Mark 14 — Ewe 2014 (EƲEGBE BIBLIA)

1Azɔ esusɔ ŋkeke eve ne Ŋutitoto kple Abolo Maʋamaʋã Ŋkeke Nyui la naɖo. Nunɔlagãwo kple agbalẽfialawo le mɔnu dim, ale si woawɔ alé Yesu le adzame, awu.

2Wogblɔ be: “Manɔ ŋkekenyui la dzi o, ne menye nenem o la, zi atɔ le dukɔ la me.”

3Esi Yesu le Betania le Simon kpodɔlela la ƒeme le nu ɖum la, nyɔnu aɖe tsɔ amigoe si wotsɔ kpe tɔxɛ wɔe, eye ami ʋeʋẽe nyui si xɔ asi ŋutɔ la le eme la ɖe asi vɛ. Nyɔnua gbã amigoe blibo la, eye wòtrɔ ami la kɔ ɖe tame na Yesu.

4Ke ameawo dometɔ aɖewo do dɔmedzoe gblɔ le wo ɖokui me be: “Nu ka ta wogblẽ ami xɔasi sia ale?

5Woate ŋu adzra ami ʋeʋẽe sia klosaloga alafa etɔ̃ kple edzivɔwo, eye woatsɔ ga la ana ame dahewo.” Wodo dɔmedzoe ɖe nyɔnua ŋu heka mo nɛ.

6Ke Yesu gblɔ be: “Miɖe asi le eŋu. Nu ka ta miele fu ɖem nɛ? Nu dzeame ŋutɔ wònye wòwɔ nam.

7Ame dahewo le mia gbɔ ɖaa; miate ŋu awɔ dɔmenyo na wo ɣe sia ɣi si mielɔ̃. Ke nye la, nyemanɔ mia gbɔ ɖaa o.

8Ewɔ eƒe ŋutete. Edo ŋgɔ va si ami na nye ŋutilã hena ɖiɖi.

9Mele egblɔm na mi le nyateƒe me, be xexeme ƒe afi sia afi si woaɖe gbeƒã Nyanyui la le la, woaƒo nu le nu si nyɔnu sia wɔ la hã ŋuti atsɔ aɖo ŋku edzii.”

10Yuda Iskariot, ame si nye ame wui eveawo dometɔ ɖeka la, ti nunɔlagãwo yii be yeade Yesu asi na wo.

11Esi woamawo se nyaa la, dzi dzɔ wo, eye wodo ŋugbe nɛ be yewoana gae. Ale Yuda le mɔnu dim ne yeadee asi.

12Le Abolo Maʋamaʋã Ŋkeke Nyui la ɖuɣi, ŋkeke gbãtɔ, si dzi wowua Paskalẽvi la le la, Yesu ƒe nusrɔ̃lawo biae be: “Afi ka nèdi be míadzra ɖo na wò be nàɖu Paska la le?”

13Tete Yesu dɔ eƒe nusrɔ̃lawo dometɔ eve, gblɔ na wo be: “Miyi ɖe dua me; ame aɖe si tsɔ tɔmedeze la ado go mi;

14midze eyome. Migblɔ na aƒetɔ si ƒe aƒeme wòage ɖo la be: ‘Nufiala be míabia be: Afi ka amedzroxɔ si me nye kple nye nusrɔ̃lawo míaɖu Paska la le la le?’

15Eya afia xɔ gã aɖe, si me woɖo nuwo ɖo xoxo la mi, le dziƒoxɔ dzi. Midzra afi ma ɖo na nuɖuɖua.”

16Nusrɔ̃laawo dze mɔ yi ɖe dua me. Wokpɔe pɛpɛpɛ abe ale si Yesu gblɔ na wo la ene, eye wodzra ɖo na Paska la.

17Esi fiẽsi ɖo la, eya kple ame wui eveawo va afi ma.

18Esi wole nua ɖum la, Yesu gblɔ be: “Nyateƒe tom mele na mi be mia dometɔ ɖeka si le nu ɖum kplim la ladem asi.”

19Wode asi nuxaxa me hele ebiam ɖekaɖeka be: “Nyeea?”

20Yesu gblɔ na wo be: “Mi ame wui eveawo dometɔ ɖekae. Amea le asi dem agba me kplim.

21Amegbetɔ Vi la aku godoo, abe ale si woŋlɔe ɖi le eŋuti la ene; gake baba na ame si adee asi la. Ne ɖe womegaxae dzi o la, anye ne enyo nɛ wu.”

22Esi wole nua ɖum la, Yesu tsɔ abolo, eye esi wòda akpe ɖe eta la, ekae eye wòtsɔe na nusrɔ̃laawo gblɔ be: “Mixɔe ɖu, esia nye nye ŋutilã.”

23Etsɔ wainkplu, eye esi wòda akpe to gbedodoɖa me ɖe eta la, etsɔe na wo eye wo katã wono wain le enu.

