Genesis 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Dimbɔŋɔnim’ nyaaŋa ka Yawɛ daa yɛli Ibram ʒii nyabu puuni, “Ibram, di chɛ ka dabiɛm mal’ a, n ni gbib’ a ka chɛ ka a laara ti galisi pam.”

2Ka Ibram daa bɔhi, “Yawɛ ŋun nyɛ n Duuma ŋɔ, bɔ ka a yɛn ti ma? Nyama, n na ka bia, ka daɣila Ɛliɛza ŋun nyɛ Damaskus nir’ la nti yɛn di n fali?”

3Ibram daa lan yɛli, “Nyama, a ni bi ti ma bia maa zuɣu, bɛ ni dɔɣi dab’ so n yiŋ’ puuni la nti yɛn di n fali.”

4Amaa ka Yawɛ daa yɛl’ o, “Pa ŋuna nti yɛn di a fali; amaŋmaŋ’ bia nti yɛn di a fali.”

5Ka Yawɛ daa zaŋ o yi samban’ ni ti yɛl’ o, “Kpuɣim’ a zuɣu lihi zuɣusaa n-kali saŋmarisi, a yi ni tooi kali ba.” Di saha ka o daa yɛl’ o, “Lala ka a zuliya ti yɛn be.”

6Ka Ibram daa niŋ Yawɛ yɛda, ka Yawɛ daa lih’ o niŋsim maa ka di nyɛla wuntia.

7Di saha ka o daa lan yɛli Ibram, “Mani n-nyɛ Yawɛ ŋun daa yih’ a Ur din be Kalidianim’ tiŋgbɔŋ ni na ni n ti zaŋ tiŋgbɔŋ ŋɔ ti a ka a su li.”

8Amaa ka Ibram bɔhi, “Yawɛ ŋun nyɛ n Duuma ŋɔ, wula ka n lee yɛn niŋ baŋ ni n ni ti su li?”

9Ka o yɛl’ o, “Bom’ yuma ata naɣilaa mini yuma ata bunyaŋ ni yuma ata piɛlaa ni ŋmanʒee ni yiŋ’ ŋmani ti ma.”

10Ka Ibram daa bo biŋkɔbiri maa mini ŋmana maa zaa na nti kɔri ba m-pirigipirigi ba buyiyi n-zaŋ ba sɔŋ tuhi taba. Amaa o daa bi pirigi ŋmana la bɛn’ buyiyi.

11Ka juri daa ti kana ni bɛ ti di ba, ka Ibram kari ba.

12Wuntaŋ’ ni daa ti miri lubu saha shɛli, ka gom daa gbaai Ibram pam ka o dɔni gbihi, ka zibisim titali din mali dabiɛm pam daa zibig’ o sani.

13Ka Yawɛ daa yɛli Ibram, “M bɔri ni a baŋ ka biɛhiŋ kani, ni a zuliya ni ti chaŋ ti be tiŋgbɔn shɛli din pa bɛmaŋmaŋ’ tiŋgbɔŋ ni n-nyɛ daba nimaani, ka bɛ ni ti nahim ba yuun’ kɔbisinahi.

14Amaa n ni ti darigi zuliya shɛb’ bɛn zaŋ ba leei bɛ daba maa tibili, ka di nyaaŋa, bɛ ni ti ʒi azichi pam yi nimaani na.

15Ka amaŋmaŋ’ mi ni be hal ti kurigi n-kpi ni suhudoo, ka bɛ sɔɣ’ a.

16Zaŋ chaŋ ʒiɛmana din pahir’ anahi ni ka bɛ ni ti lab’ kpe na, dama Amɔrinim’ tuumbiɛri na bi galisi yaɣi.”

17Wuntaŋ’ ni daa ti lu ka di zibiri saha shɛli, ka buɣim nyokpilli mini buɣim mokpalli daa kana ti kpe nimdi din ŋmahiŋmahi doya maa sunsuuni gari.

18Dindali maa ka Yawɛ daa lo Ibram alikauli yɛli, “N ni zaŋ tiŋgbɔŋ ŋɔ ti a zuliya. Zaŋ Ijipti mɔɣili noli hal ti paai Yufretiiz Mɔɣ’ tital’ la noli

19zaŋ tabili Kɛnnim’ mini Kɛnizinim’ ni Kadimɔninim’

20ni Hitinim’ ni Pɛrizinim’ ni Rɛfaimnim’

21ni Amɔrinim’ ni Keenannim’ ni Gɛrigashinim’ ni Jɛbusinim’ tiŋgbana la zaa.”

← Chapter 14 Jump to: Chapter 16 →