Acts 16

Guarani 2015 (Ñanderuete Ñe’ẽ Porã 2015)

← Chapter 15 Jump to: Chapter 17 →

1Páblo ha Sílas og̃uahẽ Dérbe ha Lístrape. Upépe oiko peteĩ kuimba’e ojeroviáva Hesu Crísto rehe, hérava Timotéo. Isy peteĩ Judaygua ojeroviáva avei Hesu Crísto rehe ha itúva katu peteĩ Greciaygua.

2Opaite hermáno Lístra ha Icónio pegua oñe’ẽ porã Timotéo rehe.

3Páblo oipota ko Timotéo omoirũ ichupekuéra, upévare oikytĩ’o ipire’i, umi Judayguakuéra rehe oikóva upérupi, ha’ekuéra oikuaa porãgui itúva peteĩ Greciayguaha.

4Ha Páblo omoñe’ẽ opaite iglesiakuérape, ha’e ohasaha rupi, pe kuatiañe’ẽ apostolkuéra ha Jerusalen ancianokuéra ohaiva’ekue tetã ambueyguakuérape g̃uarã.

5Upéicha umi iglésia oñemombareteve ohóvo ijeroviápe ha oñembohetave ohóvo avei hermáno ipyahuvakuéra.

6Ohasa hikuái Frígia ha Galácia departaméntope, pe Pytu Porãmbáva ojokógui ichupekuéra ani hag̃ua omoherakuã Hesu Crísto evangélio Ásiape.

7Ha oñemoag̃uívo Mísiagui, oñeha’ã oho hag̃ua Bitíniape, Hesu Crísto Pytu Porãite katu ojoko jevy ichupekuéra.

8Upérõ ohasa hikuái Mísia ykére, oho hag̃ua Tróaspe.

9Ha pe pyharépe ojehechauka Páblope payetépe peteĩ kuimba’e Macedónia pegua oñembo’ýva ha ojerure he’ívo: Eju Macedóniape orepytyvõ hag̃ua.

10Ha ojehechauka rire pe Macedoniaygua pya’e roñeha’ã roho hag̃ua Macedóniape, roikuaágui Ñanderuete oipotaha ore romoherakuã avei Hesu Crísto evangélio Macedóniape.

11Ore roho bárcope Tróasgui, ropia’ỹre Samotráciape, ha ambue árape rog̃uahẽ Neápolispe,

12ha upégui roho Filípospe, ko táva opytáma Macedónia retãme. Ore ropyta heta ára Filípospe.

13Peteĩ sábado árape rosẽ avei pe táva rokẽguasúgui y rembe’ýpe, oñembo’ehápe hikuái, ha roguapy romoherakuã hag̃ua Hesu Crísto evangélio umi kuñakaraikuérape oñembyatýmiva upépe.

14Ha peteĩ kuñakarai, hérava Lídia, peteĩ Tiatiraygua, oñemúva ao pytãũ hepyetereíva rehe ha omomba’eguasúva Ñanderuetépe, ojapysaka porã Páblo ñe’ẽ rehe, Ñanderuete voi oipe’águi ipy’apy ojapysaka porã hag̃ua umi ñe’ẽ Páblo he’ívare.

15Ha ha’e ojebautizauka rire hogayguakuéra ndive ojerure asy oréve roiko hag̃ua hógape imbohupaharakuéra ramo, he’ívo: Hi’ã ramo peẽme che ajerovia hekópe Hesu Crísto rehe, peike ha pepyta che rógape.

16Roho jave roñembo’ehápe, peteĩ kuñataĩ oĩva mba’epochy poguýpe orerug̃uaitĩva, ha’e ningo ombopirapire heta ijarakuérape imba’ekuaa rupi.

17Ha’e oho Páblo rapykuéri ha osapukái: Ko’ã kuimba’e ko’ãva yvága Jára rembiguái. Ha’ekuéra omombe’u peẽme pe salvacion rape.

18Ko’ã mba’e ha’e he’i jevy heta árape, Páblo katu nohendusevéima pe he’íva, ojere ha he’i pe mba’epochýpe: Che ha’e nde, pytu vaípe Hesu Crísto rérape, esẽ ichugui, ha upevovete pe mba’epochy osẽ pe kuñataĩgui.

