Leviticus 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Oimeraẽ kuimba’e térã kuña oñemoangaipáva avei nomombe’úi ramo ñembojovakehápe pe mba’evai ha’e ohecha térã oikuaáva, upéicharamo pe heko vaíva rembiapo vai oja avei hese.

2Péicha ojehu avei peteĩ kuimba’e térã kuña opoko ramo ohecha’ỹre oimeraẽ mba’e naipotĩriva rehe, taha’e mymba saite naipotĩriva re’õngue rehe, térã hymba naipotĩriva re’õngue rehe, térã mymba otyryrýva ha naipotĩriva re’õngue rehe, ha’e oikóta avei peteĩ naipotĩriva ramo pende Ruete renondépe.

3Ha peteĩ kuimba’e térã kuña opoko ramo peteĩ hapicha mba’e ky’áre, ndoikuaái ramojepe, ha’e oñemongy’aha avei opoko haguére hese.

4Ha oimeraẽ kuimba’e térã kuña ome’ẽva iñe’ẽ Ñanderuete rérape, ojepy’amongeta ha oñandu pora’ỹre ojapo porã térãpa ojapo vai ha uperire ohechakuaa oñe’ẽ rei ha ojapo vai hague, hese oja avei ko’ã mba’evai (Éxodo 20,7),

5ha oñandúma ramo oñemoangaipa hague ko’ã mba’e rupi, ha’e oñemombe’uva’erã umi angaipa ojapova’ekue rehe,

6ha oñemoĩ porã jevy hag̃ua ogueruva’erã Ñanderuetépe peteĩ ovecha kuña térã peteĩ kavara kuña ikuave’ẽmby ramo; ha pe pa’i oikuave’ẽva ko kuave’ẽmby angaipa reheguáva pe mba’evai apoha ohupity iperdon.

7Ha ndoguerekói ramo ohupity hag̃ua peteĩ ovecha, pe angaipa ojapova’ekue rehe ogueruva’erã pende Ruetépe mokõi jeruti térã mokõi pykasu ra’yrusu, peteĩ oñemoĩ porã jevy hag̃ua ha ambue kuave’ẽmby ojehapypáva ramo.

8Ha mokõivéva ojegueruva’erã pa’ípe, ha ha’e oikuave’ẽ raẽva’erã pe angaipa reheguáva; ha ojuka ramo, ndoipe’ainteva’erã iñakã ijajúragui.

9Ha pe kuave’ẽmby angaipa rehegua ruguykuégui ohypyiva’erã pe kuave’ẽmby renda tápia jerekuévo; ha huguy rembyre oñamiva’erã pe kuave’ẽmby renda py guýpe; péva hína kuave’ẽmby oñemoĩ porã jevy hag̃ua.

10Ha ambuégui pe pa’i ojapova’erã kuave’ẽmby ojehapypáva ojepokuaa háicha, ha’e oñemoĩ porã jevy hag̃ua, ha oñeperdona hag̃ua ichupe.

11Ha ndoguerekói ramo ohupity hag̃ua mokõi jeruti térã pykasu ra’yrusu repyrã, pe oñemoangaipava’ekue ogueruva’erã 2,2 lítro trígo ku’i iporãva oñemoĩ porã jevy hag̃ua. Nomoĩmo’ãi hi’ári acéite ni mba’e ryakuã porãva, pevahína kuave’ẽmby oñemoĩ porã jevy hag̃ua.

12Umía oguerúta pa’ípe ha ichugui pe pa’i ogueraháta ipo renyhẽngue mandu’arã ramo ha omyendyva’erã pe kuave’ẽmby renda hendýva ári pende Ruetépe g̃uarã; péva hína kuave’ẽmby angaipa reheguáva.

13Ko kuave’ẽmby rupi pe pa’i omoĩ porã jevy avei ichupe, oñeperdonáta ichupe ha pe trígo ku’i rembyre opytáta pa’i mba’erã, ojejapo háicha kuave’ẽmby tembi’u reheguáva rehe.

14Ñanderuete oñe’ẽ Moiséspe, ha he’i:

15Sapy’a rei oime ramo peteĩ tetãygua ojavy ha oñemoangaipa ramo nome’ẽigui pende Ruetépe pe respéto oñeme’ẽva’erãva, ha’e ogueruva’erã ijejavy rehe pende Ruetépe g̃uarã peteĩ ovecha mácho iporãva hymbakuéra atýgui, ovaléva 32,75 grámo pláta, kóva ningo kuave’ẽmby ñemyengovia reheguáva.

16Ha pe mba’e ha’e nome’ẽiva’ekue ome’ẽva’erã katuete, ha hi’ári ome’ẽveva’erã 20 por ciénto (he’ise 5 ovechágui ome’ẽva’erã peteĩ) ha omoĩmbáta pa’i pópe, ha upéi pe pa’i oikuave’ẽta pe ovecha mácho oñeperdona hag̃ua ichupe.

17Oĩ ramo peteĩ tetãygua oñemoangaipa ramo térã ojapo ramo oimeraẽ mba’e Ñanderuete rembiapoukapy he’íva ojejapo’ỹ hag̃ua, ha jepémo ojapóra’e oikuaa’ỹre, hembiapo vai oja hese.

18Upéicharamo ha’e ogueruva’erã pa’i rendápe peteĩ ovecha mácho iporãva hymba atýgui, pe pa’i ombohepy haguéicha; ha pe pa’i oikuave’ẽta ijejavykuéra rehe, ojapova’ekue oikuaa porã’ỹre ha oñeperdonáta ichupe.

19Péva ningo kuave’ẽmby ñemyengovia reheguáva pende Ruetépe g̃uarã.

← Chapter 4 Jump to: Chapter 6 →