Leviticus 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Nadab ha Abiu, Aaron ra’ykuéra, ojapyhy peteĩteĩ imba’e ryakuã myatatĩha ha ipype omoĩ tatapỹi, ha hi’ári omoĩ mba’e ryakuã porã ha oikuave’ẽ Ñanderuete renondépe tata ambue reheve, araka’eve ndoje’eiva’ekue ichupekuéra.

2Ha Ñanderuetégui osẽ tata ha ohapy ichupekuéra, ha omano hikuái Ñanderuete renondépe.

3Upéramo Moises he’i Aarónpe: Kóva ningo Ñanderuete he’iva’ekue: Umi oñembojávape cherehe, Che ahechaukáta che reko iporãha, ha mayma tetãygua renondépe ahechaukáta che reko jajaipa, Aaron katu okirirĩ.

4Ha Moises ohenói Misael ha Elsafan, Uziel ra’ykuérape; Uziel ningo Aaron tío, ha he’i ichupekuéra: Peñemboja ha peguenohẽ pene pehẽnguekuérape pe tendágui, oñemboykemava’ekue Ñanderuetépe, ñande jeikoha okárape.

5Ha’ekuéra oike ha oguenohẽ icamisa puku reheve pe atyha rendágui oka gotýo, Moises he’i haguéicha ichupekuéra.

6Upéramo Moises he’i Aaron ha ita’yrakuéra hembývape, Eleazar ha Itamárpe: Anítei peiko akã chara ha anítei pemondoro pende ao pehechauka hag̃ua peñembyasyha ỹrõ pemanóta avei, ha anítei ho’a Ñanderuete pochy Israel retã ári, pene pehẽnguekuéra ári; mayma Israel rogaygua katu oñembyasy joa Ñanderuete ohapy haguére ichupekuéra.

7Ha napesẽiva’erã pe óga jojohuha rokẽgui ỹrõ pemanóta avei peñemonágui Ñanderuete acéite reheve. Ha’ekuéra ojapopa Moises he’i haguéicha.

8Ha Ñanderuete oñe’ẽ Aarónpe he’ívo:

9Nde ha nde ra’ykuéra, ndape’uiva’erã víno térã ambue mba’e oporomonga’úva peike guive pe óga jojohuhápe, ani hag̃ua pemano; kóva ningo peteĩ tembiapoukapy opaite ára peẽme ha pene ñemoñarenguérape g̃uarã,

10peiporavokuaa hag̃uáicha teko porã ha teko vai apytégui, ipotĩva ha ipotĩ’ỹva apytégui,

11ha ombo’e porã hag̃ua Israel ñemoñarenguérape opaite tembiapoukapy pende Ruete he’iva’ekue ichupekuéra Moises juru rupi.

12Ha Moises he’i Aaron ha ita’yrakuéra hembývape, Eleazar ha Itamárpe: Pegueraha pe kuave’ẽmby hembýva, umi kuave’ẽmby ojehapýva Ñanderuetépe g̃uarã ha pe’u pe pan ojejapóva levadura ’ỹ re, pe kuave’ẽmby renda ypýpe, péva ningo mba’e oñeme’ẽmava Ñanderuetépe g̃uarã.

13Pe’uva’erã tenda oñemboykemava’ekue Ñanderuetépe, ko’ãva nde ha nde ra’ykuéra mba’erã, Ñanderuete kuave’ẽmby ojehapývagui, péicha oje’égui chéve ojejapo hag̃ua.

14Péicha pe’uva’erã yvy ipotĩháme, nde, nde ra’ykuéra ha nde rajykuéra nendive, pe pyti’akue oñemyatymoimbyréva ha icuárto oñemopu’ãmbyréva, ko’ãva ne mba’e ha nde ra’ykuéra mba’e, oñeme’ẽva peẽme Israel ñemoñarenguéra kuave’ẽmby py’aguapy reheguávagui.

15Pe kuave’ẽmby kyrakue ojehapyva’erã, icuárto oñemopu’ãva’ekue katu ha ipyti’akue oñemyatymoiva’ekue kuave’ẽmby oñemyatymoimbyréva ramo Ñanderuete renondépe, opyta nde ha nde ra’ykuérape g̃uarã, Ñanderuete he’i haguéicha.

16Ha Moises oporandu pe kavara mácho angaipa rehegua rehe, ha ojejohu ojehapypára’e; upévare Moises ipochy Eleazar ha Itamar, Aaron ra’ykuéra hembýva ndive, ha he’i:

17Mba’éguipa ndape’úira’e pe kuave’ẽmby angaipa reheguágui tenda oñemboykéva pende Ruetépe g̃uarã, imba’égui péva, Ha’e ome’ẽ peẽme pegueraha hag̃ua Israel aty angaipa oñemoĩ porã jevy hag̃ua Ñanderuete ndive.

18Pehecháma: Pe tuguykue ndojegueraháigui tenda oñemboykemava’ekue Ñanderuetépe, peẽ pe’uva’erã ko kuave’ẽmby pe tenda, che ha’e haguéicha peẽme.

19Ha Aaron he’i jevy Moiséspe: Péina ápe ko árape oikuave’ẽ hikuái kuave’ẽmby angaipa rehegua ha kuave’ẽmby ojehapypáva Ñanderuete renondépe; ha chéve ningo ojehúkuri ko’ã mba’e ha che ha’u rire ko árape pe kuave’ẽmby angaipa reheguágui, ombohorýnepa Ñanderuetépe.

20Ha Moises ohendu rire ko’ã mba’e ipy’aguapy jevy.

← Chapter 9 Jump to: Chapter 11 →