Leviticus 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Ñanderuete oñe’ẽ Moiséspe, ha he’i:

2Eréta avei Israel ñemoñarenguérape: Oimeraẽ kuimba’e Israel ñemoñare, térã tetã ambueygua, oikóva Israel retãme, oikuave’ẽva ita’ýra térã itajýra Molócpe (jára gua’úpe g̃uarã), katuete omanova’erã; hetãyguakuéra oikóva tetãpýre ojukava’erã ichupe, omombóvo hese ita omano meve.

3Ha Che añemoĩta pe kuimba’e péva rehe, ha ahundíta ichupe hetãyguakuéra apytégui, ome’ẽgui ita’ýra térã itajýra Molócpe, péicha omongy’a che rekoha ha che réra porãite.

4Ha hetãyguakuéra omboty ramo hesa ha ndojukái ramo upe kuimba’e upévape, ome’ẽmava’ekue ita’ýra térã itajýrape Molócpe,

5upéicharamo, Che voi añemoĩta pe kuimba’ére ha ipehẽnguekuéra rehe, ha ahundíta ichupekuéra hetãyguakuéra apytégui, oñemopeteĩgui Moloc ndive.

6Ha upe oñemongy’áva ohendúvo paje apohakuérape térã pe ohenóiva ãnguépe Che voi añemoĩta hese, ha ahundíta ichupe hetãyguakuéra apytégui.

7Peñemboheko porã, Che Jahve, pende Jára, Che chereko porãgui.

8Ha pejapóke che rembiapoukapy, Che pende Jára, pomboheko porãva che mba’erã ramo.

9Opaite kuimba’e omaldecíva itúva térã isýpe, añetehápe omanova’erã; omaldeci haguére ichupe, huguy ho’ava’erã hi’ári.

10Peteĩ kuimba’e oñeno ramo hapicha rembireko ndive, upe kuimba’e ha upe kuña ojejukava’erã.

11Oimeraẽ kuimba’e oñenóva itúva rembireko ndive, omongy’a itúvape; mokõivéva ojejukava’erã; huguy ho’ava’erã hi’arikuéra.

12Oimeraẽ kuimba’e okéva ita’ýra rembireko ndive, mokõivéva omanova’erã; ojapógui hikuái mba’e ivaietereíva; huguy oñohẽva’erã hi’arikuéra.

13Oimeraẽ kuimba’e oikóva ambue kuimba’e ndive, kuña ndive ramoguáicha, mba’evaietereírasa ojapohína; mokõivéva ojejukava’erã; hi’angaipa ojeruréma huguy (imanóre).

14Upe omendáva peteĩ kuña ha isýre avei, ojapo mba’evaiete, tatápe ojehapyva’erã mbohapyvévape, ani hag̃ua oiko peichagua tembiapo vai pende apytépe.

15Oimeraẽva oñemog̃uahẽva tymba rehe, oiko hag̃ua hendive, ojejukava’erã ha pe tymba pejukava’erã avei.

16Ha peteĩ kuña oñemog̃uahẽ ramo peteĩ tymba rehe oiko hag̃ua hendive, pejukava’erã upe kuñáme ha upe tymba avei; katuete omanova’erã hikuái; iñangaipa ojeruréma huguy (imanóre).

17Oimeraevã ojapyhýva heindýpe, itúva rajy térã isy membýpe oiko hag̃ua hendive upéva tembiapo vaietereírasa; umía ojejukava’erã tetã ra’ykuéra resa renondépe; hembiapo vai ho’ava’erã hi’arikuéra.

18Oimeraẽ kuimba’e okéva kuña ndive, ikuña mba’asy aja, mokõivéva oñemongy’a oikuaágui huguyha, upévagui mokõivéva ojejukava’erã hetã apytégui.

19Ani reiko nde sy kypy’y térã nde ru reindy ndive, upe oikóva ipehẽngue ndive oguerahava’erã heko vai hi’ári.

20Oimeraẽ kuimba’e okéva itúva ryvy rembireko ndive, itúva ryvy opívo ohecháma; oguerahava’erã hi’angaipa; ha omanova’erã hikuái ita’yra’ỹre.

21Ha pe oikóva ityvýra rembireko ndive, ojapo mba’evaiete, ndaita’yraiva’erã hikuái.

22Pejapóke opaite che ñe’ẽ ha che rembiapoukapy ha’e haguéicha peẽme, anítei pe tetã Che poguerahápe, penemosẽ jevy avei.

23Aníke peikótei umi tetãygua ojepokuaa háicha Che amosẽtava, pene renonderãgui, ha’ekuéra ojapógui opaite ko’ã mba’evaietereirasáva, péva ningo chembojeguaru.

24Upévare ha’e peẽme: Peẽme ame’ẽta ijyvy pene mba’erã ramo, osyryhápe kamby ha eíra. Che ningo Jahve, pende Jára, poiporavóma tetãnguéra apytégui,

25upévagui pembojuavykuaa tymba ipotĩva ha ipotĩ’ỹva, guyra ipotĩva ha ipotĩ’ỹva apytégui, ha ani peñemongy’átei tymbakuéra ipotĩ’ỹva rupi, ni mba’eveichagua otyryrýva yvy apére, umíva Che amboykeva’ekue anítei peẽ peñemongy’a hesekuéra.

26Peikova’erã chéve g̃uarã heko porãva ramo, Che Jahve, che reko porãgui, Che voi poiporavo tetãnguéra apytégui peiko hag̃ua che mba’e ramo.

27Ha pe kuimba’e térã pe kuña ohenói ramo omanóva ãngue térã oiko ramo ta’yvõhára ramo, omanova’erã; ojejukava’erã itápe; iñangaipa ojeruréma huguy (imanóre).

← Chapter 19 Jump to: Chapter 21 →