Deuteronomy 33

Dagbani Bible (Naawuni Kundi Kasi)

← Chapter 32 Jump to: Chapter 34 →

1Musa ŋun nyɛ Naawuni nir’ la ni daa zaŋ yɛtɔɣ’ shɛŋa suhi alibarika niŋ Izraɛlnim’ ni ka naanyi kpi m-bɔŋɔ:

2O daa yɛliya: Yawɛ daa yila Sinai Zoli zuɣu na, ka yi Siɛr ka ti sanna; o daa yi Paran Zoli zuɣu n-niŋ neesim bahi ti na, ka ninvuɣ’ shɛb’ bɛn be kasi tuhi’ pia be o sani; ka omaŋmaŋ’ dini din galisi be o nudirigu polo.

3Yɛlimaŋli, nyini ŋun yuri niriba ŋɔ, ninvuɣ’ shɛb’ bɛn be kasi zaa daa bela a nuu ni, bɛ daa dolila a naba, ka deer’ a noli.

4Musa daa zali ti zaligu, ka di nyɛ Yaakubu zuliya ni su shɛli.

5Ka naa daa yiɣisi Jɛshurun, saha shɛli niriba zuɣulaannim’ ni daa laɣim, din nyɛ Izraɛl zuliya naŋgban’ yini laɣiŋgu la.

6“Naawuni chɛ ka Rubin zuliya kul beni, ka ku kpihim, hal o zuliya kalinli ni kul pɔri maa zaa yoli.

7Ŋ-ŋɔ ka o daa yɛli zaŋ kpa Juda zuliya polo, “Yawɛ, deemi Juda zuliya suhigu, ka zaŋ ba laɣim bɛ niriba ni, ka ti ba kpiɔŋ, ka sɔŋ ba ka bɛ nyaŋ bɛ dimnima.

8O ni daa yɛli shɛm zaŋ chaŋ Lɛvi zuliya polo m-bɔŋɔ; “Zaŋm’ a Tumim ti Lɛvi zuliya ka zaŋ a Urim ti ŋun ʒe a yim a ni daa zahim so Masa la, a mini ŋun daa mo Mɛriba kom ni la.

9Ŋun daa yɛli zaŋ chaŋ o banim’ min’ o manim’ polo, “M bi lihi nya ba.” O daa zaɣisi o mabihi, ka zaɣisi o bihi. Dama bɛ nyɛla bɛn dol’ a yɛligu, ka gbib’ a daalikauli.

10Bɛ zaŋ a zaligunim’ wuhiri Yaakubu zuliya, ka zaŋ a zalikpana wuhiri Izraɛlnima. Bɛ ni ti tuɣili tulaale zim a tooni, ka maani bɛ ni zaŋdi sara shɛli nyɔri buɣim la a sara maligu bimbini zuɣu, ka di di buɣim zaa.

11Yawɛ, niŋmi alibarika niŋ o ni mali shɛli ni, ka chɛ ka a nini tiɣi o nuhi tuma. Kum o dimnim’ bɛn je ba la zuliya, ka bɛ ku lan neei yaha.

12O daa yɛli Bɛnjamin zuliya, ‘Yawɛ ni yuri so, barina ku tooi paag’ o. Naawuni ŋun galisi ŋɔ nyɛla ŋun be o luɣilikam dabisi’ muni puuni zaa. O ni yuri so ʒila o bɔɣusapima sunsuuni.

13O daa yɛli Yisifu zuliya: Yawɛ daalibarika ni be o tiŋgban’ ni m-pahi zuɣusaa mini tiŋgbani puuni pin’ gahinda

14ni wuntaŋ’ ni kpɛri tiwal’ viɛl’ shɛŋa, ka di wandi pam di goya ni

15ni bindir’ viɛla din niŋdi kurimbuni ha zoya zuɣu ni bindira din niŋdi pam dabo’ kura zuɣu

16ni tiŋgban’ ni pin’ suma mini di binshɛɣukam ni ŋun daa be tutuɣu din diri buɣim ŋɔ yurilim. Chɛ ka dimbɔŋɔnim’ siɣi Yisifu zuɣu na, ka chɛ ka di siɣi ŋun’ ŋun nyɛ nabia o mabihi sunsuuni ŋɔ ningbaɣu kɔbiri zuɣu na.

