Acts 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Opa rire pe apañuãi, Páblo ohenoiuka hermanokuérape, omokyre’ỹ hag̃ua ichupekuéra, ha oñoñañu’ãmba joa rire Páblo ojei ijapytégui oho hag̃ua Macedóniape.

2Oñandu rire Macedónia pegua iglesiakuérape, ha omokyre’ỹ rire ichupekuéra oho Grécia retãme.

3Ha’e opyta mbohapy jasy Greciaygua iglesiakuérape ha oikesévo peteĩ barco guasúpe oho hag̃uáicha Síriape, Páblo oikuaa umi Judaygua omoñuhãseha ichupe, upévare ha’e ojevy Síria retãme yvy rupi Macedónia retã rupi.

4Omoirũ ichupe Sópater, Bereaygua; Aristárco ha Segúndo, Tesalonicaygua; Gáio, Derbeygua; Timotéo, Tíquico ha Trófino, Asiaygua.

5Ko’ãva oñemotenonde, orera’ãrõ hag̃ua pe táva Tróaspe.

6Ore katu, ohasa rire pe arete oje’uhápe pan ilevadura’ỹre, rosẽ Filíposgui, ha rog̃uahẽ hendapekuéra Tróaspe ohasa rire 5 ára, ha ropyta upépe 7 ára.

7Peteĩ d omíngo árape ore roñembyaty romboja’o hag̃ua pan (pe céna del Señor Hesu Crísto reheguáva). Pe ára ambuépe Páblo ohose, upévare ha’e ombopukuve iñe’ẽ pyhare mbyte peve.

8Ha oĩ ningo heta tataindy pe koty yvatépe, ore roñembyatyhápe.

9Ha peteĩ karia’y, hérava Eutíco, oguapyvahína ovetãme hopehýi, Páblo oñe’ẽ pukuetereígui ha ipahápe okeite, ha peichaháguinte ho’a pe píso mbohapyhágui. Ha oñemopu’ãvo ichupe ojejohu, he’õnguéma.

10Upérõ Páblo oguejy ojeity hi’ári ha oñañu’ã ichupe ha he’i: Ani pejepy’apy, hi’ánga oĩ gueteri ipype.

11Upéi ha’ekuéra ojupi jevy ha omboja’o pe pan (céna del Señor Hesu Crísto reheguáva) ha péva rire oñemongeta gueteri ko’ẽmbapota peve, uperire ae Páblo oho.

12Ha ogueraha hikuái pe karia’ýpe hekove reheve, ha ipy’aguapypa hikuái opytávo.

13Ore katu roñemotenonde peteĩ barco guasúpe, Ason meve, upépe rojojohu jevy hag̃ua Páblo ndive, ha’e ohoségui yvy rupi Ason meve.

14Ore rog̃uahẽvo Asónpe, Páblo oike avei pe barco guasúpe, ha oho orendive Mitilénepe.

15Ha rosẽ rire Mitilénegui rohasa ambue árape Quío rovái rupi ha rohove rire peteĩ ára rog̃uahẽ Sámospe, ha upépe pe barco guasu oike Sámos puértope, ha ambue árape rog̃uahẽ Milétope.

16Páblo ndopytaséi Efésope, ani hag̃ua hi’are Ásiape, ha’e ikatúrõ og̃uahẽse Pentecóstes árape Jerusalénpe.

17Miléto guive Páblo ohenoiuka iglésia Efesoygua karai ancianokuérape.

18Ha og̃uahẽvo hendápe he’i ichupekuéra: Peẽ peikuaa porã mba’éichapa che aikova’ekue pende apytépe, ag̃uahẽ guive Ásiape.

19Che aservi Hesu Crístope ñemomirĩ (jejapo’ỹ) reheve, ha Judayguakuéra oñemoĩgui cherehe che ahupity heta jepy’ara’ã, añohẽ meve che resaykuéra.

20Opaichagua mba’eporã peikotevẽva amombe’upa peẽme taha’e pende atyguasúpe térã pende rógape.

