Acts 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Pe ambue kuatiañe’ẽme amombe’uva’ekue ndéve Teófilo, opaite mba’e Hesu rekove rehe, Ha’e onace guive, umi mba’e ombohekova’ekue, ha umi milágro ojapova’ekue,

2ojehupi peve Ha’e yvágape. Hesu ojehupi mboyve omombe’uka pe evangélio ijapostolkuéra rupive, Ha’e oiporavova’ekue Pytu Porãmbáva rupi.

3Hesu ojehechaukava’ekue ijapostolkuérape 40 ára pukukue Ñanderuete omoingove jevy rire ichupe, ha ojehupi mboyve yvágape, ha umi ára umívape ohekombo’e porãva’ekue ichupekuéra umi mba’e ndoikuaa porãiva gueteri Ñanderuete retãguasu rehegua rehe.

4Ha oñembyatypa jave hemimbo’ekuéra Hesu he’i ichupekuéra: Ani hag̃ua osẽ Jerusaléngui Ñanderuete ombou peve pe Pytu Porãmbáva, Ha’e oprometemava’ekue Che ha’e haguéicha peẽme.

5Juan Bautísta obautizava’ekue ýpe, peẽ katu pejebautizava’erã pe Pytu Porãmbávape mbovymi ára riremínte.

6Ha oñembyatypa jave hikuái oporandu Hesúpe: Ore Jára, remopu’ã jevýtapa Israel retã ko’ã ára ko’ãvape.

7Hesu katu he’i ichupekuéra: Ndaijái peẽme peikuaa hag̃ua umi ára umíva térã pe ára Ñanderuete oiporavomava’ekue ohechauka hag̃ua ipu’aka.

8Opáichavo oñeme’ẽta peẽme pu’aka, ou vove pende’ári pe Pytu Porãmbáva, ha peẽ peikóta che rechaharekuéra ramo Jerusalénpe, opaite Juda departaméntope, Samáriape ha yvy rugua pahaite peve.

9Ha Hesu he’ipávo ko’ã ñe’ẽ kóva, ojehupi ichupe yvágape hemimbo’ekuéra resa renondégui ha peteĩ arai omo’ã ichupe ojupívo.

10Ha oma’ẽ jave hikuái Hesúre ojupi ohóvo yvágape, oñemboja sapy’a mokõi ángel ijao morotĩva hendapekuéra,

11ha he’i hikuái: Peẽ, kuimba’e Galiléa pegua mba’érehepa pema’ẽpeína ára rehe, peẽ pehecha haguéicha ko Hesu ojehupi pende apytégui yvágape, peichaite ou jevyva’erã.

12Upérõ oguejy hikuái pe cérro Olivotýgui ha oho Jerusalénpe. Pe cérro opyta 1000 métro rupi Jerusaléngui, péva pevénte Israelguakuéra ikatu oguata sábado jave ramo.

13Ha og̃uahẽvo Jerusalénpe ojupi hikuái pe óga kotyguasu yvatépe, oikohápe hikóni: Pédro, Jacóbo, Juan, Andres, Felípe, Tomas, Bartolome, Matéo, pe ambue Jacóbo, Alféo ra’y, Simon, pe Zelotekue, ha Júdas, Jacóbo ra’y.

14Ha’ekuéra oĩ peteĩ ñe’ẽme oñembo’e py’ỹiete umi kuñakaraikuéra ndive: María, Hesu sy, ha Hesu ryvykuéra ndive avei.

15Umi ára umívape, Pédro opu’ã hermanokuéra apytépe, oñembyatýva hikuái 120 rupi, ha he’i ichupekuéra:

16Che hermanokuéra ojehuva’erã pe ñe’ẽ ojehai háicha Ñanderuete kuatiañe’ẽme ha pe Pytu Porãmbáva he’iukava’ekue Júdas rehe David juru rupi: Júdas voi omoakãva’ekue Hesúre ija’e’ỹvakuérape oapresa hag̃ua ichupe, (Salmokuéra 41,10).

17Júdas ojepapava’ekue avei ore apostolkuéra apytépe omba’apo hag̃ua ore irũ ramo.

18Ha’ekuéra ojoguava’ekue ipy’ajoyvy repy rehe (traicion repy rehe) peteĩ yvy pehẽngue, ha ho’a oakãvo, okapu mbyte rupi ha hyekue oñehẽmba.

19Ko mba’e kóva oñemombe’u opaite Jerusalenguakuéra apytépe, ha pe yvy pehẽngue oñembohéra Israelgua ñe’ẽme Acéldama, he’iséva Tuguy Ñu.

20Ojehai voi ningo: Hogakue topyta nandi, ha anive ojeiko ipype, ha hembiapo rãngue toñembohasa ambuépe, (Salmokuéra 69,26 109,8).

21Upévare ningo ojeporavova’erã Júdas rendaguépe peteĩme ñande apytégui, ñanemoirũva’ekue avei jaiko aja Hesu ndive,

22Ha’e ojebautiza guive Juan po rupi, upe ára ojehupi peve yvágape. Peichaguámante ikatu omombe’u Ñandejára oikove jevyha avei ikatu opyta techahare añeteguáva ramo.

23Peichagua kuimba’e mokõinte oĩ: Jose, oñembohérava avei Barsabas, ha héra jo’a katu Jústo (Heko Potĩva), ha upéi Matías.

24Oñembo’évo he’i hikuái: Nde, ore Jára, reikuaa porãmba opavave py’apýpe oĩva guive, ehechaukamína oréve mávapepa ko’ã mokõigui Nde reiporavo,

25oiko hag̃ua ore apostolkuéra apytépe ha oñeme’ẽ hag̃ua avei ichupe pe apóstol rembiaporã Júdas rendaguépe, ha’e ojeímagui ore apytégui oho hag̃ua hendag̃uáme.

26Ha oity hikuái hesekuéra po’a, ha pe po’a ho’a Matías rehe, ha upe ára guive ojepapa avei ichupe apóstol ramo, umi ambue 11 apostolkuéra ndive.

Jump to: Chapter 2 →