Leviticus 21

Guarani 2015 (Ñanderuete Ñe’ẽ Porã 2015)

← Chapter 20 Jump to: Chapter 22 →

1Ñanderuete he’i Moiséspe: Eñe’ẽ pa’ikuérape, Aaron ra’ykuéra, ha ere ichupekuéra ani hag̃ua oñemongy’átei hetãygua retekue rehe.

2Ikatu oñemongy’a omano ramo ipehẽngue ag̃uiete rehe, isy térã itúva rehe, ita’ýra rehe, térã itajýra rehe, térã ityvyratee rehe,

3térã heindy kuñataĩ rehe, ne’ĩrava gueteri oñemomenda.

4Pa’ikuéra noñemongy’aiva’erã ambue tetekue rehe.

5Nomoperõiva’erã iñakã jerekuévo, ha noikytĩriva’erã hendyva apýra, ha noñekytĩriva’erã avei ipirekuéra rehe.

6Ha’ekuéra heko potĩva’erã pende Ruetépe g̃uarã, ha nomongy’aiva’erã pende Ruete réra, ha’ekuéra oikuave’ẽgui Jahve, Ijárape g̃uarã, pe kuave’ẽmby hendýva ha pe pan reheguáva, upévagui heko potĩva’erã hikuái.

7Kuña reko vaíva rehe térã herakuã vaíva rehe pe pa’i nomendaiva’erã, ha kuña ojepoiva’ekue rehe nomendaiva’erã avei; pe pa’i heko potĩva’erã pende Ruetépe g̃uarã.

8Emomba’eguasu ichupe, oikuave’ẽgui nde Járape g̃uarã pan; Che Jahve, che reko porãgui ha Che pomboheko porã’aína.

9Ha peteĩ pa’i rajy oñepyrũ ramo oiko kuña reko vaíva ramo, omongy’águi itúvape, pe tajýra pévape ojehapyva’erã.

10Ha pe pa’iguasu omyakãva hetãyguakuérape, ha iñakãre oñeñohẽva’ekue acéite oñemboykéva pende Ruetépe g̃uarã, ha oñemondémava pa’iguasu aópe anítei oiko akã charápe, ni nomondoroiva’erã ijaokuéra,

11ha ndoikeiva’erã peteĩ ógape oimeraẽ tapicha omanomava’ekue oĩháme, térã isy térã itúva rehe avei noñemongy’aiva’erã.

12Nosẽiva’erã óga jojohuhágui, ohecha hag̃ua pe omanóvape, ani hag̃ua omongy’a Ijára róga; pende Ruete acéite oĩgui hi’ári, Che ningo pende Ruete.

13Ha’e omendava’erã peteĩ kuñataĩ heko potĩva rehe.

14Nomendaiva’erã viúda rehe, térã ojepoiva’ekue rehe, térã herakuã vaíva rehe, térã heko vaíva rehe, hetãyguateéva apytégui oiporavova’erã peteĩ kuñataĩ heko potĩvape hembirekorã ramo.

15Ani hag̃ua ha’e voi omongy’a iñemoñarenguéra hetãyguakuéra apytépe, Che, pende Ruete, amboheko potĩva’ekue ichupe.

16Ñanderuete oñe’ẽ Moiséspe, ha he’i:

17Eñe’ẽ Aarónpe ha ere ichupe: Avave pene ñemoñarenguéra apytégui, oguerekóva oime haichagua meg̃ua (fálla) hete rehe noñembojaiva’erã oikuave’ẽ hag̃ua pan, pende Ruete mba’erãva.

18Mba’eveichagua kuimba’e oguerekóva oime haichagua meg̃ua hete rehe noñembojaiva’erã (che rógare): Kuimba’e hesatũva, térã ikarẽva, térã hembevóva térã itĩ okakuaa porã’ỹva, térã hete ojuavýva (diferente),

19térã kuimba’e opẽva’ekue hetyma térã ijyva,

20térã ijatua kandúva, térã ikarapeitereíva térã hesa araíva, térã ikura’ỹiva, térã hi’uñéva, térã oñeha’ỹi’óva.

21Avaveichagua kuimba’e pa’i Aaron ñemoñare apytégui oguerekóva oime haichagua meg̃ua hete rehe noñembojaiva’erã oikuave’ẽ hag̃ua kuave’ẽmby hendýva pende Ruetépe g̃uarã; oĩgui hese hete meg̃ua ñoñembojaiva’erã oikuave’ẽ hag̃ua pe pan Ijára mba’erãva.

22Pe pan pende Ruete mba’éva, ha umi mba’e oñemboykévagui pende Ruetépe g̃uarã katu ho’ukuaa.

23Noñembojaiva’erã pe aosãingo kupe rehe, ha noñembojaiva’erã avei pe kuave’ẽmby renda rehe, oĩgui hese tete meg̃ua; ani hag̃ua omongy’átei che róga oñemboykemava’ekue chéve g̃uarã.

24Ha Moises he’i ko’ã mba’e Aarónpe, ita’yrakuéra ha mayma Israel ñemoñarenguérape.

← Chapter 20 Jump to: Chapter 22 →