Genesis 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Ninsalinim’ ni daa ti piligi nabbu dunia ŋɔ ni saha shɛli, ka bɛ daa dɔɣi bipuɣinsi,

2ka zuɣusaa niriba daa nya ba ka bɛ viɛl’ pam, ka bɛ daa pii bɛ ni bɔri bɛ ni shɛba n-leei bɛ paɣiba.

3Ka Yawɛ daa yɛli, “N shia kul ku kpalim be ninsal’ ni sahakam, o nyɛla ŋun ni kpi, ka o yuma ni nyɛla yuun’ kɔbiga ni pisi.”

4Zuɣusaa niriba maa ni daa kpuɣi ninsalinim’ bipuɣinsi dɔɣi bihi saha shɛli mini di saha maa nyaaŋa ka tiyaawumyanim’ daa piligi be dunia ŋɔ ni. Bɛna n-daa nyɛ bɛn mali kpiɔŋ kurimbuni maa ha ni bɛn mali yuya.

5Ka Yawɛ daa ti nya ka ninsalinim’ ninvuɣ’ biɛtali galisi pam dunia ŋɔ ni, ka bɛ suhuri ni tɛha zaa kul nyɛla din bie sahakam.

6Ka di daa niŋ Yawɛ yoli, o ni daa nam ninsala n-niŋ dunia ŋɔ ni maa zuɣu; ka o suhu daa saɣim pam di zuɣu.

7Dinzuɣu ka Yawɛ daa yɛli, “N ni kpihim ninsal’ shɛba n ni daa nam niŋ dunia ŋɔ ni zaŋ tabili biŋkɔbiri mini biŋgbamda ni noonsi birili, dama di niŋ ma yoli pam n ni daa nam ba maa zuɣu.”

8Amaa Nuhu kɔŋko ka Yawɛ nini daa naɣ’ kul tiɣi.

9Nuhu zuliya m-bɔŋɔ: Nuhu daa nyɛla wuntizɔra ŋun jɛmdi Naawuni, ka ka galimi o ʒiɛman’ ni.

10Nuhu daa malila bidibis’ ata, bɛ yuya n-daa booni Shɛm mini Ham ni Jafɛt.

11Ka ninsalinim’ daa ti tumdi tuumbiɛri zaŋ chaŋ Naawuni sani, ka duŋ taabo daa kul be dunia ŋɔ ni luɣilikam zaa.

12Ka Naawuni daa nya ka tuumbiɛri n-kul be dunia ŋɔ ni, dama sokam zaa daa kul dolila tuumbiɛri soli.

13Ka Naawuni daa yɛli Nuhu, “N lo nia ni n kpihim ninsalinim’ zaa birili, dama bɛna n-chɛ ka tuumbiɛri pali dunia ŋɔ ni. Nyama, n ni kpihim bɛ birili dunia ŋɔ ni zaa.

14Bom’ sipirɛs dari din mali kpiɔŋ mali ŋariŋ, ka niŋ duri niŋ di ni, ka bo diɣiri n-tabilitabili di puuni mini di nyaaŋa.

15A ni yɛn mal’ li shɛm m-bɔŋɔ: Chɛ ka di wɔɣilim nyɛ mita kɔbiga ni pihitanaata; ka chɛ ka di yɛliŋ nyɛ mita pisinaayi, ka chɛ ka di dubu mi nyɛ mita pinaata.

16Bom’ binshɛli n-zaŋ pili ŋariŋ maa, ka chɛ ka di zuɣusaa dubu polo nyɛ sɛntimita pihinahinaanahi; ka chibi di dunoli di luɣili ni, ka kpahi li tambu buta tam taba.

17Dama nyama, n ni chɛ ka kokpɛɣu kpe dunia ŋɔ ni n-di vuhirigu kam zaa ŋun mali nyɛvili be dunia ŋɔ ni, ka binshɛɣukam zaa din be dunia ŋɔ ni kpi.

18Amaa nyini ka n naɣ’ ni lo alikauli. Zaŋm’ a paɣ’ min’ a bidibisi ni bɛ paɣiba n-kpe ŋariŋ maa ni.

19Ka lan zaŋ binnɛma balibu kam zaɣ’ lɔɣu ni zaɣ’ nyaŋ niŋ a sani ŋariŋ maa ni, ka lala niŋbu chɛ ka bɛ tiligi.

20Piimi noonsi balibu kam zaa, ka pii biŋkɔbiri balibu kam zaa, ka pii biŋgbamda balibu kam zaa. Bɛ zaa bɛba ayiyi ni kpe a sanna din ni chɛ ka bɛ ku kpi.

21Zaŋm’ bindira balibu kam gba n-niŋ ŋariŋ maa ni, ka di ti nyɛ a mini ba bindirigu.”

22Ka Nuhu daa niŋ Naawuni ni yɛl’ o ni o niŋ shɛm maa zaa.

← Chapter 5 Jump to: Chapter 7 →