Genesis 50

Dagbani Bible (Naawuni Kundi Kasi)

← Chapter 49 Jump to:

1Di saha ka Yisifu daa va nti bɔb’ gbaag’ o ba n-kumdi ka mɔɣisir’ o kpariŋ.

2Di nyaaŋa ka Yisifu daa yɛl’ o tumtumdiba bɛn nyɛ tima baŋdiba ni bɛ niŋm’ tim ʒe o ba niŋgbuŋ ka di ku pooi. Ka tima baŋdiba maa daa niŋ tim ʒe Izraɛl niŋgbuŋ.

3Biɛɣu pihinahi ka bɛ daa zaŋ niŋ tim maa ʒe o niŋgbuŋ maa, dama bɛ ni daa yi zaŋdi dabisi’ shɛŋa n-tumdi di tuma m-bala. Ka Ijiptinim’ daa zaŋ biɛɣ’ pisopɔin kum o kuli.

4Bɛ ni daa zaŋ dabisi’ shɛŋa kum o kuli maa ni daa ti gari, ka Yisifu daa yɛli Firawuna yiŋnima, “N suhiri ya, yi nini yi tiɣi ma, yin’ yɛlimiya Firawuna

5ni m ba daa yɛli ma, ‘N saɣi kpibu; ka n yi ti kani, nyin’ zaŋm’ ma ti sɔɣi n ni daa gbi sil’ shɛli Keenan tiŋgbɔŋ ni ni bɛ ti zaŋ ma sɔɣi di ni la puuni; ka daa chɛ ka m-po di pɔri.’ Dinzuɣu pumpɔŋɔ, n-suhir’ o ni o chɛ ka n chaŋ ti sɔɣi m ba ka labina.”

6Ka Firawuna daa yɛl’ o, “Cham’ ti sɔɣ’ a ba kaman o ni daa chɛ ka a po ni a ni niŋ shɛm maa.”

7Ka Yisifu daa chaŋ ni o ti sɔɣ’ o ba. Ka Firawuna kpambaliba zaa min’ o yiŋ’ kpamba ni Ijipti ninvuɣ’ zuɣuri zaa

8m-pahi Yisifu yiŋnim’ zaa min’ o biɛyanim’ ni o ba yiŋnim’ zaa daa pahi Yisifu zuɣu ka bɛ chaŋ. Kulla bɛ bihi mini piɛri ni buhi ni niɣi kɔŋko n-daa kpalim be Goshɛn tiŋgbani maa ni.

9Ka chɛchɛbun’ duhiriba mini wɔribariba daa pahi dol’ o chaŋ. Niriba maa daa galisiya pam.

10Bɛ ni daa ti paai Atad kabɔɣili din be Jɔɔdɛn Mɔɣili dul’ la shee, ka bɛ daa duhi bɛ yee n-kum nandahima kumsi nimaani; ka Yisifu daa chɛ ka bɛ zaŋ daba ayopɔin kum o ba kuli nimaani.

11Keenannim’ bɛn daa nyɛ tiŋgbɔŋ maa nim’ ni daa nya ka bɛ kumdi Atad kabɔɣili maa shee maa, ka bɛ yɛli, “Nandahima titali kumsi ka Ijiptinim’ ŋɔ kumdi ŋɔ!” Dinzuɣu ka bɛ daa boli nimaani yuli Ɛbɛl Mizraim; ka di be Jɔɔdɛn Mɔɣili duli.

12Ka o bihi maa daa niŋ kaman bɛ ba ni daa zali ba shɛm.

13Bɛ daa ʒi o kuli Keenan tiŋgbɔŋ ni nti sɔɣ’ o siliga din daa be Makipɛla pu’ shɛli din be Mamri wulimpuhili polo la ni. Ibrahimma n-daa da siliga maa mini puu maa Ɛfurɔn ŋun daa nyɛ Hiti nir’ la sani n-leeg’ o dini ni di nyɛ o ni yɛn sɔɣir’ o kpiimba luɣ’ shɛli.

14Yisifu ni daa sɔɣ’ o ba maa nyaaŋa, ka o min’ o biɛyanim’ ni ninvuɣ’ shɛb’ bɛn zaa daa dol’ o chaŋ sɔɣibu maa shee maa daa lan lab’ Ijipti.

15Yisifu biɛyanim’ ni daa nya ka bɛ ba kpi maa ka bɛ yɛli, “Di pa shɛli ka Yisifu zaɣisi ti ka bɔhi ti biɛri ti ni daa niŋ o zaɣ’ biɛ’ shɛl’ la zuɣu.”

16Dinzuɣu ka bɛ daa tim tuumba Yisifu sani ti yɛl’ o, “Zaligu ŋɔ ka a ba daa zali ti pɔi ka naanyi kpi.

17Yɛlimiya Yisifu, ‘Jaande chɛl’ a biɛyanim’ ŋɔ ni daa tum’ a taal’ shɛl’ la.’ Pumpɔŋɔ, tinim’ bɛn nyɛ a yaannim’ Naawuni daba ŋɔ suhir’ a mi, chɛl’ ti ni daa tum’ a taal’ shɛli maa ti ti.” Bɛ ni daa zaŋ yɛtɔɣa ŋɔ yɛli Yisifu, o daa kummi.

18Ka o biɛyanim’ maa gba daa kana ti damd’ o tooni ka yɛli, “Ti nyɛla a daba.”

19Amaa ka Yisifu daa yɛli ba, “Di chɛliya ka dabiɛm mali ya, n ku tooi zaŋ mmaŋ’ zali Naawuni zaani.

20Yi daa lo ma la zaɣ’ biɛɣu, amaa ka Naawuni daa zaŋ li leei zaɣ’ suŋ ni di chɛ ka niriba pam ti tiligi kaman di ni nyɛ shɛm zuŋɔ dabisili ŋɔ.

21Dinzuɣu di chɛliya ka dabiɛm mali ya, n ni gbib’ yi mini yi bihi.” Lala ka o daa lan lo ba alikauli ka kpaŋsi bɛ suhuri.

22Ka Yisifu min’ o ba yiŋnim’ daa kul be Ijipti. Yisifu daa niŋla yuun’ kɔbiga ni pia dunia yili ŋɔ.

23Yisifu daa beni hal ti nya Ifriim bihi ni o yaantibichahi. O daa lan beni hal ti nya Manaasa bihi ni Makiri gba bihi n-zaŋ ba ʒil’ o naba zuɣu.

24Ka Yisifu daa ti yɛl’ o zuliya maa, “N saɣi kpibu; amaa Naawuni ni ti ka yi sanna nti yihi ya tiŋgbɔŋ ŋɔ ni n-zaŋ ya kulisi o ni daa po pɔri n-zaŋ tiŋgbɔn shɛli ti Ibrahimma mini Yisahaku ni Yaakubu la ni.”

25Di saha ka Yisifu daa yɛli Izraɛlnim’ maa, “Naawuni yi ti yihi ya tiŋgbɔŋ ŋɔ ni, yin’ ʒimiya n kɔba mali kuli;” ka daa chɛ ka bɛ po di pɔri.

26Ka Yisifu daa ti kpi, ka bɛ niŋ tim ʒe o niŋgbuŋ n-zaŋ o niŋ kum adaka ni Ijipti. O daa niŋ dunia yil’ la yuun’ kɔbiga ni pia.

← Chapter 49 Jump to: