Leviticus 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Ko’ãva hína kuave’ẽmby ñemyengovia reheguáva rembiapoukapy; ko’ãva ningo mba’e oñemboykéva pende Ruetépe g̃uarã.

2Ojeajúra kytĩháme pe tymba kuave’ẽmby ojehapypávape, upépe ojeajúra kytĩva’erã avei pe tymba kuave’ẽmby ñemyengovia reheguáva; huguykuépe ojehypyiva’erã kuave’ẽmby renda tápia jerekuévo.

3Ha ichugui reikuave’ẽmbaiteva’erã ikyrakue, pe kyrakue oñu’ãva huguái ha hyekue,

4mokõive ipitikiri’ĩngue ikyrakue reheve, iperevy ha ipy’akue kyrakue reheve.

5Ha pe pa’i ohapypava’erã kuave’ẽmby renda ári pende Ruetépe g̃uarã, péva hína kuave’ẽmby ñemyengovia reheguáva.

6Pa’ikuéra ñemoñare, kuimba’éva guive, ikatu ho’u ko kuave’ẽmby ro’okue to’u katu pe óga jojohuha korapy ryepýpe, péva ningo mba’e oñemboykéva pende Ruetépe g̃uarã.

7Ku angaipa rehegua kuave’ẽmbýicha, peichaite pejapova’erã avei pe ñemyengovia rehegua kuave’ẽmby; peteĩ tembiapoukapýnte mokõivévape g̃uarã, pe pa’i oikuave’ẽvape oñeme’ẽva’erã ko kuave’ẽmby ro’okuégui.

8Pe pa’i oikuave’ẽva oimeraẽ tapicha kuave’ẽmby ojehapypáva ogueraháta imba’erã ramo pe tymba pirekue.

9Upéicha avei opaite kuave’ẽmby oñembojýva tatakuápe térã opaite umi oñembosako’íva mba’e chyryryhápe térã óllape, péva ningo pe pa’i oikuave’ẽva mba’erã.

10Ha opaite mba’e hembýva kuave’ẽmby tembi’u reheguágui oñembojehe’áva acéite reheve térã nandi, opytapava’erã Aaron ra’ykuérape g̃uarã.

11Kóa ha’ehína kuave’ẽmby py’aguapy reheguáva rembiapoukapy oñekuave’ẽtava pende Ruetépe g̃uarã.

12Ojegueru ramo kuave’ẽmby agradecimiénto reheguáva toñeme’ẽ avei pan he’ẽva ojejapova’ekue levadura’ỹre ha oñembojehe’ava’erã acéite reheve, ha mbeju oñemonambyréva acéitepe oñembochyryrypyréva trígo ku’i porãgui,

13ha pan he’ẽva ha pan levadúra reheve oñeme’ẽta avei, oikuave’ẽ ramo kuave’ẽmby py’aguapy reheguáva.

14Ha opaite ko’ã kuave’ẽmbýgui peteĩ pehẽngue oñekuave’ẽtava pende Ruetépe g̃uarã, ha pe pa’i ohypýivape umi kuave’ẽmby py’aguapy rehegua ruguykue, oñeme’ẽva’erã umi mba’e hembýva guive imba’erã ramo.

15Ha pe kuave’ẽmby py’aguapy reheguáva ro’okue oje’uva’erã pe oñekuave’ẽha árape; ndojehejaiva’erã ichugui mba’eve ambue árape g̃uarã.

16Ha pe kuave’ẽmby oñekuave’ẽva oñeme’ẽgui peteĩ promésa pende Ruetépe, oje’uva’erã pe ára oñekuave’ẽháme ha umi hembýva oje’ukuaa gueteri ambue árape;

17Ha pe kuave’ẽmby ro’okue hembýva pe ára mbohapyhápe ojehapypava’erã.

18Oje’u ramo pe kuave’ẽmby py’aguapy reheguágui, pe ára mbohapyhápe, upe ho’úva ichugui ndohupitymo’ãi mba’eve ikuave’ẽmby rupi, ojapo reígui ikuave’ẽmby ha ojehechakuaa mba’evai apoha ramo, ha angaipa oja hese.

19Ha pe so’o oja ramo oimeraẽ mba’e iky’áva rehe, ndoje’uiva’erã, tatápe ojehapypava’erã. Ambue so’o mayma tapicha ipotĩva ikatu ho’u;

20ha peteĩ tetãygua ipotĩ’ỹva ho’u ramo pe kuave’ẽmby py’aguapy rehegua ro’okue oñeme’ẽva pende Ruetépe, ha’e oñemongy’aite ha ojejukava’erã hetãyguakuéra apytégui.

