Leviticus 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Pe ára 8-hápe Moises ohenói Aaron, ita’yrakuéra ha Israel karai ancianokuérape;

2ha he’i Aarónpe: Eru tymba atýgui peteĩ tóro ra’yrusu iporãva ha peteĩ ovecha iporãva reikuave’ẽ hag̃ua angaipáre Ñanderuete renondépe.

3Ha Israelguakuérape ere: Pegueru peteĩ kavara mácho kuave’ẽmby angaipáre, peteĩ tóro ra’yrusu ha peteĩ ovecha ra’yrusu iporãva oguerekóva peteĩ áño, peikuave’ẽ hag̃ua kuave’ẽmby ojehapypáva’erãva ramo.

4Péicha avei peteĩ tóro ha peteĩ ovecha mácho kuave’ẽmby py’aguapy reheguáva peikuave’ẽva’erã Ñanderuete renondépe, ha peteĩ kuave’ẽmby tembi’u rehegua oñembojehe’apyréva acéite reheve; Ñanderuete ohechauka háicha peẽme ko árape.

5Ha ogueraha hikuái pe óga jojohuha renondépe umi tymba, Moises he’i haguéicha ichupekuéra ha Israelguakuéra ijaty joa ha oñemoĩ Ñanderuete renondépe.

6Upéramo Moises he’i: Ko’ã mba’e Ñanderuete he’iukava’ekue ojejapo hag̃ua, ha pejapopa ramo hekoitépe Ñanderuete reko jajaipa ojehechaukáta peẽme.

7Ha Moises he’i Aarónpe: Eñemboja pe kuave’ẽmby renda rehe ha eikuave’ẽ ne kuave’ẽmby angaipa reheguáva ha ne kuave’ẽmby ojehapypáva, nde ha ne retãyguakuéra rehe peñemoĩ porã jevy hag̃ua Ñanderuete ndive, Ha’e he’i haguéicha peẽme.

8Upéramo Aaron oñemboja kuave’ẽmby renda ypýpe ha oajura kytĩ pe tóro ra’yrusu kuave’ẽmby angaipa reheguáva ijehe g̃uarã.

9Ha ita’yrakuéra ogueru pe tuguykue hendápe, ha’e omyakỹ hag̃ua ikuã pe tuguykuépe ha omoĩ hag̃ua kuave’ẽmby renda ratĩnguéra rehe ha pe tuguykue rembyre oñohẽ pe kuave’ẽmby renda pyendáre.

10Ha ohapy pe kuave’ẽmby renda ári pe kuave’ẽmby angaipa rehegua kyrakue ipitikiri’ĩngue reheve ha ipy’akue kyrakue, Ñanderuete he’i haguéicha Moiséspe.

11Ha ho’okue ha ipirekue katu ohapy hikuái jeikoha okárape.

12Péicha avei oajúra kytĩ pe kuave’ẽmby ojehapypava’erãva ha Aaron ra’ykuéra ogueru ichupe huguykue ha ha’e ohypýi hag̃ua pe kuave’ẽmby renda tápia jerekuévo rehe.

13Upéi ogueru ichupe pe kuave’ẽmby ojehapypa reheguáva, ipehẽnguekuéra ha iñakãngue ohapy hag̃ua pe kuave’ẽmby renda ári.

14Upéi ojohéi hyekue ha hetymakue ohapy hag̃ua pe kuave’ẽmby rendápe, pe kuave’ẽmby ojehapypa reheguáva ári.

15Oikuave’ẽ avei hetãyguakuéra kuave’ẽmby ha ojapyhy pe kavara mácho hetãyguakuéra angaipa rehe ha oajura kytĩ oikuave’ẽ hag̃ua kuave’ẽmby angaipa reheguáva ramo pe tenondeveguaréicha.

16Uperire ogueruka pe kuave’ẽmby ojehapypa reheguáva ha ombosako’ipa Ñanderuete he’i haguéicha.

17Péicha avei oikuave’ẽ pe kuave’ẽmby tembi’u reheguáva, ha omyenyhẽ heseve ipo, ha ohapyuka kuave’ẽmby renda ári, pe kuave’ẽmby ojehapypa reheguáva pyhareveguare reheve.

18Oajúra kytĩ avei pe tóro ha pe ovecha mácho kuave’ẽmby py’aguapy reheguáva ramo, péva tetãyguakuéra mba’e; ha Aaron ra’ykuéra ogueru ichupe pe tuguykue, ha’e ohypýi hag̃ua pe kuave’ẽmby renda tápia jerekuévo rehe;

19ha pe tóro ha pe ovecha mácho kyrakue, huguaikue, hye kyrakue, ipitikiri’ĩngue ha ipy’a kyrakue

20omoĩmba pe pyti’akue ári, ohapy hag̃ua avei pe kuave’ẽmby renda ári.

21Ipyti’akue ha icuárto akatúa, Aaron omyatymoi kuave’ẽmby ñemyatymoimbyréva ramo Ñanderuete renondépe, Ha’e he’i haguéicha Moiséspe.

22Upéi Aaron ohupi ipo tetãyguakuéra gotýo ha ohovasa ichupekuéra; ha oikuave’ẽ rire pe kuave’ẽmby angaipa reheguáva, pe kuave’ẽmby ojehapypáva ha kuave’ẽmby py’aguapy reheguáva, oguejy pe kuave’ẽmby rendágui.

23Moises ha Aaron oike pe óga jojohuhápe ha upéi osẽ jevy ohovasa hag̃ua hetãyguakuérape; ha Ñanderuete reko jajaipa ojehechauka mayma hetãyguakuérape.

24Ha Ñanderuetégui osẽ tata ombokusugue hag̃ua pe kuave’ẽmby ojehapypáva ikyrakue reheve oĩva pe kuave’ẽmby renda ári ha mayma tetãyguakuéra ohechávo ko’ã mba’e ho’a ha oñesũ tĩndyhápe omomba’eguasu hag̃ua Ñanderuetépe.

← Chapter 8 Jump to: Chapter 10 →