Acts 28

Guarani 2015 (Ñanderuete Ñe’ẽ Porã 2015)

← Chapter 27 Jump to:

1Rojesalvapa riréma, roikuaa ko ísla hérava Málta.

2Ha umi Maltaygua py’aporã reheve oremog̃uahẽ imbohupa ramo, oky ha ro’ýgui tuicha ojatapy hikuái, rojepe’e hag̃ua.

3Ha Páblo ombyaty jepe’a ha oitývo tatápe osẽ peteĩ mbói, hakúgui ichupe, ha oisu’u Páblo po ha osãingo ipóre.

4Umi Maltaygua ohechávo pe mbói osãingoha ipóre he’i joa hikuái ojupe: Oiméne porojukahare ko kuimba’e kóva, ojesalva y pochýgui, opáichavo pe jehavira jára ndohejái oikove.

5Páblo katu oityvyro pe mbói tatápe, ha mba’eve ivaíva ndojehúi ichupe.

6Umi Maltaygua oha’ãrõ irurupa térã omano hag̃ua sapy’aitépe, ha oha’ãrõ are rire, ohecha ndojehuiha ichupe mba’eve ivaíva, oñemoambue ha he’i: Ha’e ningo peteĩ jára yvága pegua.

7Ijapytépe oiko pe Málta pegua mburuvicha, hérava Públio, ha’e ningo yvy tuicha jára, ha ha’e oremog̃uahẽ porã mbohapy ára hógape, imbohupa ramo.

8Públio ru iñakãnundu vai, hye ruguy ha oñenóva hupápe, ha Páblo oike rire ikotýpe oñembo’e ha omoĩ ipo pe hasýva ári, ha omonguera ichupe.

9Ojehu rire ko’ã mba’e, ambue Maltaygua hasýva guive ou avei ha oñemonguerapa.

10Umíva ningo oremomba’e heta jopói rupi, ha ome’ẽmba avei ore remikotevẽ ore viajerãme g̃uarã.

11Mbohapy jasy rire ore roike peteĩ barco guasúpe, ouva’ekue Alejandríagui, ha ohasava’ekue pe araro’y Málta puértope, ha pe barco guasu tĩre oñemoĩ mokõi ijára ra’ãnga Cástor ha Polux.

12Ha rog̃uahẽvo Siracúsape ropyta mbohapy ára.

13Siracúsagui rojere tuicha rog̃uahẽ meve Régiope. Peteĩ ára rire oipeju súrguio pe yvytu, ha pe ára ambuépe rog̃uahẽ Puteólipe.

14Ha upépe rojohu hermanokuérape, ha ropyta hendivekuéra 7 ára, ha upégui roho Róma gotýo.

15Romaygua hermanokuéra oikuaávo péva, osẽ orerug̃uaitĩ hag̃ua tapére, Ápio Foro ha Tres Tabérnas peve, ha Páblo ohechávo hermanokuérape oagradece Ñanderuetépe ha ikyre’ỹve jevy ohóvo.

16Ha rog̃uahẽvo Rómape, oñeme’ẽ Páblope permíso opyta hag̃ua peteĩ ógape ha’eño, peteĩ soldádo poguýpe oñangarekova’erãva hese.

17Páblo og̃uahẽ rire Rómape mbohapy ára rire ha’e ohenoiuka umi Juda karai ancianokuérape, ha oñembyaty rire, Páblo he’i ichupekuéra: Che ryke’ykuéra, ndajapói ramojepe mba’eve ivaíva ñane retã rehe térã ñande ru jepokuaakuéra rehe, ha’ekuéra chemoĩ Romayguakuéra pópe, ha aju Jerusalen guive Róma peve ko cadéna kóva reheve.

18Umi Romaygua oporandu porã rire chéve opaichagua mba’e, ha ndojohúigui cherehe mba’eveichagua ivaíva chejukauka hag̃ua opoise chehegui.

19Judayguakuéra katu oñemoĩ mbarete cherehe, upévare che ajerureva’erãmante Róma retã ruvichaguasu chembojovake hag̃ua. Che katu ndarekói mba’eve ivaíva ha’eva’erã che retãyguakuéra rehe.

20Upévare ningo che pohenoiuka avei, che pohecha ha añe’ẽ hag̃ua penendive, Israel jerovia ha esperánza rehe ningo añeñapytĩ ko cadéna kóvape.

21Ha’ekuéra ombohovái Páblope: Ore rendápe nog̃uahẽi Judágui peteĩ kuatiañe’ẽ térã peteĩ ñande ryvy oñe’ẽvaíva nderehe.

22Rohenduse katu nde jurúgui umi mba’e nde ereséva oréve, rohendu ningo oparupiete oñeñe’ẽvaiha ko Hesu Crísto rekombo’e kóva rehe.

23Aipórõ omoĩ hikuái ichupe peteĩ ára, ha hetave ou hikuái Páblo rendápe. Ha Páblo omombe’u ichupekuéra pyhareve guive ka’aru pytũete peve Ñanderuete rape ymaguare guive, Moises ha profetakuéra rekombo’e rupi ha ohechauka ichupekuéra Hesu ha’eha pe Crísto.

24Ijapytégui oĩ umi omoañetéva Páblo ñe’ẽ, ambuekuéra katu ndogueroviaiete.

25Ha ndaikatúigui oñembopy’apeteĩmba, Páblo he’i ichupekuéra ohokuévo iporã ningo ko Pytu Porãmbáva ñe’ẽ kóva:

26Tereho ha ere ko tetã kóvape: Pehendu porã ramojepe iñe’ẽ, ndapeikuaamo’ãi mba’épa he’ise. Ha pehecha porã ramojepe, ndapehechakuaamo’ãi, (Isaías 6,9-10).

27Ko tetã kóva ningo oñembopy’ahatã, omboty hikuái ijapysakuéra ha hesakuéra, ani hag̃ua ohecha hesa rupi térã ohendu ijapysa rupi, térã oentende hag̃ua ipy’apýpe ha ojevy hag̃ua Ñanderuete rendápe, Che asalva hag̃ua ichupekuéra.

28Upévare peikuaa porãke ko Hesu Crísto evangélio oñemombe’u tetã ambueyguakuérape, ha ha’ekuéra ojapysaka porãta.

29Ha Páblo he’ipávo ko mba’e kóva, umi Judayguakuéra osẽ hendágui, oñoñe’ẽjoapi mbarete katu oñondive hikuái.

30Páblo opyta mokõi áño peteĩ óga ojeporukava’ekue ichupe pirapire rehe (ojealquilávape), ha upépe ha’e omog̃uahẽ opaite oúvape hendápe.

31Ha Páblo py’aguasúpe ha ojejoko’ỹre ichupe omombe’u ichupekuéra Ñanderuete retãguasu ha Hesu Crísto evangélio oporosalváva.

← Chapter 27 Jump to: