Acts 21

Guarani 2015 (Ñanderuete Ñe’ẽ Porã 2015)

← Chapter 20 Jump to: Chapter 22 →

1Ha roheja rire ichupekuéra rojupi pe barco guasúpe ha roho ropia’ỹre Cos peve, ha pe ára ambuépe Ródaspe, ha upégui Pátara peve.

2Upépe rojohu peteĩ barco guasu ohótava Fenícia peve, ha rojupi ipype ha roho.

3Ore rohecha pe ísla Chípre, roheja katu ore asúpe ha roho Síria gotýo, ha rog̃uahẽvo Tírope, oñemboguejypa umi mba’e pe bárco oguerojáva.

4Ha rojohu rire ore hermanokuérape ropyta hendivekuéra 7 ára, umía katu he’i Páblope, Pytu Porãmbáva rupi, ani hag̃ua oho Jerusalénpe.

5Ha ohasa rire umi ára, roñembosako’i roho hag̃ua, ha’ekuéra oremoirũ hembirekokuéra ha imitãkuéra ndive Tíro oka peve. Roñesũ ha roñembo’e rire yguasu rembe’ýpe,

6roike pe barco guasúpe, ha’ekuéra katu ojevy hógape.

7Ha Tírogui rog̃uahẽ Tolemáidape, ha ropyta peteĩ ára ore hermanokuéra upepeguáva ndive.

8Pe ára ambuépe Páblo ha ore, iñirũnguéra, roho pe táva Cesaréa peve, ha rog̃uahẽ Felípe rógape, ha’e ningo omyasãi avei Hesu Crísto evangélio, ha’e umi 7 diácono apytégui peteĩva.

9Ha’e itajýra irundy omenda’ỹva gueteri ha oprofetizáva.

10Ore ropyta aremi rire hógape, og̃uahẽ Judágui peteĩ proféta, hérava Agábo,

11ha’e ou ore rendápe ha ojagarra Páblo ku’a jopyha, ojepykua ha ojepokua rire he’i: Péicha he’iuka Pytu Porãmbáva oñeñapytĩtaha avei ko ku’a jopyha járape, ha oñemoĩta tetã ambueyguakuéra pópe.

12Rohendúvo péva ore ha upepeguáva rojerure asy Páblope ani hag̃ua oho Jerusalénpe.

13Upérõ Páblo he’i: Mba’e piko pejapo, pene rasẽ rupi peẽ chembopy’a kangy. Che ningo aĩmba (lísto) ndaha’éi añeñapytĩ hag̃uáichante, amano hag̃uáicha avei Jerusalénpe, Hesu Crísto rehehápe.

14Ndaikatúigui rojoko, roheja ichupe ha ore ro’e: Toiko Ñanderuete rembipota nde rekovére.

15Umi ára rire roñembosako’ipa ha roho Jerusalénpe.

16Orendive oho avei Cesaréa pegua hermanokuéra, oreguerahátava Mnason rógape, ha’e peteĩ ojeroviáva Hesúre heta áñoma ha’e peteĩ Chipreygua, ha upépe roiko hag̃ua ore.

17Ha rog̃uahẽvo Jerusalénpe, ore hermanokuéra oremog̃uahẽ porã hogakuérape.

18Pe ára ambuépe Páblo oho orendive Jacóbo rendápe, ha upépe oñembyatypa hikuái iglésia karai ancianokuéra.

19Ha ore romomaiteipa rire ichupekuéra, Páblo omombe’u opaite mba’e Ñanderuete ojapova’ekue tetã ambueyguakuéra apytépe.

20Ha’ekuéra ohendupa rire omomba’eguasu Ñanderuetépe, ha he’i Páblope: Nde, hermáno Páblo, rehecha ningo Judayguakuéra apytégui milkuéra ojeroviáva Hesu Crísto rehe, ha opaite umía hakate’ỹ Moises rembiapoukapýre.

21Oñemombe’u ningo ichupekuéra nde rembo’eha opaite Judayguakuérape oikóva guive tetã ambueyguakuéra apytépe opoi hag̃ua Moises rembiapoukapýgui, ha ere hague ichupekuéra ani hag̃ua oikytĩ’ouka ita’ýra pire’i ha anive hag̃ua oiko ñande jepokuaaha poguýpe.

22Upévare, mba’épa jajapo’arã. Katuete ohendúta hikuái nde, Páblo, reju hague Jerusalénpe.

23Upévagui iporã rejapo ramo ore ro’étava ndéve: Oĩ orendive irundy kuimba’e, ojapova’erãva iñe’ẽ (vóto), ome’ẽmava’ekue Ñanderuetépe.

