Acts 24

Guarani 2015 (Ñanderuete Ñe’ẽ Porã 2015)

← Chapter 23 Jump to: Chapter 25 →

1Ohasa rire 5 ára pe pa’iguasu Ananías ha heta Israel karai anciáno og̃uahẽ avei Félix rendápe. Ha’ekuéra ogueru avei peteĩ karai oñe’ẽ porãkuaávape, hérava Tértulo.

2Ha Félix ohenoiuka rire ichupekuéra, Tértulo oñepyrũ oñe’ẽ ha he’i: Ndérupi, karaiguasu Félix, ore roiko porã ha py’aguapýpe ko tetã kóvape, ha ne rembiapo porã rupi ko tetã oñemopu’ã porãve ohóvo.

3Opaite ko’ã mba’e ore rohechakuaa porã ha roagradece ndéve ore mburuvicha mba’e porãitéva.

4Ha ani hag̃ua ore romboareiterei, rojeruremi nde orerendu hag̃ua nde py’a porãitépe.

5Ore rojohu ko kuimba’e kóvape, oikohahína peteĩ mba’asy vaívaicha, ha’e oñemoĩ opaite mburuvichakuéra rehe. Ha’e ningo omoakã ha oiko avei umi Nazaretguakuéra ruvicha ramo.

6Ha’e ningo oñeha’ã avei omongy’a ore Jára rogaguasu, ha upéjave ore roapresa avei ichupe ore rembiapoukapy he’i háicha.

7Og̃uahẽ katu pe soldádo ruvicha Cláudio Lísias heta isoldadokuéra ndive ha mbaretépe oipe’a ichupe ore pógui, ha he’i oréve rog̃uahẽ hag̃ua ne rendápe.

8Ndete voi reporandu porã ramo Páblope reikuaáta añeteha opaite mba’e ore ro’éva guive hese.

9Ha opaite ambue Judayguakuéra oĩva guive upépe he’i avei añeteha opaite mba’e Tértulo he’imava’ekue guive.

10Upérõ Félix ipo rupi he’i Páblope oñe’ẽ hag̃ua. Ha Páblo he’i: Aikuaágui heta áñoma nde rembojovake porã hague ore retãyguakuérape, upévare che añe’ẽta kyhyje’ỹre.

11Ndete voi ikatu reitypeka ojapóma hague 12 árante, che aju hague Jerusalénpe añembo’e hag̃ua ore Ruete rogaguasúpe.

12Ha avave ndachejohúi añorãirõháme ore Ruete rogaguasúpe térã ambue ógape, ha namboapañuãiri Judaygua atýpe, Jerusalénpe térã ambue tendápe.

13Ha’ekuéra ndaikatúi ohechauka hi’añeteha umi mba’e he’íva guive hikuái cherehe.

14Che katu amombe’u porãse ndéve, che ajeroviaha Ñanderuete rehe che py’aite guive ha ajapo ore rukuéra rembiapoukapykuéra ha arovia ore proféta ñe’ẽ, ha aguata avei pe jerovia rape ipyahúva rehe, ha’ekuéra he’íva hese hekope’ỹha.

15Che areko pe esperánza umi omanova’ekue oikove jevytaha, taha’e heko potĩva térã iñañáva, opaite ko’ã mba’e ha’ekuéra orovia avei.

16Upévare che añeha’ã aiko porã hag̃ua tapia che py’apy ñe’ẽ potĩ reheve Ñanderuete ha opaite tetãyguakuéra renondépe.

17Heta áño rire che aju jevýma agueru hag̃ua pirapire che retãyguakuéra mboriahúpe g̃uarã ha aikuaave’ẽ hag̃ua avei Jerusalénpe,

18ha che aikuave’ẽ jave umi Judaygua Ásia pegua chejohu Ñanderuete rogaguasúpe, ajapo’ỹre sarambi térã apañuãi.

19Umíva ouva’erãmo’ã ne renondépe, chemoĩ vai hag̃ua, ojohu rire peteĩ mba’e ikatúva chemoĩ vai hag̃ua.

20Térã ko’ã oĩva guive ko’ápe te’i peteĩ mba’e heko pegua’ỹva ajapova’ekue aĩ ramoguare Judaygua karai ancianokuéra apytépe.

21Ndaha’éi ramo pe ñe’ẽ hatãva che ha’eva’ekue aĩ ramoguare ijapytepekuéra: Ko ára kóvape peẽ chembojovake che aroviágui umi omanova’ekue oikove jevyva’erãha.

22Upéi pe Róma ruvicha Félix oikuaa porã voi pe jerovia rape pyahu, he’i opaite oñembyatývape: Ou ramo pe soldádo ruvicha Lísias che ambojovake porãvéta pende apytépe aikuaapa rire avei umi mba’e ha’e he’ítava ko mba’e kóva rehe.

23Upérõ Félix he’i peteĩ soldádo ruvicha’ípe oñangareko porã hag̃ua Páblore ojopy vai’ỹre ichupe, ha opaite oñanduse térã oservisévape guive ichupe anítei ojoko.

24Ohasa rire mbovymi ára Félix hembireko Drusíla ndive, pe kuñakarai ningo peteĩ Judaygua, ohenoiuka Páblope, ha’e omombe’u hag̃ua ichupekuéra pe jerovia rape pyahu, Hesu Crísto evangélio.

25Páblo oñe’ẽvo, he’i: Pe justícia heko peguáva rehe, kuimba’e ha kuñakuéra ojejoko hag̃ua rehe ha Ñanderuete ñembojovake rehe oĩta opaite tetãyguakuérape g̃uarã, Félix okyhyje ha he’i ichupe: Ko ára ovaléma ha ija jevývo chéve che rohenoiuka jevýta.

26Félix he’i ko mba’e kóva, oha’ãrõgui Páblo ome’ẽ ichupe pirapire opoi hag̃ua ichugui. Upévare heta jevy ohenoiuka Páblope oñemongeta hag̃ua hendive.

27Upéicha ohasa mokõi áño ou peve Félix rekoviarã Pórcio Fésto, ha Félix opyta porãségui Judayguakuéra ndive, oheja Páblope cárcelpe.

← Chapter 23 Jump to: Chapter 25 →