17Naɣilabil’ tuuli jilima nyɛla o dini. O yila nyɛla yɔnahu yila. Dina ka o ti yɛn zaŋ ʒe niriba n-kari ba ti bahi dunia tarisi. Bɛna n-nyɛ Ifriim zuliya niriba tuhi’ pia; bɛna n-nyɛ Manaasa zuliya niriba tusa shɛm la.

18Ka o daa yɛli Zɛbulɔn zuliya: Yinim’ Zɛbulɔn zuliya, “Maliya suhupiɛlli yi yibu ni. Yinim’ Isaka zuliya, bɛnya yi suɣa puuni.

19Bɛ boonila niriba duri zoya zuɣu; nimaani ka bɛ maani sara din tuhi. Dama teeku puuni ka bɛ nyari bɛ daazichi, ka nyari azichi sɔɣira bihigu ni.”

20O daa yɛli Gaad zuliya: “Ninvuɣ’ so ŋun yɛligi Gaad tiŋgbani ŋɔ mali alibarika. Gaad zuliya niriba ŋmanila gbuɣinli. O darigiri tɔhigiri bɔɣu, ka darigiri fuɣiri zuɣugbana.

21O daa piila tiŋgbɔŋ maa yaɣ’ shɛli din viɛla n-leeg’ o dini; dama nimaani ka bɛ daa zaŋ zali sapashin’ kpɛma. O daa ka niriba maa zuɣulaannim’ sanna. O daa zaŋ Yawɛ fukumsi zaligunim’ min’ o ni daa zaŋ zaligu shɛŋa ti Izraɛlnim’ pahi la tum tuma.”

22O daa yɛli Dan zuliya: “Dan zuliya ŋmanila gbuɣin’ polli ŋun yiɣi yi Bashan na.”

23O daa yɛli Naftali zuliya: “Yinim’ Naftalinima, yi nya yurilim tiɣi, ka Yawɛ daalibarika pali yi ni. Yinima n-su wulinluhili mini nudirigu polo.”

24O daa yɛli Asha zuliya mi: “Asha bidibisi mali alibarika pam. Chɛ ka bɛ mabihi zaa yuri ba, ka chɛ ka bɛ naba siɣi kpam ni.

25Yi ni mali binshɛŋa kpariti yi dunoya nyɛla kuriti mini daanya. Yi dabisa ni yɛn be shɛm, lala ka yi yaa yɛn be.”

26Yinim’ Jɛshurunnima, so kani ŋ-ŋmani yi Naawuni ŋun yi zuɣusaa na ni o ti sɔŋ ya ka nyɛ ŋun’ yi sagbana ni na ni jilima ŋɔ. Naawuni so ŋun ka bahigu ŋɔ n-nyɛ yi sɔɣisili shee.

27Ŋuna n-filim kurimbuni ha wuna la, ka o nuhi din ka bahigu ŋɔ gbibi ya. O ni kari yi dimnim’ bɛn be yi tooni la bahi ka yɛli, “Kumiya ba.”

28Dinzuɣu ka Izraɛlnim’ daa beni ka barina shɛli kani. Yaakubu zuliya kɔŋko n-daa be tiŋgbɔn shɛli din mali bindira mini wain; ni luɣ’ shɛli maligim ni yiri zuɣusaa luri tiŋ’ na.

29Yinim’ Izraɛlnima, yi mali suhupiɛlli. Ŋuni n-lee ŋmani ya, yinim’ ninvuɣ’ shɛb’ Yawɛ ni daa tiligi ŋɔ! Ŋuna n-nyɛ yi nyɔtaɣirigu n-sɔŋ ya, ka nyɛ yi takɔbi din tin ya nasara! Yi dimnim’ ni ti kani yi sanna ka bɛ ni sɔhira; ka yi ti wurim bɛ buɣa jɛmbu shee zaa.

← Chapter 32 Jump to: Chapter 34 →