Genesis 39

Dagbani Bible (Naawuni Kundi Kasi)

← Chapter 38 Jump to: Chapter 40 →

1To, ka bɛ daa zaŋ Yisifu kuli Ijipti, ka tɔbbi’ shɛb’ bɛn daa guli Firawuna la sapashin’ kpɛm’ ŋun daa nyɛ Ijipti nir’ ka o yuli booni Pɔtifa la daa da o Ishimail zuliya bɛn daa ʒi o kuli nimaani maa sani.

2Ka Yawɛ daa be Yisifu sani ka chɛ ka o diri nasara o tuma ni. O daa bela o dana ŋun nyɛ Ijipti nir’ maa yiŋa.

3Ka o dan’ maa daa nya ka Yawɛ be Yisifu sani, ka chɛ ka o ni niŋdi shɛlikam zaa tɔŋda.

4Dinzuɣu ka Pɔtifa suhu daa yu Yisifu pam, ka Yisifu daa tumd’ o tuma, ka o zaŋ o leeg’ o yiŋ’ tumtumdiba zuɣulana, ka zaŋ o binshɛɣukam zaa niŋ o nuu ni.

5O ni daa zaŋ o leeg’ o yiŋ’ tumtumdiba zuɣulana, ka zaŋ o binshɛɣukam zaa niŋ o nuu ni saha shɛli maa, Yawɛ daa niŋ alibarika niŋ ŋun’ Ijipti nir’ maa yiŋ’ ni Yisifu zuɣu. Yawɛ daa niŋ alibarika niŋ o yiŋ’ binshɛlikam zaa ni, ka niŋ alibarika niŋ o puu gba ni.

6Dinzuɣu ka Pɔtifa daa zaŋ o ni mali shɛlikam zaa niŋ Yisifu nuu ni. Yisifu ni daa be o sani maa zuɣu, o baɣa daa lan ka shɛl’ ni n-naɣ’ pahila bindir’ shɛl’ o ni daa diri ni. Yisifu daa yi nachimbil’ viɛlli pam, ka o lihibu viɛla.

7Ka di daa niŋ daba ayi ka Yisifu dan’ maa paɣ’ ti lihir’ o kɔre lihigu, ka yɛl’ o, “Chɛ ka m min’ a dɔni.”

8Amaa ka Yisifu daa zaɣisi ka yɛl’ o dan’ paɣ’ maa, “Nyama, n ni be n dan’ sani ŋɔ, o baɣa lan ka shɛl’ ni yil’ ŋɔ. O zaŋ o ni mali shɛlikam niŋla n nuu ni.

9O bi galisi gari ma yili ŋɔ puuni, o mi bi mɔŋ ma shɛli naɣila nyini, dama a nyɛla o paɣa; ka wula ka n ni tooi tum ninvuɣ’ biɛtali tuun’ titali ŋɔ n-tum alahichi zaŋ chaŋ Naawuni sani?”

10Hal o ni daa kul yɛri Yisifu lala dabisili kam maa zaa yoli, Yisifu daa bi saɣi ni o min’ o dɔni.

11Amaa ka Yisifu daa ti kpe yili maa ni dahin’ shɛli ni o ti tum o tuma, ka ninvuɣ’ shɛb’ bɛn daa be yili maa ni kani.

12Ka paɣ’ maa daa gbaai Yisifu binyɛrigu gbib’ ka yɛl’ o, “Chɛ ka m min’ a dɔni.” Amaa ka Yisifu daa fuɣ’ o binyɛrigu maa niŋ paɣ’ maa nuu ni, ka guui yi yili maa ni.

13Paɣ’ maa ni daa nya ka Yisifu chɛ o binyɛrigu maa niŋ o nuu ni ka guui yi yili maa ni maa,

14ka o daa boli ninvuɣ’ shɛb’ bɛn daa be o yiŋ’ maa na nti yɛli ba, “Nyamiya, o ni zaŋ Hiburu nir’ maa na ka o ti lihi ʒiɛm ti shɛm, o kpɛmina ni o ti zaŋ ma dɔni, ka n kuhi pam.

15O ni wum ka n duhi n yee kuhi pam maa, ka o chɛ o binyɛrigu bahi ma ka guui yi yili ŋɔ.”

16Di saha ka o daa zaŋ Yisifu binyɛrigu maa sɔŋ baɣil’ omaŋ’ hal ka Yisifu dan’ maa ti kuna.

17Ka o daa zaŋ yɛtɔɣ’ yini maa tɔɣis’ o yɛra, “A ni zaŋ Hiburu dab’ so na ti gari ti ni la kpɛmina ni o ti lihi ʒiɛm ma;

18amaa n ni di kul duhi n yee kuhi pam saha shɛli, ka o chɛ o binyɛrigu ŋɔ bahi ma ka guui yi yili ŋɔ.”

19Yisifu dan’ maa ni daa wum yɛtɔɣ’ shɛŋa o paɣ’ ni zaŋ yɛl’ o ka lan yɛli, “Lala ka a dabili maa niŋ ma,” ka o suhu daa yiɣisi pam.

20Ka Yisifu dan’ maa daa gbaag’ o n-zaŋ o ti niŋ sarika ni din nyɛ luɣ’ shɛli bɛ ni daa zaŋ naa sarikanim’ niŋ, ka o daa be sarika maa ni.

21Amaa ka Naawuni daa be Yisifu sani ka niŋ o nirilim, ka chɛ ka dansarika gul’ maa suhu yu o.

22Ka dansarika gul’ maa daa zaŋ sarikanim’ bɛn zaa be sarika maa ni niŋ Yisifu nuu ni, ka Yisifu daa nyɛ ŋun niŋdi binshɛɣukam zaa nimaani.

23Ka dansarika gul’ maa daa bi lan lihir’ o ni zaŋ binshɛlikam niŋ Yisifu nuu ni maa, dama Yawɛ daa be Yisifu sani, ka o daa yi niŋ shɛlikam, Yawɛ chɛrimi ka di tɔŋ.

← Chapter 38 Jump to: Chapter 40 →