Acts 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Upe árape mburuvicha Heródes oñepyrũ oapresauka Hesu Crísto reheguakuérape, ombohasa asy hag̃ua ichupekuéra cárcelpe.

2Ha’e ojukauka kyse pukúpe, Jacóbo, Juan ryke’ýpe.

3Ohechávo péva oguerohory hague heta Judayguakuérape, oapresa avei Pédrope, ha péva ojehu pan ilevadura’ỹva arete jave.

4Ha omoingévo cárcelpe oñangarekouka hese 16 soldádo ha pe páscua arete rire ohechauka hag̃ua ichupe hetãyguakuérape.

5Ha oñeñangareko porã aja Pédro rehe cárcelpe, hermanokuéra oñembo’e asy hese Ñanderuetépe, Ha’e oipytyvõ hag̃ua ichupe.

6Ha upe pyharépe, Heródes oguenohẽ mboyve Pédrope cárcelgui, Pédro okehína mokõi soldádo pa’ũme ha oñeñapytĩ ichupe mokõi cadénape ha pe cárcel rokẽme oĩ avei ambue soldadokuéra oñangarekóva hese.

7Ojehecha sapy’a peteĩ ángel Ñanderuete omboúva Pédro rendápe tesape rendýpe, omombáy Pédrope opokóvo ijyképe, he’ívo ichupe: Pya’e epu’ã, ha upevovete umi cadéna ho’a rei ipokuéragui.

8Upéi pe ángel he’i: Emoĩ nde ku’a jopyha emonde nde sapatu ha ne póncho, chemoirũ hag̃ua. Ha Pédro ojapopa ha’e he’i haichaite ichupe.

9Ha Pédro oho pe ángel rapykuéri, ndoikuaái katu pe ojehúva pe ángel rupi hi’añeteha, oimo’ã uvei kóva peteĩ mba’e Ñanderuete ohechaukávante ichupe techapáype (visiónpe).

10Ha ohasapávo pe guárdia peteĩha ha mokõiha renondépe og̃uahẽ pe cárcel rokẽ hierroguigua renondépe, ha péva ojepe’a rei, ha ohasa rire hikuái oike peteĩ táva cállepe, pe ángel ojei Pédrogui.

11Upépe ae Pédro ohechakuaa ha he’i ijupe g̃uarã: Ko’ág̃a aikuaa añetehápe Ñanderuete ombou hague hi’ángel chepe’a hag̃ua Heródes pógui ha Judayguakuéra pógui, ojaposégui mba’evai cherehe.

12Ha Pédro ohechakuaávo péva, oho María rógape. Imemby ningo Juan, hérava avei Márcos, upépe heta ojeroviáva Hesu Crísto rehe oñembyaty oñembo’e hag̃ua.

13Pédro ombota ikorapy rokẽme, ha peteĩ kuñataĩ, hérava Róde, ha omba’apóva tembiguái ramo pe ógape, oho ojapysaka hag̃ua.

14Ha ohendúvo Pédro ñe’ẽ, oñani vy’apópe ambuekuéra oĩháme, oipe’a’ỹre pe okẽ, ha he’i ichupekuéra: Pédro oñembo’y okẽ renondépe.

15Ha’ekuéra katu he’i ichupe: Ndetarova mba’e piko. Ha’e katu he’i jevy Pedroha. Upérõ he’i hikuái: Oiméne hi’ángel.

16Pédro katu ombota mbotave, ha oipe’ávo hikuái pe okẽ ha ohechávo ha’eha, ipy’andýi joa hikuái.

17Ha Pédro ohupívo ipo omokirirĩ ichupekuéra, ha omombe’upa ichupekuéra mba’éichapa Ñanderuete oguenohẽukára’e ichupe cárcelgui, ha he’i ichupekuéra: Pemombe’upa Jacóbope ha ambue hermanokuérape, ha osẽ oho hag̃ua.

18Ko’ẽmba rire oiko peteĩ apañuãi umi soldadokuéra apytépe, ndoikuaáigui mba’épa ojehúra’e Pédrope.

19Heródes ohekaukávo Pédrope ha ndojohúivo ichupe oporandu porã umi soldadokuérape ha upéi ojukauka ichupekuéra. Pédro katu oho Juda departaméntogui Cesaréape, opyta hag̃ua upépe.

20Heródes ningo ipochy Sidon ha Tíro pegua ndive, ha’ekuéra katu peteĩ ñe’ẽme og̃uahẽ Blásto rendápe, ha’e ningo Heródes rerekua ruvicha, ha ojerure asy ichupe oñe’ẽ hag̃ua Heródes ndive ha’ekuéra oiko porã jevy hag̃ua oñondive, Sidon ha Tíro pegua ojoguaguihína hembi’u Heródes retãgui.

21Peteĩ ára, Heródes oñemonde ijao porãvévape, oguapy iguapyhaguasúpe, ha ohenói ichupekuéra oñe’ẽ hag̃ua hendivekuéra.

22Ha umi oñembyatýva henondépe ohendúvo iñe’ẽ he’i hikuái: Ko oñe’ẽva ningo ndaha’éi yvyarigua ñe’ẽ, yvagaygua ñe’ẽ voi.

23Upevovete Ñanderuete ángel ohavira ichupe oñembotuicha haguére, ombotuicha rãngue Ñanderuetépe, upévagui hasopa pya’e ha omano.

24Ñanderuete ñe’ẽ oñemyasãive ohóvo ha heta hetave oĩ ojeroviáva hese.

25Bernabe ha Sáulo katu osẽ jevy Jerusaléngui ojapopa rire umi mba’e ojejokuái hague, ha oho Antioquíape oguerúvo hikuái hendivekuéra Juánpe, hérava avei Márcos.

← Chapter 11 Jump to: Chapter 13 →