Deuteronomy 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Di yi niŋ ka doo kpuɣi paɣa, amaa ka o nini ti bi lan tiɣ’ o, ka di nyɛla binshɛli ka o nya ka di bi viɛl’ o sani, ka dinzuɣu chɛ ka o sabi paɣ’ yihibu gbaŋ ti o, ka yih’ o o yiŋa ka o chaŋ

2ti kuli do’ so,

3ka doo maa gba ti lan je o ka sabi amiliya larigibu gbaŋ ti o, ka yih’ o o yiŋa bee do’ so ŋun kpuɣ’ o maa yi kpi,

4dindina o yidaan’ kuro ŋun daa tuui yih’ o la ka soli ni o lan kpuɣ’ o niŋ’ o paɣa o saɣimbu maa nyaaŋa, dama lala maa chihiri Yawɛ ŋun nyɛ yi Naawuni ŋɔ sani, ka di bi simdi ni yi bo taali niŋ Yawɛ ŋun nyɛ yi Naawuni ŋɔ ni zaŋ tiŋgbɔn shɛli tin ya ni yi su maa ni.

5Doo yi na yoli niŋ amiliya, di bi simdi ni yi chɛ ka o doli tɔbbihi chaŋ tɔb’ ni bee n-chɛ ka o tum tuma lala tatabo, amaa di simdi ni bɛ chɛ o ka o be yiŋ’ yuun’ yini, ka o min’ o ni kpuɣi paɣ’ so maa laɣim mali suhupiɛlli.

6Doo yi yɛn zaŋ binshɛli paŋ o kpee, ŋun di deeg’ o nɛli bee o nɛkaŋ’ sɔŋ pɔi ka naanyi paŋ o li, dama o yi niŋ lala, nyɛvili ka o deei sɔŋ talima pabu ni maa.

7So yi sɔɣi gbaai o Izraɛl kpee n-zaŋ o leei dabili bee n-zaŋ o kɔhi, dindina ŋun gbaag’ o maa simdi kubu, ka lala chɛ ka yi yihi zaɣ’ biɛɣu maa yi sunsuuni.

8Gumiya yimaŋ’ viɛnyɛliŋga ka chɛ niŋgbuŋ dɔr’ biɛɣu, ka di ku lu yi zuɣu. Doliya Lɛvi maligumaaniba la ni wuhiri ya shɛlikam la viɛnyɛliŋga kaman n ni zali ba shɛm.

9Teemiya Yawɛ ŋun nyɛ yi Naawuni ŋɔ ni daa niŋ Miriam shɛm saha shɛli yi ni daa yi Ijipti m-be soli chanila yɛla.

10A yi yɛn deei nir’ binshɛli sɔŋ pɔi ka naanyi paŋ’ o binshɛlikam, nyin’ di dol’ o kpe o yiŋ’ puuni ti deei’ li.

11Nyin’ ʒe samban’ ni, ka a ni yɛn paŋ so bini maa zaŋ a ni yɛn deei binshɛli ti sɔŋ maa yina ti ti a.

12Ka dilan’ yi nyɛla faralana, nyin’ di chɛ ka o chinchin’ shɛli a ni deei sɔŋ maa gbe a sani.

13Wuntaŋ’ yi ti lura, nyin’ zaŋmi li labisi ti ti o, ka o zaŋ o chinchini maa pili gbihi ka paɣ’ a, ka di ti a laara Yawɛ ŋun nyɛ a Naawuni ŋɔ sani.

14Miri ka a vili tumtumdiba bɛn nyɛ nandaamba mini faranim’ yɔri gbibi. Bɛ yi nyɛla a Izraɛl taba bee bɛ yi nyɛla saamba bɛn be yi tiŋgbɔŋ ni yi tinsi maa tin’ shɛl’ ni,

15di simdi ni a yo ba bɛ dabisili kam tuma yɔri, ka wuntaŋ’ naanyi lu, (dama bɛ nyɛla faranima, ka bɛ dabisili kam bindirigu nyɛla dina); di yi pa lala bɛ ni fabili niŋ Yawɛ, ka a kpe taali ni.

16Di bi tu ni bɛ ku bihi laamba bɛ bihi zuɣu bee n-ku bihi bɛ laamba zuɣu; kulila sokam maŋmaŋ’ tuumbiɛri zuɣu ka bɛ ni ku o.

17Miriya ka yi mɔŋ sana bee kpibiga o yɛlimaŋli ni nyɛ shɛli, ka miriya ka yi deei pakoli chinchini sɔŋ pɔi ka naanyi zaŋ binshɛli paŋ o.

18Teemiya ni yi daa nyɛla daba Ijipti tiŋgbɔŋ ni, ka Yawɛ ŋun nyɛ yi Naawuni ŋɔ daa tiligi ya nimaani; dinzuɣu ka n zali ya ni yi niŋmi dimbɔŋɔ maa.

19Yi yi chɛ yi chi ka tam kabɔbili sɔŋ yi puuni, yin’ di lan labiya ti zaŋ li; di ni leela sana bee kpibiga bee pakoli dini, ka lala chɛ ka Yawɛ ŋun nyɛ yi Naawuni ŋɔ niŋ alibarika niŋ yi tuma zaa ni.

20Ka yi yi ti wɔbi yi olivi tiwala, yin’ di lan labi ti yihi din kpalim; di nyɛla sana mini kpibiga ni pakoli dini.

21Ka yi yi pɔhi yi wain tihi wala, di nyaaŋa yin’ di lan chaŋ ti yihi di zaɣ’ yaha; di nyɛla sana mini kpibiga ni pakoli dini.

22Teemiya ni yi daa nyɛla daba Ijipti tiŋgbɔŋ ni, dinzuɣu ka n zali ya ni yi niŋdi dimbɔŋɔ.

← Chapter 23 Jump to: Chapter 25 →