Genesis 22

Dagbani Bible (Naawuni Kundi Kasi)

← Chapter 21 Jump to: Chapter 23 →

1Dimbɔŋɔ nyaaŋa ka Naawuni daa ti yɛn zahim Ibrahimma ka bol’ o, “Ibrahimma!” Ka Ibrahimma garigi yɛli, “N-nyɛ ma.”

2Ka Naawuni yɛl’ o, “Zaŋm’ a bigaŋ’ Yisahaku so a ni yuri pam la n-chaŋ Mɔria tiŋgbɔŋ ni nti zaŋ o mali sara shɛli bɛ ni zaŋdi nyɔri buɣim la nimaani n ni ti yɛn wuh’ a zo’ shɛli zuɣu.”

3Ka Ibrahimma daa ti daŋ yiɣisibu asibaasi m-pa o buŋ’ nyaampara, ka zaŋ o nachimba ayi min’ o bia Yisahaku pah’ omaŋ’ zuɣu, ka bo dari pahi ni o ti mali sara shɛli bɛ ni zaŋdi nyɔri buɣim la n-daa yi n-chaŋ katiŋa Naawuni ni daa wuh’ o luɣ’ shɛli maa.

4Di daba ata dali ka Ibrahimma daa ti lihi nya o ni chani luɣ’ shɛli maa ka di be katiŋ’ ha.

5Di saha ka Ibrahimma daa yɛl’ o nachimba maa, “Ʒiɛnya buŋ’ ŋɔ sani, ka m mini bia ŋɔ chaŋ kpe ha ti jɛm Naawuni ka labina.”

6Ka Ibrahimma daa deei da’ shɛŋa o ni daa bo ni o ti mali bɛ ni zaŋdi sara shɛli nyɔri buɣim la n-ʒil’ o bia Yisahaku; ka omaŋmaŋ’ mi kpuɣi buɣim mini sua n-gbib’ o nuu ni; ka bɛ niriba ayi maa daa doli tab’ chana.

7Ka Yisahaku daa ti bol’ o ba Ibrahimma, “M ba!” Ka o garigi yɛli, “M bia, n-nyɛ ma” Ka o bɔh’ o, “Buɣim mini dari m-bɔŋɔ, ka piɛ’ so ti ni ti yɛn zaŋ mali sara maa lee be ya?”

8Ka Ibrahimma yɛl’ o, “M bia, Naawuni maŋmaŋ’ ni ti ti piɛ’ so ti ni yɛn zaŋ mali sara shɛli bɛ ni zaŋdi nyɔri buɣim maa.” Ka bɛ niriba ayi maa daa kul dol’ tab’ chana.

9Bɛ ni daa mali ti paai luɣ’ shɛli Naawuni ni daa wuh’ o maa, ka Ibrahimma me sara maligu bimbini zali nimaani, ka zaŋ dari maa pa di zuɣu viɛnyɛliŋga. Di saha ka o daa lo o bia Yisahaku maa mihi n-zaŋ o pa bimbini maa zuɣu dari maa zuɣu.

10Di nyaaŋa ka Ibrahimma daa teeg’ o nuu kpuɣi sua ni o kɔrig’ o bia maa.

11Amaa ka Yawɛ malaika daa be alizanda ni ka bol’ o, “Ibrahimma, Ibrahimma!” Ka o saɣi yɛli, “N-nyɛ ma.”

12Ka malaika maa yɛl’ o, “Miri ka a zaŋ a nuu shihi bia maa bee n-niŋ o shɛli; dama pumpɔŋɔ m baŋya ni a shiri zɔri Naawuni hal ka bi mɔŋ o a bigaŋ’ ŋɔ.”

13Ka Ibrahimma daa kpuɣ’ o zuɣu ŋmaligi lihi n-nya piɛlaa ka o ʒiɛya, ka o yila shɛbi tiwula ni. Ka Ibrahimma daa chaŋ ti gbaai piɛlaa maa na nti zaŋ o mali sara shɛli bɛ ni zaŋdi nyɔri buɣim la, ka chɛ o bia maa.

14Ka Ibrahimma daa boli nimaani yuli, “Yawɛ ni tahi na.” Ka niriba na kul booni li lala hal ni zuŋɔ. “Yawɛ zol’ la zuɣu, ŋun’ Yawɛ ni tahi na.”

15Ka Yawɛ malaika daa be alizanda ni ka boli Ibrahimma pahi buyi

16n-yɛli, “Man’ Yawɛ yɛliya ni a ni bi mɔŋ ma a bigaŋ’ ŋɔ zuɣu, n ni ŋmaligi po mmaŋa

17ni n ni niŋ alibarika niŋ a ni, ka chɛ ka a zuliya nabi m-be kaman saŋmarisi mini teeku noli bihigu la. Ka a zuliya maa ni ti deei bɛ dimnim’ tinsi su;

18ka dunia ŋɔ zuliya kam ni ti nya alibarika la bɛ zuɣu; a ni deei n noli maa zuɣu.”

19Ka Ibrahimma daa lab’ o nachimba maa sani ka o mini ba ti lab’ kuli Bɛrishiiba, ka Ibrahimma ti kpalim be nimaani.

20Dimbɔŋɔ nyaaŋa ka bɛ daa ti yɛli Ibrahimma, “Milika gba dɔɣi bihi ti a mabia Nahɔr.

21Uzi n-daa nyɛ o bi’ kpɛma, ka o mabihi nyɛ Buz mini Kɛmuɛl ŋun daa nyɛ Aram ba la

22ni Chɛsɛd ni Hazo ni Pilidash ni Jidilaf ni Bɛtuɛl.”

23Ka Bɛtuɛl mi daa dɔɣi Ribɛka. Bih’ anii ŋɔ ka Milika daa dɔɣi ti Nahɔr ŋun daa nyɛ Ibrahimma mabia maa.

24Ka Nahɔr mam ŋun yuli daa booni Riuma la mi daa dɔɣi Tɛba mini Gaham ni Tahash ni Maaka.

← Chapter 21 Jump to: Chapter 23 →