21Peteĩ tetãygua opoko ramo oimeraẽva mba’e ipotĩ’ỹva rehe, kuimba’e ha kuña térã tymba ipotĩ’ỹva rehe, térã oimeraẽ ambue mymba’i (bícho) ipotĩ’ỹva rehe, ha upéi ho’u pe kuave’ẽmby py’aguapy rehegua ro’okuégui, pende Ruete mba’éva, upe tapicha upévape ojejukava’erã.

22Ñanderuete oñe’ẽ Moiséspe, ha he’i:

23Eñe’ẽ Israel ñemoñarenguérape ha ere ichupekuéra: Ndape’uiva’erã mba’eveichagua tóro, ovecha térã kavara kyrakue.

24Pe tymba omano reiva’ekue, térã tymba ñarõ ojejukava’ekue kyrakue, peiporukuaa oimeraẽ mba’épe, ndape’uiva’erã katu araka’eve.

25Oimeraẽ tapicha ho’úva tymba kyrakuégui, oñekuave’ẽva pende Ruetépe g̃uarã kuave’ẽmby hendypáva ramo, upe tetãygua upévape ojejukava’erã hetãyguakuéra apytégui.

26Mba’eveichagua tuguy ndape’uiva’erã mamove peikoha rupi, taha’e guyra ruguykue térã tymba ruguykue.

27Oimeraẽ tetãygua ho’úva oime haichagua tuguy, upévape hetãyguakuéra ojukava’erã.

28Ñanderuete oñe’ẽ Moiséspe, ha he’i:

29Eñe’ẽ Israel ñemoñarenguérape, ha ere ichupekuéra: Pe oikuave’ẽva kuave’ẽmby py’aguapy reheguáva pende Ruetépe g̃uarã, toñeme’ẽ ichupe g̃uarã peteĩ pehẽngue imba’eteévagui.

30Ipotee rupi ogueruva’erã ko kuave’ẽmby ojehapyva’erãva pende Ruete renondépe; ogueruva’erã ikyrakue ha ipyti’akue; ipyti’akue oñemyatymoi hag̃ua kuave’ẽmby myatymoimbyréva ramo pende Ruete renondépe.

31Ikyrakue pe pa’i ohapyva’erã kuave’ẽmby rendápe, ipyti’akue katu Aaron ha ita’yrakuéra mba’erã.

32Pa’ípe peme’ẽva’erã pe tymba cuárto akatúa pegua pene kuave’ẽmby py’aguapy reheguávagui.

33Aaron ñemoñaréva oikuave’ẽva’erã kuave’ẽmby py’aguapy rehegua ruguykue ha ikyrakue pende Ruetépe g̃uarã, ha’e voi ogueraháta avei imba’erã ramo pe tymba cuárto akatúa peguáre.

34Che, pende Ruete, arecebi Israel ñemoñarenguéragui ikuave’ẽmby py’aguapy rehegua ipyti’akue oñemyatymoiva ha icuárto, ha ãva ame’ẽ jevýta pa’i Aaron ha ita’yrakuérape, ko’ã ñe’ẽ opyta tembiapoukapýicha opaite árape Israel ñemoñarenguéra apytépe.

35Ko’ãva ningo Aaron ha ita’yrakuéra pehẽngue, pe kuave’ẽmby hendypyrévagui oñeme’ẽva’ekue pende Ruetépe g̃uarã; pende Ruete oiporavoha ára guive ichupekuéra oiko hag̃ua ipa’i ramo.

36Péva pende Ruete he’iva’ekue oñeme’ẽ hag̃ua ichupekuéra, Ha’e oiporavoha ára guive ichupekuéra Israel ñemoñarenguéra apytégui, ñe’ẽ tembiapoukapýicha pende Ruete oheja iñemoñarenguérape g̃uarã.

37Ko’ãva hína umi tembiapoukapy kuave’ẽmby ojehapypa reheguáva, tembi’u reheguáva, angaipa reheguáva, agradecimiénto reheguáva, jeporavo reheguáva ha py’aguapy reheguáva.

38Ko’ã mba’e pende Ruete he’iva’ekue Moiséspe Sinai cérrope, upe ára Ha’e he’i ramoguare Israel ñemoñarenguérape oikuave’ẽ hag̃ua ikuave’ẽmbynguéra Ijarateépe g̃uarã.

← Chapter 6 Jump to: Chapter 8 →