Acts 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Páblo ha Bernabe oike jevy, ojepokuaa háicha, Ñanderuete rógape oĩva Icóniope, oñembyatyhápe Judayguakuéra ha tetã ambueyguakuéra, ha upépe omombe’u avei ichupekuéra Hesu Crísto evangélio, ha ojapysaka porã rire heta Judaygua ha tetã ambueygua ojerovia Hesu Crísto rehe.

2Ha umi Judaygua omboykéva Hesu Crísto evangélio, oñe’ẽvai Páblo ha Bernabe rehe, ha ombopochy umi tavayguápe hermanokuéra rehe.

3Upéicharamo jepe Páblo ha Bernabe hi’are upépe ha oñe’ẽ kyhyje’ỹre ha jeroviapópe Hesu Crísto evangélio rehe ha ijapytepekuéra ojehu mba’e techaukaha ha milagrokuéra Páblo ha Bernabe rupi.

4Ha umi tavaygua oñemboja’o hikuái, oĩ umi omoirũva Páblo ha Bernabépe, ha oĩ umi oñemoĩva hermanokuéra rehe.

5Umi Judaygua omboykéva Hesu Crísto evangélio oñemoĩ jevy Páblo ha Bernabe rehe ha ombopochy heta Iconioyguápe avei, upéi umi Judaygua oñembopy’apeteĩ mburuvichakuéra ndive ojuka hag̃ua itápe Páblo ha Bernabépe.

6Páblo ha Bernabe oikuaa vove péva okañy Lístra ha Dérbepe, mokõi táva Licaónia departaméntope oĩva.

7Upérupi ha ijerekuévo omombe’u hikuái avei Hesu Crísto evangélio.

8Lístrape oiko peteĩ kuimba’e ikatu’ỹva oguata, isy rye guive.

9Kóva ojapysaka porã Páblo ñe’ẽ rehe, ha Páblo oma’ẽvo hese ohecha ijerovia okuera hag̃uáicha.

10Upévare Páblo he’i hatã ichupe: Epu’ã, ha eñembo’y nde pykuéra ári, ha ha’e opu’ã ha oguata porã.

11Ha umi tetãygua ohechávo pe milágro Páblo ojapova’ekue he’i joa, iñe’ẽteépe: Jarakuéragui oiko kuimba’ekuéra ha oguejy ñane rendápe.

12Ha Bernabépe ombohéra hikuái ijára ruvicháicha Zéus (Júpiter), ha Páblope Hérmes (Mercúrio), kóva oguerahágui ijarakuéra ñe’ẽ yvyariguakuérape.

13Ha pe pa’i Zéus tupão pegua ogueru torokuéra ha akã jeguakakuéra ojejapóva yvyra rakã roguégui, pe táva rokẽguasu peve oikuave’ẽ hag̃ua hetãyguakuéra ndive Bernabe ha Páblope g̃uarã.

14Bernabe ha Páblo katu ohechakuaávo péva omondoro ijao ha ojeity umi Listrayguakuéra apytépe ha he’i sapukaipópe:

15Kuimba’ekuéra, mba’e piko pejapopeína. Ore ningo kuimba’e peẽichaguánte avei, ore romombe’únte peẽme pe salvacion rape pepoi hag̃ua pende jarakuéra ipu’aka’ỹvagui, pejevy hag̃ua yvága Jára Añeteguáva ha Oikovéva, Ñanderuete rendápe; Ha’e ningo ojapo pe yvága ha yvy, yguasu ha opaite mba’e oñemomýiva guive ipype, (Éxodo 20,11).

16Ñanderuete ningo yma oheja opaite tetã oguata hape rupi, ha oiko oikose háicha.

17Ha’e tapia ohechauka mba’eporã opaite tetãnguérape, Ha’e ombou yvágagui pe ama ha ára porã okakuaa hag̃ua pene ñemitĩnguéra, penemohyg̃uatã ha penembopy’a rorýva.

18Ha he’i rire ko’ã mba’e, hasýpe ojoko hikuái ani hag̃ua oikuave’ẽ ichupekuéra g̃uarã umi mba’e oguerúvagui.

19Upérõ og̃uahẽ jevy umi Judaygua Antioquía ha Icónio peguáva ha ombopochy avei Listrayguápe oñemoĩ hag̃ua avei Páblo ha Bernabe rehe, upémaramo ojapi hikuái heta ita Páblore, ojuka hag̃ua, ha ombotyryry hete táva okápe, oimo’ãgui Páblo omanóma hague.

20Ha Hesu Crísto reheguáva oñembyaty Páblo rete jerekuévo, peichaháguinte Páblo opu’ã, ha oike jevy Lístra távape. Ha pe ára ambuépe oho Bernabe ndive Dérbepe.

21Ha omyasãi rire avei Hesu Crísto evangélio pe távape, heta upepeguáva ojerovia avei Hesu Crísto rehe, upéi Páblo ha Bernabe ojevy Lístra, Icónio ha Antioquíape.

22Opárupi omokyre’ỹ hikuái hermanokuérape ha ohekombo’e ichupekuéra ojerovia mbareteve hag̃ua ohóvo, ha omombe’u porã avei ichupekuéra heta sufrimiénto (jehasa asy) rupi jaikeva’erã Ñanderuete retãguasúpe.

23Páblo ha Bernabe omoĩ rire karai ancianokuérape (opaite) iglésiape oñembo’e heta ha oajuna rire omoĩ opaite hermanokuérape (Hesu Crísto poguýpe).

24Páblo ha Bernabe ohasa Pisídia ha Panfília departamentokuéra rupi.

25Ha omoherakuã rire Hesu Crísto evangélio Pérgepe, oho hikuái Atáliape.

26Ha Atáliagui oho hikuái bárcope Antioquía gotýo. Antioquíape Ñanderuete voi ohenoiva’ekue ichupekuéra ñepyrũme omombe’u hag̃ua Hesu Crísto evangélio tetã ambueyguakuérape, ha ojapo hag̃ua ko tembiapo porã.

27Og̃uahẽvo Antioquíape ombyaty Hesu Crísto iglesiayguakuérape ha omombe’u hermanokuérape opaite mba’e Ñanderuete ojapova’ekue guive ha’ekuéra rupi, ha Ha’e oipe’a hague avei tetãyguakuérape g̃uarã pe okẽ ojerovia hag̃ua Hesu Crísto rehe.

28Ha Páblo ha Bernabe opyta are Antioquía, Síria peguápe.

← Chapter 13 Jump to: Chapter 15 →