21Aikuaauka Judayguápe ha tetã ambueyguakuérape mba’éichapa ojevyva’erã Ñanderuete rendápe ha mba’éichapa ojerovia añeteva’erã Hesu Crísto rehe.

22Ha ko’ág̃a pe Pytu Porãmbáva chemyaña aha hag̃ua Jerusalénpe, aikuaa’ỹre pe ojehútava chéve upépe.

23Opaite táva ahasaha rupi pe Pytu Porãmbáva oikuaauka chéve, jehasa asy ha cárcel chera’ãrõtaha.

24Che nambyasýi ahundíta ramojepe che rekove ko yvy ári, pe che aipotavéva katu: Ahupity hag̃ua pe tekove opa’ỹva ha che ajapopa pe tembiapo Hesu Crísto ome’ẽmava’ekue chéve, péva he’ise che amyasãi hag̃ua Hesu Crísto evangélio ha Ñanderuete mborayhu.

25Peikuaa porãke, chéverõ g̃uarã opaite peẽ ndapehechamo’ãveimaha che rova, pende apytépe aikova’ekue amombe’úvo Ñanderuete retãguasu rehe.

26Upévare peẽ che rechahare ko ára kóvape, chepotĩha opavave pende ruguýgui.

27Che ningo amombe’u peẽme opaite Ñanderuete rembipota añomi’ỹre mba’eve.

28Peñeñangareko porãke pendejehe ha opaite iglesiayguakuérare, pe Pytu Porambáva pendeporavómagui peiko hag̃ua iglésia anciáno ramo, upévare pemboguata porã Ñanderuete iglésiape, Ha’e ojoguava’ekue ita’ýra Hesu Crísto ruguy rupi.

29Che aikuaa voi, aha rire, oiketaha pende apytépe aguaraguasu ñarõ ha ndoheja reimo’ãi Hesu Crísto iglésia.

30Ha pende apytégui voi opu’ãta kuimba’e oñe’ẽtava mba’evai ogueraha hag̃ua hapykuéri umi ojeroviávape Hesu Crísto rehe jepe.

31Upévarehe peñeñangareko porãke, penemandu’ávo che pombo’e hague apytu’u’ỹre peteĩteĩme, ára ha pyhare, mbohapy áño pukukue, heta che resay peteĩteĩva ndive.

32Ha ko’ág̃a che pomoĩ Ñanderuete pópe ha imborayhu rehegua ñe’ẽ poguýpe, Ha’e ningo ipu’aka porã penemombarete ha ome’ẽ hag̃ua peẽme pene rendag̃ua Ñanderuete retãguasúpe opaite ambue ojeroviáva ndive Hesu Crístore.

33Che ndaipotaiva’ekue pende pláta, ni pende óro, ni pende ao.

34Peẽ peikuaa porã voi che po rembiapo rupi ahupity che remikotevẽ ha che irũnguéra remikotevẽ avei.

35Che voi ahechauka peẽme, ñañeha’ãmbava’erãha jahupity hag̃ua ñane remikotevẽ ha ñaipytyvõ hag̃ua ñande rapichakuéra oikotevẽvape, ha ñanemandu’a hag̃ua Hesu Crísto ñe’ẽ rehe, Ha’e he’iva’ekue: Ovy’aiteve upe ome’ẽva hapichápe, (upe ambuégui oha’ãrõva tapia pe pytyvõ hapichágui).

36Ha he’ipávo ko’ã mba’e, oñesũmba hikuái oñembo’e hag̃ua.

37Upérõ ojahe’o ha ojeity hikuái Páblo ajurakuápe ohetũ paha hag̃ua ichupe.

38Ombyasyeterei hikuái Páblo he’i haguére ndohechaveitaha hikuái hova. Ha upéi omoirũ ichupe pe barco guasu peve.

← Chapter 19 Jump to: Chapter 21 →

Recommended Reading

Commentary Acts Commentaries → Devotional Acts Devotional Guide → Get This Bible Guarani (Ñanderuete Ñe’ẽ Porã ) Study Bible →