Hosea 1

Galacian 1989 (Biblia SEPT)

Jump to: Chapter 2 →

1Palabra do Señor que lle veu a Oseas, fillo de Beerí, durante os reinados de Ozías, Iotam, Acaz e Ezequías, reis de Xudá, e durante o reinado de Ieroboam, fillo de Ioax, rei de Israel.

2Comezo da palabra do Señor a Oseas. Díxolle o Señor a Oseas: "Vai, escolle para ti unha muller dada á prostitución, e xera fillos de prostitución, pois o país estase prostituíndo, deixando de ir tralo Señor".

3Entón foi e colleu a Gomer, filla de Diblaím, que concibiu, e deulle a luz un fillo.

4Daquela, díxolle o Señor: "Ponlle de nome Iezrael, porque dentro de pouco pedireille contas á casa de Iehú do sangue vertido en Iezrael e porei fin ó seu reinado na casa de Israel.

5Sucederá no día aquel, que romperei o arco de Israel, no val de Iezrael".

6Volveu ela a concibir, e deu a luz unha meniña, e o Señor díxolle a el: "Ponlle de nome Non Compadecida, pois non volverei seguir compadecéndome da casa de Israel, senón que lles retirarei completamente (a miña compaixón).

7(Pero compadecereime da casa de Xudá e farei que se salve grazas ó Señor, seu Deus, e non grazas ó arco, nin grazas á espada, nin grazas á guerra, ós cabalos e cabaleiros)".

8Cando ela destetou a Non Compadecida, concibiu e deu a luz un fillo.

9Entón o Señor díxolle: "Ponlle de nome Non meu pobo, porque vós non sodes o meu pobo, e eu son Non estou aquí para vós".

Jump to: Chapter 2 →