Ecclesiastes 12

Galacian 1989 (Biblia SEPT)

← Chapter 11 Jump to:

1Lembra ó teu creador nos anos mozos antes de que cheguen os días malos e te atopes cos anos dos que dirás: "Non sinto pracer neles"!

2Antes de que se atolde o sol e a luz, a lúa e as estrelas, e retornen as nubes trala chuvia;

3o día en que treman os gardiáns da casa e se dobren os fortes, e deixen de moer as muiñeiras, que serán poucas, e escurezan os que ollan desde as fiestras.

4Cando se pechen os portóns que dan á rúa, e esmoreza o fungar do muíño convertido en rechouchío de paxaros, e se esgoten os cantares;

5Darán espanto mesmo os tropezos do chan e amedrentaranse as rúas. Cando floreza a amendoeira e o saltón se pouse e non teña a alcaparra o seu amargor, porque o home camiña para a morada eterna e xa roldan polo adro as carpideiras.

6Antes de que crebe o fío de prata e rompa o pichel de ouro e quebre a cántara na cisterna e se fenda a roldana no pozo;

7e torne o po á terra que antes era, e volva o espírito cara a Deus, que o deu.

8Nada máis ca un sopro, di Qohélet, todo é un sopro!

9Qohélet, amais de ser Sabio, ensinou ó pobo o que sabía. Recolleu, examinou e recompuxo moitos ditos.

10Procuraba Qohélet dar coas verbas asisadas, escribindo con xeito palabras verdadeiras.

11"As sentencias do Sabio son coma aguilladas; e cravos ben afincados o que se atopa nas escolmas, cando os presenta o Pastor en persoa".

12Por enriba de todo, meu fillo, déixate aconsellar: o moito escribir libros non ten fin, e o moito matinar fatiga o corpo.

13Conclusión de todo o escoitado: Ti teme a Deus, e garda os meus mandatos, pois iso é ser home cabal;

14xa que Deus vai levar a xuízo todas as accións, aínda as ocultas, sexan boas ou malas.

← Chapter 11 Jump to: