Genesis 10

Dagbani Bible (Naawuni Kundi Kasi)

← Chapter 9 Jump to: Chapter 11 →

1Nuhu bidibisi, bɛn yuya daa booni Shɛm mini Ham ni Jafɛt la zuliya m-bɔŋɔ. Kom ni daa di dunia maa nyaaŋa, ka bɛ daa dɔɣi bidibisi.

2Jafɛt bidibisi n-daa nyɛ: Goma mini Magɔg ni Madai ni Javan ni Tubal ni Mɛshɛk ni Tiras.

3Ka Goma bidibisi daa nyɛ: Ashikɛnaz mini Rifat ni Tɔgarima.

4Ka Javan bidibisi daa nyɛ: Ɛlisha mini Tarishish ni Kitim ni Dɔdanim.

5Bɛmbɔŋɔ zuliya n-daa nyɛ ninvuɣ’ shɛb’ bɛn ʒini baɣili teeku. Bɛna n-nyɛ Jafɛt zuliya bɛn daa be bɛmaŋmaŋ’ tinsi ni, ka mali bɛmaŋmaŋ’ zuliyazuliya yɛtɔɣ’ kɔŋkɔba bɛ tiŋgban’ ni.

6Ham bidibisi n-daa nyɛ: Kush mini Ijipti ni Put ni Keenan.

7Ka Kush bidibisi daa nyɛ: Siiba mini Havila ni Sabita ni Raama ni Sabitɛka. Ka Raama bidibisi nyɛ: Shiiba mini Dɛdan.

8Kush daa mali bidib’ so ka o yuli booni Nimrɔd. Ŋuna n-daa nyɛ tuuli ninvuɣ’ so ŋun mali yaa pam dunia ŋɔ ni.

9Yawɛ sani, o daa nyɛla tɔha ŋun mali yaa pam; dinzuɣu ka niriba daa yi yɛra, “Yawɛ chɛ ka a nyɛ tɔha so ŋun mali yaa kaman Nimrɔd.”

10Tuuli, o nam sulinsi tinsi n-daa nyɛ Babɛl mini Ɛrɛk ni Akad, ka di zaa daa bela Shiina tiŋgbɔŋ ni.

11Ka o daa yi di tiŋgbɔŋ maa ni chaŋ Asiria nti me Ninive mini Rɛhɔbɔtir ni Kala ni

12Rɛsɛn din be Ninive mini Kala din nyɛ tin’ tital’ la sunsuuni.

13Ijipti bihi n-daa nyɛ: Ludinim’ mini Anamnima ni Lɛhabinima ni Nafitunima ni

14Patirusinima ni Kasilunima ni Kafitɔrinima Filistianim’ ni yi shɛb’ zuliya ni na la.

15Keenan bihi n-daa nyɛ: Sidɔn ŋun daa nyɛ o bituuli la mini Hɛt

16ni Jɛbusinim’ ni Amɔrinim’ ni Gɛrigashinim’

17ni Hivinim’ ni Arikinim’ ni Sinnim’

18ni Arivadnim’ ni Zɛmarinim’ ni Hamatinima. Dimbɔŋɔ nyaaŋa ka Keenannim’ daa ti yɛligi chaŋ katiŋa.

19Ka Keenannim’ tintariga daa yi Sidɔn Gɛra polo n-zaŋ hal ti paai Gaza zaŋ lab’ Sɔdom mini Gomɔra ni Adima ni Zɛbɔiim zaŋ hal ti paai Lasha.

20Ham bidibisi mini bɛ malibu ni bɛ tinsi ni bɛ zuliyazuliya yɛtɔɣ’ kɔŋkɔba ni daa nyɛ shɛm m-bala.

21Shɛm ŋun daa nyɛ Jafɛt biɛlikpɛma ka nyɛ Ɛbanim’ zaa yab’ la gba daa dɔɣi bihi.

22Shɛm bidibisi n-daa nyɛ: Ɛlam mini Ashur ni Aripakishad ni Lud ni Aram.

23Aram bidibisi n-daa nyɛ: Uzi mini Hul ni Gɛta ni Mashi.

24Ka Aripakishad daa nyɛ Shɛla ba, ka Shɛla mi nyɛ Ɛba ba.

25Ka Ɛba daa dɔɣi bidibis’ ayi. Yino yuli n-daa booni Pɛlɛg, dama o saha ka tiŋgbani daa pirigi la; ka o tizo mi yuli daa booni Jokitan.

26Jokitan daŋ niriba n-daa nyɛ: Alimɔdad mini Shɛlɛf ni Hazarimavɛt ni Jɛra ni

27Hadɔram ni Uzal ni Dikila ni

28Obal ni Abimeel ni Shiiba ni

29Ofiri ni Havila ni Jɔbab. Bɛmbɔŋɔ zaa n-daa laɣim nyɛ Jokitan daŋ niriba.

30Ka bɛ ni daa be tiŋgbɔn shɛli ni tintariga daa zaŋla Mɛsha hal ti paai Sɛfar din be wulimpuhili polo zoya ni la.

31Shɛm zuliya mini bɛ malibu ni bɛ yɛtɔɣa ni bɛ tiŋgbana ni bɛ zuliyazuliya ni daa nyɛ shɛm m-bala.

32Nuhu bidibisi maa zuliya mini bɛ dɔɣirikpamba yɛla m-bala. Bɛ ni ka zuliya kam yina n-nab’ pali dunia ŋɔ zaa, kom ni daa di dunia maa nyaaŋa.

← Chapter 9 Jump to: Chapter 11 →