24Umía eraha nendive, eñemopotĩ hendivekuéra Moises rembiapoukapy he’i háicha, ha epagapa avei hesekuéra, peẽ peñemoakãperõ hag̃ua; péichamante oimeraẽva ohechakuaáta oñe’ẽ reiha nderehe umi mba’e, nde rejapoha hekópe uvei Moises rembiapoukapykuéra.

25Umi tetã ambueygua ojeroviávape katu ore rohaíma peteĩ kuatiañe’ẽ opoi hag̃ua ko’ã mba’e ko’ãvantegui: Ani ho’u pe so’o oñekuave’ẽva’ekue ambue járape, ani ho’u tuguy, ani ho’u pe ojejajuravokapyréva ha ani oiko oñondive omenda’ỹre.

26Upéicha Páblo ogueraha pe ára ambuépe hendive umi irundy kuimba’épe ha oñemopotĩ rire hendivekuéra Moises rembiapoukapy he’i háicha, oike hendivekuéra Ñanderuete rogaguasúpe, omomombe’u hag̃ua araka’épa opáta iñemopotĩ arakuéra ha araka’épa oimeraẽva ikatu oikuave’ẽ ikuave’ẽmby.

27Opapotávo umi 7 ára oñemopotĩ hag̃ua, umi Judaygua ouva’ekue Ásiagui ohechávo Páblope Ñanderuete rogaguasúpe, ha omboapañuãi opaite Israelguakuérape oñembyatýva guive upépe, ha oapresa hikuái Páblope,

28ha sapukáipe he’i hikuái: Kuimba’e Israelguakuéra, orepytyvõkena. Kóva ningo pe kuimba’e ombo’éva opa rupiete oñemoĩ hag̃ua Moises rembiapoukapykuéra rehe, Israelguakuéra ha ko Ñanderuete rogaguasu rehe. Ha hi’ári ko’ág̃a omoingéma avei Ñanderuete rogaguasúpe umi Greciaygua, ha péicha omongy’a Ñanderuete rogaguasu.

29Ha’ekuéra ohechágui, Jerusalen cállepe, Páblope ha hendive Trófimo, peteĩ Eféso pegua, ha oimo’ãnte hikuái Páblo omoinge hague avei ichupe Ñanderuete rogaguasúpe.

30Ha oiko peteĩ apañuãi ndetuicháva Jerusalénpe ha oapresa rire Páblope ombotyryry ichupe Ñanderuete rogaguasu oka gotýo ha pya’e ombotypa hikuái hokẽnguéra.

31Ojukava’erãmo’ã hikuái Páblope nohendúi rire pe soldádo ruvichaguasu pe sarambi ndetuicháva.

32Kóva pya’e oñani heta isoldadokuéra ndive Judayguakuéra apytépe, ha ko’ãva ohechávo ichupekuéra, noinupãvéi Páblope.

33Ha pe soldádo ruvicha og̃uahẽvo Páblo rendápe oñapytĩuka ichupe mokõi cadénape, ha oporandu ichupe mávapa ha’e ha mba’épa ojapóra’e.

34Ha tetãygua apytégui oĩ umi osapukáiva péicha ha ambue katu amóicha, ha ndaikatúi oikuaa pe añetegua pe sarambi oiko reívagui, upévare oguerahauka ichupe soldadokuéra rógape.

35Ha og̃uahẽmbotávo soldadokuéra rogaguasu renondépe, umi soldádo ohupi ichupe ijati’y ári, hetãygua atyguasu iñarõitereígui.

36Umi tetãygua ohóva hapykuéri osapukái: Tomano.

37Oike mboyve pe soldadokuéra rogaguasúpe, Páblo he’i pe soldádo ruvichaguasúpe: Ikatúpa añe’ẽmi nendive. Ha’e he’i ichupe: Reñe’ẽkuaa piko Greciaygua ñe’ẽme.

38Aipórõ nde piko ndaha’éi pe Egiptoygua ndahi’aréi oñemoĩva’ekue mburuvichaguasu rehe ha oho 4.000 jukahára ndive desiértope.

39Páblo ombohovái ichupe: Che ningo peteĩ Judayguáva, Tarsoygua, Cilícia departaméntogui, ajeruremi añe’ẽ hag̃ua che retãyguakuérape.

40Ha pe soldádo ruvichaguasu he’i: Eñe’ẽ katu, upémaramo Páblo oñembo’y pe okẽ renondépe ha ohupi ipo omokirirĩ hag̃ua hetãyguakuérape, ha okirirĩ porãmba rire ha’e oñe’ẽ Israelgua ñe’ẽme ichupekuéra.

← Chapter 20 Jump to: Chapter 22 →