Acts 25

Guarani 2015 (Ñanderuete Ñe’ẽ Porã 2015)

← Chapter 24 Jump to: Chapter 26 →

1Fésto oiko rire Róma ruvicha ramo Juda departaméntope, oha’ãrõ mbohapy árante Cesaréape oho hag̃ua Jerusalénpe.

2Upérõ umi pa’i ruvicha ha umi Juda karai ancianokuéra ou Fésto rendápe oñe’ẽvai hag̃ua Páblo rehe.

3Ha ojerure asy hikuái Féstope, ha’e ogueruka hag̃ua Páblope Jerusalénpe, ha’e ombojovake hag̃ua Páblope ijapytepekuéra. Oñembopy’apeteĩ jevy hikuái omoñuhã ha ojuka hag̃ua Páblope tapére.

4Fésto katu he’i ichupekuéra Páblo opytataha Cesaréape, ha ha’e ohotaha avei ndahi’aréi upépe.

5Ha oime ramo umi mburuvicha Juda peguáva omoĩ vaiséva Páblope, toho hendive Cesaréape ha upépemante ambojovakéta Páblope Judayguakuéra apytépe.

6Fésto opyta Jerusalénpe 8 térã 10 ára ha upéi ojevy Cesaréape, ha ambue árape ohenoiuka Páblope oñembojovakeve hag̃ua.

7Ha Páblo oñemoĩ umi Judaygua okaguáiva (oacusáva) apytépe Jerusaléngui ouva’ekue, ko’ãva oñe’ẽ hese heta mba’evai, ndaikatúiva omoañete.

8Upérõ Páblo voi he’i ijehe: Che ndajapói mba’eve ivaíva Judayguakuéra reko rehe, Ñanderuete rogaguasu rehe, ni Róma retã ruvichaguasu rehe.

9Fésto ombovy’aségui Judayguakuérape oporandu Páblope ha he’i: Rehosépa Jerusalénpe che rombojovake hag̃ua upépe, jahecha hag̃ua máva ndivépa oĩ pe añetegua.

10Páblo katu ombohovái ichupe: Che ahase Róma retã ruvichaguasu rendápe ha’e chembojovake hag̃ua. Che ndajapói mba’eve ivaíva Judayguakuéra rehe, nde Fésto reikuaa porã voi ko’ã mba’e.

11Che ajapo rire mba’evaíva amano hag̃uáicha, che nambotoveiva’erãmo’ã che ñemanorã. Ha’ekuéra katu ndojohúi mba’eve ivaíva che rekovépe amano hag̃ua ko’ã ñe’ẽ rei rupi, ha avave ndaikatúi chemoĩ ipopekuéra, upévare che ahase Róma retã ruvichaguasu rendápe ha’e voi tachembojovake.

12Upémaramo Fésto oñemongeta rire hekombo’eharakuéra ndive he’i Páblope: Nde rejerurégui reñembojovake hag̃ua Rómape, nde rehóta Róma retã ruvichaguasu rendápe.

13Ohasa rire mbovymi ára ou Agrípa, Galiléa ha Peréa ruvicha, hembireko Bereníce ndive, omomaitei hag̃ua Féstope itáva Cesaréape.

14Heta ára Agrípa opyta Cesaréape ha upejave Fésto omombe’u ichupe oĩha gueteri peteĩ kuimba’e, Félix ohejava’ekue cárcelpe.

15Che aimérõ guare Jerusalénpe, umi pa’iguasu ha umi karai anciáno omyakãva Judayguakuérape ou che rendápe ha ojerure asy che ambojovake hag̃ua pe kuimba’e pévape omano hag̃ua.

16Che katu ha’e ichupekuéra: Romayguakuéra ningo ojepokuaa ojejuka mboyve peteĩme, oñeme’ẽ ichupe oportunidad ha’e voi oñe’ẽ hag̃ua ijehe ha ikatu hag̃ua ombohovái umi okaguaívape hese.

17Upéicha og̃uahẽvo hikuái ko’ápe, aha’ãrõ’ỹre pe ára ambuépe, aguapy ñembojovake rógape ha agueruka pe kuimba’e pévape.

18Ha umi ouva’ekue okaguai hag̃ua hese nde’íri mba’eve ivaietéva hese che aimo’ãva’ekue, (he’íne hag̃ua).

19Ha’ekuéra ojuavýnte Ijára jerovia rehe, ha pe kuimba’e péva, hérava Páblo, he’i oñemoingove jevyha Hesu Crísto omanova’ekue apytégui ha ambuekuéra ombotove péva.

20Ha che ndaikuaa porãigui ajapo’arã ko kuimba’e kóvare, aporandu Páblope ohosépa Jerusalénpe ha upépe che ambojovake hag̃ua ichupe ijapytepekuéra.

21Upémaramo Páblo he’i ohoseha Róma retã ruvichaguasu rendápe ha’e ombojovake hag̃ua ichupe. Ha upéi che añangareko porãuka Páblore cárcelpe, amondo peve ichupe Rómape.

22Upérõ Agrípa he’i Féstope: Che ahenduse avei pe kuimba’e pévape. Rehendúta ichupe ko’ẽrõ, he’i Fésto.

23Ambue árape ou Agrípa hembireko Bereníce ndive, heta jeguaka hetére, ha oike hikuái heta ambue karaiguasu ndive pe mbojovake rógape, upérõ Fésto ogueruka Páblope.

24Ha Fésto he’i: Nde, Agrípa, ha opaite kuimba’e peĩva guive ko’ápe orendive, pehecha ko kuimba’e kóvape. Judaygua atyguasu ojerure asy sapukáipe chéve, aimérõ guare Jerusalénpe, che ambojovake hag̃ua ichupe ojejuka hag̃uáicha hembiapokuére.

25Chéverõ g̃uarã ha’e ndojapói mba’eve ivaíva omano hag̃uáicha, ha Páblo voi ojerure oho hag̃ua Róma retã ruvichaguasu rendápe ha’e ombojovake hag̃ua ichupe, upévare che amondóta ichupe Rómape.

26Ndaguerekói katu mba’eve añeteguáva ikatúva ahai Róma retã ruvichaguasúpe g̃uarã, upévare agueruka Páblope peẽ karaikuéra renondépe ha nde, Galiléa departaménto ruvicha, Agrípa renondépe, reporandu raẽ hag̃ua, ajohu hag̃ua umi mba’e che ikatúva ahai tetã ruvichaguasúpe g̃uarã.

27Hi’ã ningo chéve mba’e itavýva, oñemondo ramo peteĩ ojepokuáva oñembojovake hag̃ua, oñemombe’u’ỹre hembiapokue.

← Chapter 24 Jump to: Chapter 26 →