Genesis 34

Dagbani Bible (Naawuni Kundi Kasi)

← Chapter 33 Jump to: Chapter 35 →

1Dahin shɛli ka Daina ŋun daa nyɛ Yaakubu mini Liya bipuɣiŋga la daa ti chaŋ ni o ti puhi tiŋ’ maa ni paɣiba;

2ka Hamɔr ŋun daa nyɛ Hivi nira, ka lan nyɛ tiŋ’ maa ni naa la bia Shɛkɛm daa nya o gbaag’ o ti zaŋ o saɣim dih’ o vi.

3Ka o suhu daa gbaai Daina Yaakubu bipuɣiŋga maa pam, ka o daa tɔɣis’ o yurilim mini suhumahili yɛtɔɣa.

4Ka Shɛkɛm daa yɛl’ o ba Hamɔr, “Bom’ paɣisarili ŋɔ ti ma ka n niŋ m paɣa.”

5Ka Yaakubu daa wum ni Shɛkɛm saɣim’ o bipuɣiŋga Daina, amaa ka o daa di suɣilo shini hal ka o bidibisi bɛn daa mali niɣi be mɔɣu ni la ti kuna.

6Ka Shɛkɛm ba Hamɔr daa kana ni o ti tɔɣisi Yaakubu di yɛtɔɣa.

7Ka Yaakubu bidibisi maa daa yi mɔɣu ni na ti wum li ka bɛ suhu yiɣisi ka bɛ je suli; Shɛkɛm ni daa tum jɛrilim Izraɛl tiŋgbɔŋ ni n-zaŋ Yaakubu bipuɣiŋga saɣim maa zuɣu. Dama di daa bi simdi ni lala niŋ.

8Ka Hamɔr daa yɛl’ o, “M bia Shɛkɛm bɔr’ a bipuɣiŋga, n suhir’ a, zaŋm’ o ti o ka o niŋ o paɣa.

9Chɛ ka ti mini ya kpuɣiri tab’ bihi niŋdi ti paɣiba. Zaŋmiya yi bipuɣinsi tiri ti, ka kpuɣimi ti gba bipuɣinsi niŋdi yi paɣiba.

10Kpalimmiya be ti sani. Yi ni tooi be yi suhuri ni bɔri ni yi be luɣ’ shɛlikam tiŋgbani ŋɔ ni, ka gɔri kɔhigu yi yubu, ka su tiŋgbani maa luɣ’ shɛŋa polo.”

11Di saha ka Shɛkɛm gba daa yɛli Daina ba min’ o tizɔdɔbba maa, “Yi yi saɣi ti ma, n ni tin ya yi ni kul yɛli ni yi bɔri shɛlikam.

12Wuhimiya ma yi paɣ’ bɔbo puhigu liɣiri ni nyɛ shɛm, ka yi yi ni saɣi ka n kpuɣ’ o, n ni tin ya yi ni kul yɛli ni n tin ya shɛm zaa.”

13Shɛkɛm ni daa dihi Yaakubu bidibisi maa tizɔpaɣ’ Daina vi maa zuɣu, ka bɛ daa garigi Shɛkɛm min’ o ba Hamɔr yɔhiŋgu garigibu.

14Bɛ daa yɛli ba mi, “Ti ku tooi zaŋ ti tizɔpaɣ’ ti ninvuɣ’ so ŋun bi guni, dama lala nyɛla vi ti sani.

15Amaa yɛl’ yini n naɣ’ beni ka ti ni bɔri ni yi niŋ li pɔi ka ti naanyi saɣi, dina n-nyɛ: yi chɛ ka yi dɔbba zaa guni m-be kaman tinima.

16Di nyaaŋa ka ti ni saɣi zaŋdi ti bipuɣinsi tiri ya, ka ti gba kpuɣiri yi bipuɣinsi, ka kpalim be yi tiŋgbani ŋɔ ni ka ti mini ya leei ninvuɣ’ yinsi.

17Amaa yi yi ku saɣi guni kaman ti ni yɛli shɛm maa, dindina ti ni zaŋ ti bipuɣiŋga maa yiɣisi chaŋ.”

18Ka bɛ ni daa yɛli shɛm maa daa niŋ Hamɔr min’ o bia Shɛkɛm nyaɣisim pam.

19Ka nachimbil’ maa daa guni yomyom, dama o suhu daa yu’ Yaakubu bipuɣiŋga maa hal ti yaɣi. O daa nyɛla yulilana o daŋ ni.

20Di saha ka Hamɔr min’ o bia Shɛkɛm daa chaŋ tiŋ’ maa dunol’ ni nti yɛli tiŋ’ maa ni dɔbba,

21“Niriba ŋɔ nyaŋ ninvuɣ’ maŋa pam, chɛliya ka ti chɛ ba ka bɛ be tiŋgbani ŋɔ ni n-gɔri kɔhigu bɛ yubu, dama tiŋgbani ŋɔ galisiya pam; ka chɛ ka ti kpuɣiri bɛ bipuɣinsi; ka ti gba zaŋdi ti bipuɣinsi tiri ba.

22Amaa ti yi bɔri ni bɛ be ti sani ka ti mini ba nyɛ ninvuɣ’ yinsi, faashee ka ti dɔbba zaa guni m-be kaman bɛ ni be shɛm.

23Ti yi saɣi ka bɛ be ti sani, bɛ niɣi mini bɛ binshɛɣukam ni bɛ biŋkɔbiri zaa ku leei ti dini?”

24Ka bɛnkam zaa daa yi n-chaŋ tiŋ’ maa dunol’ ni maa daa saɣi Hamɔr min’ o bia Shɛkɛm ni yɛli shɛm maa; ka dɔbba bɛn zaa daa yi n-chaŋ bɛ tiŋ’ maa dunol’ ni maa daa guni.

25Di daba ata dali, niriba maa gunibu maa yuma ni daa na biɛri saha shɛli maa, ka Yaakubu bidibis’ ayi, Simiɔn mini Lɛvi bɛn daa nyɛ Daina tizɔdɔbba la daa zaŋ takɔbiri chaŋ ti liri tiŋ’ maa nima n-libigi ba ku bɛ dɔbba zaa.

26Bɛ daa ku Hamɔr min’ o bia Shɛkɛm gba, ka zaŋ Daina Shɛkɛm yiŋa n-chaŋ bɛ chandi.

27Ka Yaakubu bidib’ shɛb’ bɛn kpalim daa chaŋ ti kpe tiŋ’ maa puuni n-di nɛma bɛ tizɔpaɣ’ maa zuɣu.

28Bɛ daa gbahi bɛ biŋkɔbbaligu mini niɣi ni bunsi, ka zaŋ binshɛlikam zaa din be tiŋ’ maa puuni mini din be mɔɣu ni

29ni bɛ daazichi zaa ni bɛ paɣiba mini bɛ bihi ni binshɛɣukam din daa be bɛ yinsi zaa chaŋ.

30Di saha ka Yaakubu daa yɛli Simiɔn mini Lɛvi, “Yi bo yɛla ti ma, di ni chɛ ka jɛlinsi kpe m mini tiŋgbɔŋ ŋɔ ni nim’ bɛn nyɛ Keenannim’ mini Pɛrizinim’ ŋɔ sunsuuni, ka m mi niriba bi zooi. Bɛ yi laɣim kana ti liri ma, bɛ ni ku m mini n nyaaŋa zaa.”

31Amaa ka bɛ yɛl’ o, “Bɔzuɣu ka bɛ niŋ ti tizɔpaɣ’ maa kaman pagɔrili n-nyɛ o maa?”

← Chapter 33 Jump to: Chapter 35 →