Leviticus 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Ñanderuete oñe’ẽ Moiséspe, ha he’i:

2Eñe’ẽ Israel ñemoñarenguérape ha ere ichupekuéra: Sapy’a rei peteĩ kuimba’e térã peteĩ kuña oñemoangaipa ramo ndohechakuaáigui ojapo vai hague pende Ruete rembiapoukapy rehe, ha’e ojapova’erã ko’ã mba’e Che ha’étava:

3Peteĩ pa’i, oñemona rire pa’i ramo, oñemoangaipa ramo oipota’ỹre, oikuave’ẽva’erã pende Ruetépe peteĩ tóro ra’yrusu iporãva hi’angaipáre, ani hag̃ua oity avei hembiapo vai hetãyguakuéra ári.

4Upévare ha’e ogueruva’erã pe tóro ra’yrusu pe óga jojohuha rokẽme, pende Ruete renondépe ha omoĩ mbareteva’erã ipo pe tóro ra’yrusu akã ári ha oajúra kytĩva’erã pende Ruete renondépe.

5Ha pe pa’i oñemonamava’ekue oguerúta pe tóro ra’yrusu ruguykue pe óga jojohuhápe Ñanderuetépe g̃uarã,

6ha pe pa’i ombohykueva’erã ikuã pe tóro ra’y ruguýpe, ha ohypyiva’erã 7 jevy ikuãme pende Ruete renondépe, pe aosãingo pererĩ gotýo.

7Ha pe pa’i omoĩva’erã avei pe tóro ra’y ruguy pe kuave’ẽmby renda ratĩ rehe ojehapyhápe mba’e ryakuã porã, oĩva óga jojohuha renondépe; ha oñohẽta pe tóro ra’y ruguy rembyre pe kuave’ẽmby renda pýre, oĩva pe óga jojohuha rokẽ renondépe.

8Pe tóro ra’yrusu kuave’ẽmby angaipa rehegua kyrakue, oñu’ãva hyekue ha oĩva hyepýre ojepe’áta ichugui,

9avei mokõive ipitikiri’ĩngue, ikyrakue, iperevy (bázo) ha ipy’akue kyrakue,

10pe tóro kuave’ẽmby py’aguapy rehegua kyrakue ojepe’a háicha; ha upéi pe pa’i omyendyva’erã pe kuave’ẽmby renda ári.

11Pe tóro ra’yrusu pirekue, ho’okue, iñakãngue, hetymakue, hyekue ha hepotikue reheve,

12ojegueraháta mombyry pende rekohágui, yvy ipotĩháme, oñemombohápe pe tanimbu, upépe oñemoĩta jepe’a ári ojehapypa hag̃ua, pe tanimbu oñemombohápe, upépemante ojehapypava’erã.

13Israel retã oñemoangaipa ramo, ojapose’ỹ ramojepe, ha ndohechakuaái ramo oñemoangaipa hague pende Ruete ndive térã hembiapoukapy rehe, upeichavéramo jepe Israel retã rehe oja pe angaipa.

14Ha Israel ohechakuaa rire oñemoangaipa hague oikuave’ẽva’erã peteĩ tóro ra’yrusu kuave’ẽmby angaipa reheguáva ramo ha ogueruva’erã pe óga jojohuha renondépe.

15Ha umi karai anciáno omoĩ mbareteva’erã ipokuéra pe tóro ra’yrusu akã ári, pende Ruete renondépe, ha oajúra kytĩva’erã pe tóro ra’yrusu.

16Ha peteĩ pa’i oñemonamava’ekue omoingeva’erã pe tóro ra’yrusu ruguykue pe óga jojohuhápe,

17ha pe pa’i omyakỹva’erã ikuã pe tóro ra’y ruguykuépe ha ohypýiva’erã pende Ruete renondépe 7 jevy ikuãme pe aosãingo pererĩ gotýo.

18Ha pe huguykuégui omoĩva’erã avei pe kuave’ẽmby renda ratĩ rehe oĩva pende Ruete renondépe, pe óga jojohuhápe ha pe huguy rembyre oñohẽva’erã pe kuave’ẽmby renda pýre, oĩvahína pe óga jojohuha rokẽ renondépe, ojehapyhápe kuave’ẽmbynguéra.

19Pe pa’i oipe’apaiteva’erã pe tymba kyrakue ha omyendypava’erã pe kuave’ẽmby renda ári.