19Ko kuñataĩ jarakuéra ohechávo oñehundi hague ipirapire raity, ojapyhy hikuái Páblo ha Sílaspe, ha ombotyryry ichupekuéra mbojovakehára rendápe, oĩva táva plázape.

20Ha ogueraha ichupekuéra umi mbojovakehára rovaképe ha he’i: Ko’ã kuimba’e ningo omboapañu’ãi ko’ã tavayguápe, ha’ekuéra ningo Judaygua,

21ha ombo’e ambue jepokuaa ñande ndajaikuaáiva ha naiporãiva jajapo, ñande Romayguágui.

22Ha umi tetãygua opu’ã hesekuéra, ha umi mbojovakehára omondorouka ijao oinupãuka hag̃ua yvyra po’ípe.

23Ha oinupã heta rire, oity hikuái ichupekuéra cárcelpe ha he’i cárcel ruvichápe oñangareko porã hag̃ua hesekuéra.

24Upévare ha’e omoinge ichupekuéra cárcel ruguaitépe ha ojopy ipykuéra yvyrakuápe.

25Pyhare pyte rupi katu Páblo ha Sílas oñembo’e ha opurahéi omomba’eguasúvo Ñanderuetépe. Ha umi ambue oĩva cárcelpe ojapysakapa joa hesekuéra.

26Oiko sapy’a peteĩ yvy ryrýi ndetuicháva omongu’epáva umi cárcel tápia rapo ha ojepe’a opaite okẽ ha umi cadéna osopa.

27Upérõ opáy pe cárcel ruvicha ha ohechávo opaite okẽnguéra ojepe’a hague ohekýi ikyse puku ojejuka hag̃ua oimo’ãgui umi cárcelpe oĩva guive okañymbamaha.

28Páblo katu osapukái ichupe ha he’i: Ani rejapo mba’eve ivaíva ndejehe, ore ningo roĩmbahína ko’ápe jepe.

29Ha ogueruka rire peteĩ tataindy oñani pe cárcel ryepýpe ha ryryihápe oñesũ Páblo ha Sílas renondépe,

30ha ogueraha rire ichupekuéra okápe oporandu: Karaikuéra, mba’épa ajapóta ajesalva hag̃ua.

31Ha’ekuéra he’i ichupe: Ejerovia Ñandejára Hesu Crísto rehe, ha nde ha nde rogayguakuéra ojesalvava’erã.

32Ha Páblo ha Sílas omombe’u ichupe ha hogayguakuérape Hesu Crísto evangélio.

33Upéi ha’e voi oñangareko hesekuéra pe hóra guive ha ojohéi pe yvyra po’i rapykuere, upérõ ha’e ha hogayguakuéra ojebautizaukapa.

34Uperire ogueraha ichupekuéra hógape ha omongaru ichupekuéra, ha ovy’aite hogayguakuéra ndive ojeroviaháre Hesu Crísto rehe.

35Ko’ẽmba rire umi táva ruvicha omondo itahachikuéra he’iukávo pe cárcel ruvichápe: Epoi umi kuimba’égui.

36Upérõ pe cárcel ruvicha he’i Páblope: Mburuvichakuéra he’iuka chéve apoi hag̃ua pendehegui, upévare tapeho py’aguapýpe.

37Páblo katu he’i ichupekuéra: Roñenupã opavave rovake ha oremoinge cárcelpe orembojovake’ỹre, ore Romaygua ramojepe, ha ko’ág̃a ñemiháme oremondose, ndaupeichamo’ãi, tou ha’ekuéra ha taoreguenohẽ cárcelgui.

38Umi tahachi ojevy imburuvichakuéra rendápe ha he’i ichupekuéra Páblo ha Sílas kuimba’e Romayguaha, ha ohendúvo péva oñemondyiete hikuái.

39Upévare ou hikuái ha oñe’ẽporã Páblo ha Sílas ndive ha ojerure asy osẽ hag̃ua itávagui.

40Ha osẽ rire pe cárcelgui oho Lídia rendápe, ha ohecha rire hikuái hermanokuérape omokyre’ỹ ichupekuéra ha oho hikuái.

← Chapter 15 Jump to: Chapter 17 →