24Egblɔ na wo be: “Nye nubabla ƒe ʋu, si le kɔkɔ ge ɖe anyi ɖe ame geɖewo ta hena nuvɔ̃wo tsɔtsɔke.

25Mele egblɔm na mi le nyateƒe me be nyemagano wain aɖeke va se ɖe gbe si gbe maganoe le mawufiaɖuƒe la me o.”

26Esi wodzi akpedaha vɔ la, wodo go yi Amito la dzi.

27Yesu gblɔ na wo be: “Mi katã miele nuɖiaɖia kpɔ ge le ŋunye étò ƒe zã sia me. Elabe woŋlɔe ɖi be: ‘Mele alẽkplɔla la wu ge eye aleãwo katã laka ahlẽ.’

28Gake ne wofɔm ɖe tsitre agbagbee la, madze mia ŋgɔ ayi ɖe Galilea.”

29Petro xɔ edzi be: “Ne ame sia ame akpɔ nuɖiaɖia le ŋuwò hã la, nye ya nyemade megbe le ŋuwò o.”

30Yesu gblɔ nɛ be: “Mele egblɔm na wò le nyateƒe me be le zã sia me, hafi koklo naku atɔ zi eve la, àgbe nu le gbɔnye zigbɔzi etɔ̃.”

31Ke Petro gate gbe ɖe edzi vevie wu be: “Ne ahiã be maku kpli wò gɔ̃ hã la, nyemagbe nu le gbɔwò akpɔ o.” Nusrɔ̃laawo katã hã gblɔ nenema ke.

32Wova ɖo teƒe aɖe si ŋkɔe nye Getsemane. Yesu gblɔ na eƒe nusrɔ̃lawo be: “Mibɔbɔ nɔ afii ne maɖado gbe ɖa.”

33Ekplɔ Petro, Yakobo kple Yohanes kpe ɖe eɖokui ŋu. Dzidzi ƒoe, eye wòde asi dzodzo me nyanyanya.

34Egblɔ na wo be: “Nuxaxa yɔ nye ame blibo la me ale gbegbe be mebe maku gɔ̃. Minɔ afii eye minɔ ŋudzɔ.”

35Esi wòzɔ yi ŋgɔ ʋɛ la, edze klo tsyɔ mo anyi, eye wòdo gbe ɖa be, ne anɔ bɔbɔe la, fukpekpe ɣeyiɣi sia nato ye ŋu ayi.

36Egblɔ be: “Tɔ́nye lɔlɔ̃tɔ, àte ŋu awɔ nu sia nu; ɖe fukpekpekplu sia ɖa tso gbɔnye; ke menye nu si nye ŋutɔ medi la o, ke boŋ nu si wò nèlɔ̃ la neva eme.”

37Etrɔ va tu nusrɔ̃la etɔ̃awo wole alɔ̃ dɔm, eye wògblɔ na Petro be: “Simon, alɔ̃ dɔm nèlea? Mète ŋu nɔ ŋudzɔ gaƒoƒo ɖeka hɔ̃ hã oa?

38Minɔ ŋudzɔ, eye mido gbe ɖa be miagadze tetekpɔ me o. Gbɔgbɔ la le klalo, gake ŋutilã la ya gbɔdzɔ.”

39Yesu gadzo yi ɖado gbe ɖa hegblɔ nya mawo ke.

40Esi wògatrɔ va la, egakpɔ wo le alɔ̃ me elabe alɔ̃ bla woƒe ŋkuwo, eye womenya ale si woaɖe wo ɖokui nu o.

41Eva zi etɔ̃lia gblɔ na wo be: “Alɔ̃dɔdɔ dzi ko miegale le gbɔgbɔm ɖe emea? Esɔ gbɔ. Ɣeyiɣia de. Kpɔ ɖa, woade Amegbetɔ Vi la asi na nuvɔ̃wɔlawo.

42Mifɔ, mina míadzo! Kpɔ ɖa, ame si le yonyeme mɔ fiam la gogo!”

43Mekpɔ ɖe nu le nya la me hafi Yuda, ame si nye ame wui eveawo dometɔ ɖeka la va do o. Ameha, si nunɔlagãwo kple agbalẽfialawo kpakple dumegãwo di kpe ɖe eŋu la le eyome; wotsɔ yi kple kpo ɖe asi.

44Ame si dee asi la ɖo dzesi aɖe da ɖi na ameawo be: “Ame si ƒe nu magbugbɔ lae nye ame la; milée, mikplɔe yii eye miaƒe ŋku nanɔ eŋu.”

45Esi Yuda va ɖo la, ete ɖe Yesu ŋu enumake gblɔ be: “Nufiala!” eye wògbugbɔ nu nɛ.

46Ameawo ƒe asi su edzi eye wolée.