20Ha ojapova’erã pe tóro ra’yrusúgui ojejapo haguéicha pe tóro ra’yrusu angaipa rehegua reheve; peichaite ojapova’erã avei ichugui; péicha pe pa’i ojapóta hesehápe ha oñeperdonáta ichupe.

21Ha oguenohẽva’erã pe tóro ra’yrusu pe tekoha oka gotýo, ha ohapyva’erã ojehapy haguéicha pe tóro ra’yrusu tenondeguáva; upéicha oñeperdonava’erã pende reko vai.

22Peteĩ mburuvicha oñemoangaipa ramo térã jejavypópe ojapo ramo oimeraẽ mba’e pende Ruete rembiapoukapy oipota’ỹ háicha ha ojapo ramo oimeraẽ mba’e ojejapo’ỹva’erãva, upérõ ha’e oñemoangaipa,

23ha ha’e ohechakuaa rire oñemoangaipa hague, oikuave’ẽva’erã ikuave’ẽmby ramo peteĩ kavara mácho iporãva.

24Ha pe mburuvicha omoĩ mbareteva’erã ipo pe kavara akã ári, ha oajúra kytĩva’erã oikuave’ẽ hag̃ua pe kuave’ẽmby ojehapypáva ramo pende Ruete renondépe; upevahína peteĩ kuave’ẽmby angaipa reheguáva.

25Ha pe pa’i ohypyiva’erã ikuãme pe kuave’ẽmby angaipa rehegua ruguykuégui, ha omoĩva’erã pe kuave’ẽmby renda ratĩ ári, ha oñohẽva’erã pe huguy rembyre pe kuave’ẽmby renda pýre.

26Ha ohapypaiteva’erã ikyrakue pe kuave’ẽmby renda ári, ohapy haguéicha pe kuave’ẽmby py’aguapy rehegua kyrakue; péicha pe pa’i ojapóta hese, ha oñeperdonáta hi’angaipa.

27Oimeraẽ Israelgua oñemoangaipa ramo, opyrũgui pende Ruete rembiapoukapy rehe térã ojapo ramo oimeraẽ mba’e ojejapo’ỹva’erãva, ha’e oñemohembiapo vai, ha iñangaipa oja hese,

28ha ohechakuaa rire oñemoangaipa hague oikuave’ẽva’erã peteĩ kavara kuña iporãva, hi’angaipa ojapova’ekue rehe.

29Ha’e omoĩ mbareteva’erã ipo hymba akã ári, ha oajúra kytĩva’erã oikuave’ẽ hag̃ua, oñekuave’ẽ haguépe pe kuave’ẽmby ojehapypáva.

30Upéi pe pa’i ojapyhyva’erã huguykuégui ikuã rehe, ha omoĩva’erã pe kuave’ẽmby renda ratĩ ári, ha pe huguy hembýva oñohẽva’erã kuave’ẽmby renda pýre.

31Ha ikyrakue ojepe’apava’erã ichugui, ojepe’a haguéicha pe kuave’ẽmby py’aguapy reheguávagui; ha pe pa’i omyendypava’erã pe kuave’ẽmby renda ári mba’e ryakuã porã ramo pende Ruetépe g̃uarã; péicha pe pa’i ojapóta hese ha oñeperdonáta ichupe.

32Ha ogueruse ramo iñangaipa rehe peteĩ ovecha ra’yrusu ikuave’ẽmby ramo, ogueruva’erã peteĩ ovecha kuña iporãva.

33Ha omoĩ mbareteva’erã ipo hymba akã ári ha oajúra kytĩta oikuave’ẽ hag̃ua oñekuave’ẽ haguépe pe kuave’ẽmby ojehapypáva.

34Upéi ohypyiva’erã ikuãme pe kuave’ẽmby angaipa rehegua ruguykuégui pe kuave’ẽmby renda ratĩnguéra rehe, ha pe huguy rembyre oñohẽva’erã pe kuave’ẽmby renda pýre.

35Ha ikyrakue ojepe’apava’erã ichugui, ojepe’a haguéicha avei pe kuave’ẽmby py’aguapy reheguávagui ha pe pa’i ohapyva’erã pe kuave’ẽmby renda ári pende Ruetépe g̃uarã; péicha pe pa’i ojapóta hesehápe ha oñeperdonáta ichupe.

← Chapter 3 Jump to: Chapter 5 →