣim ya nimaani n-zaŋ ya nimaani labisina.

5Ka Yawɛ ŋun nyɛ yi Naawuni ŋɔ ni ti zaŋ ya ti ʒili yi yaannim’ ni daa su tiŋgbɔn shɛli la ni, ka yi ti su li, ka o chɛ ka yi tɔŋ, ka yi kalinli galisi gari yi yaannim’ maa kalinli.

6Din pahi nyɛla, Yawɛ ŋun nyɛ yi Naawuni ŋɔ ni taɣi yi mini yi bihi suhuri din ni chɛ ka yi yuri ŋun’ Yawɛ ŋun nyɛ yi Naawuni ŋɔ ni yi suhuri zaa mini yi shihi zaa, ka lala ti chɛ ka yi be.

7Ka Yawɛ ŋun nyɛ yi Naawuni ŋɔ ti chɛ ka noli yɛlibu yɛla ŋɔ zaa di yi dimnim’ bɛn daa nahim ya la.

8Di saha ka yi ti lan deei Yawɛ noli, ka doli o fukumsi zaligu shɛŋa zaa n ni zaani ya zuŋɔ dabisili ŋɔ.

9Ka Yawɛ ŋun nyɛ yi Naawuni ŋɔ ti chɛ ka yi tɔŋ yi tuma zaa ni, ka yi bihi nabi, ka yi biŋkɔbiri nabi, ka yi puri atam gba nabi. Dama Yawɛ ni lan chɛ ka o zaɣa be yi ni, ka yi tɔŋ kaman o zaɣa ni daa be yi yaannim’ ni ka bɛ tɔŋ shɛm la.

10Yinim’ dee yi ti deei Yawɛ ŋun nyɛ yi Naawuni ŋɔ noli, ka dol’ o fukumsi zaligunim’ mini zaligu shɛŋa din sab’ zaligu kundi ŋɔ puuni ŋɔ, ka ŋmaligi labi ŋun’ Yawɛ ŋun nyɛ yi Naawuni ŋɔ sani ni yi suhuri zaa mini yi shihi zaa.

11Yɛlimaŋli, n ni zaani ya zaligu shɛŋa zuŋɔ dabisili ŋɔ pala din kpɛm’ pam yi sani bee din be katiŋ’ ha.

12Di pala din be zuɣusaa ka yi ni yɛli, ‘Ŋuni n-lee ni du zuɣusaa nti zaŋ li ti ti na ka ti wum li ka dol’ li?’

13Di mi pala din be teeku duli ka yi ni yɛli, ‘Ŋuni n-lee ni du teeku duli ti zaŋ li ti ti na ka ti wum li ka dol’ li?’

14Aai, yɛligu maa kul bela yi sani, di bela yi noya ni mini yi suhuri ni ni yi dol’ li.

15Nyamiya, n zaŋla nyɛvili mini tɔŋsim ni kum mini ashaara n-zali yi tooni zuŋɔ dabisili ŋɔ.

16Yi yi doli n ni zaŋ Yawɛ ŋun nyɛ yi Naawuni ŋɔ fukumsi zaligu shɛŋa zaani ya zuŋɔ dabisili ŋɔ, ka yuri Yawɛ ŋun nyɛ yi Naawuni ŋɔ, ka dol’ o soli min’ o fukumsi zaligunim’ ni zaligu shɛŋa din pahi, dindina yi ni be, ka yi kalinli nabi, ka Yawɛ ŋun nyɛ yi Naawuni ŋɔ niŋ alibarika niŋ yi ni, yi ni kpɛri tiŋgbɔn shɛl’ ni ni yi ti deei li su maa ni.

17Amaa yi yi taɣi yi suhuri ka zaɣisi wumbu ka birigi n-jɛmdi wuna,

18n yɛri ya la zuŋɔ dabisili ŋɔ ni yi zaa ni ti kpi, yi ti ku yuui yi ni yɛn du Jɔɔdɛn mɔɣili ti kpe tiŋgbɔn shɛli ni nti dee’ li su maa ni.

19M bɔri ni zuɣusaa mini tiŋgbani din ya shɛhira zuŋɔ dabisili ŋɔ ni n zaŋla nyɛvili mini kum ni alibarika mini noli dibu zali ya zuŋɔ dabisili ŋɔ. Dinzuɣu piimiya nyɛvili, dina n-ni chɛ ka yi mini yi zuliya be.

20Yi yi yuri Yawɛ ŋun nyɛ yi Naawuni ŋɔ, ka dol’ o noli, ka zaŋ yimaŋ’ tabil’ o, dina n-ni chɛ ka yi be tiŋgbɔn shɛli Yawɛ ni daa po pɔri n-zaŋ ti yi yaannim’ bɛn nyɛ Ibrahimma mini Yisahaku ni Yaakubu la ni.

← Chapter 29 Jump to: Chapter 31 →