47Ke ame siwo tsi tsitre ɖe afi ma la dometɔ ɖeka ɖe eƒe yi le aku me hedzá nunɔlagã ƒe dɔla, eye wòkpa to nɛ.

48Yesu gblɔ na amehaawo be: “Ŋunyee mietso ɖo kple yi kple kpo be yewoava lé abe adzodala enea?

49Gbe sia gbe menɔ mia dome, fia nu le mawuxɔa me, gake mielém kpɔ o. Esia dzɔ bene nya si woŋlɔ ɖi la nava eme.”

50Tete eƒe nusrɔ̃lawo katã gblẽe ɖi hesí dzo.

51Ɖekakpui aɖe si ta aklalanyimlɔvɔ ɖeɖe ko la dze Yesu yome.

52Ameawo dze edzi be yewoalée; ke egblẽ avɔ la ɖe elélawo si me hesí dzo amamae.

53Wokplɔ Yesu yi ɖe nunɔlagã la gbɔ, eye nunɔlagãwo, dumegãwo kple agbalẽfialawo katã va ɖi anyi.

54Petro le eyome ʋĩi heva keke nunɔlagã la ƒe akpata me. Ebɔbɔ nɔ dɔlawo dome nɔ dzo ƒum.

55Nunɔlagãwo kple ʋɔnudrɔ̃lawo katã di ɖaseɖiɖi si woatsɔ atso Yesu nu bene woatso kufia nɛ, ke womekpɔ ɖeke o.

56Ame geɖewo ɖi aʋatsoɖase le eŋuti, ke wo dometɔ aɖeke ƒe ɖaseɖiɖi mesɔ kple nɔvia tɔ o.

57Ame aɖewo tsi tsitre heɖi aʋatsoɖase gblɔ le Yesu ŋu be:

58“Míese wògblɔ be: ‘Magbã mawuxɔ sia, si wotu kple asi la, eye matsɔ ŋkeke etɔ̃ atu bubu asi manɔmee.’ ”

59Ke ame siawo hã ƒe ɖaseɖiɖi mesɔ ɖe wo nɔewo tɔ dzi o.

60Nunɔlagã la tso ɖe tsitrenu le ameha la dome hebia Yesu be: “Nya si ame siawo tsɔ ɖe ŋuwò ɖe, màɖe ɖokuiwò nu oa?”

61Ke Yesu zi kpi; meɖo nya aɖeke ŋu o. Nunɔlagã la gabiae be: “Wòe nye Kristo, Yayratɔ la Via?”

62Yesu ɖo eŋu be: “Nyee. Miakpɔ Amegbetɔ Vi la wòabɔbɔ nɔ Ŋusẽtɔ la ƒe ɖusime. Miakpɔe wòagbɔna le dziƒolilikpowo me.”

63Tete nunɔlagã la dze eƒe awu dɔmedzoetɔe hebia be: “Ɖasefo aɖe gahiã le nya sia mea?

64Miese eƒe busunya la. Nu kae nye miaƒe susu?” Ameawo katã bu fɔe gblɔ be edze na ku.

65Ame aɖewo de asi taɖeɖe me ɖe eŋu, ɖewo tsyɔ nu mo nɛ, eye wotu kɔe hebiae be: “Ame kae ƒo wò? Yɔe na mí!” Dzɔlawo hã ya asi ɖee.

66Ɣe ma ɣi la Petro nɔ akpata me le mɔ́ la me. Nunɔlagã la ƒe nyɔnudɔlawo dometɔ ɖeka va afi ma.

67Esi wòkpɔ Petro wòle dzo ƒum la, elé ŋku ɖe eŋu dũu hegblɔ be: “Wò hã ènɔ Yesu Nazaretetɔ la gbɔ.”

68Ke Petro sẽ nu gblɔ be: “Nyemenya naneke le nya si gblɔm nèle la ŋu o, eye nyemese egɔme hã o.” Edo go yi ɖe akpata la ƒe agbo nu lɔƒo.

69Nyɔnudɔla la gakpɔe, eye wògade asi gbɔgblɔ me na ame siwo le tsitre ɖe afi ma la be: “Wo dometɔ ɖekae nye ame sia.”

70Ke Petro gasẽ nu ake. Eteƒe medidi o, nukpɔla siwo tsi tsitre ɖe afi ma la gblɔ na Petro be: “Nyateƒe, wo dometɔ ɖeka nènye vavã, elabe Galileatɔ wò hã nènye.”

71Ke ede asi fiƒodenyawo gbɔgblɔ me heka atam ƒu edzi gblɔ be: “Ne menya ŋutsu sia, si ƒe nya gblɔm miele la fĩi!”

72Enumake koklo ku atɔ zi evelia. Petro ɖo ŋku nya si Yesu gblɔ nɛ be: “Hafi koklo naku atɔ zi eve la, àgbe nu le gbɔnye zigbɔzi etɔ̃” la dzi. Esi wòva eɖokui me la, ewó avi.