Leviticus 23

Guarani 2015 (Ñanderuete Ñe’ẽ Porã 2015)

← Chapter 22 Jump to: Chapter 24 →

1Ñanderuete oñe’ẽ Moiséspe, ha he’i:

2Eñe’ẽ Israel ñemoñarenguérape ha ere ichupekuéra: Ko’ãva hína umi areteguasu oñemboykéva pende Ruetépe g̃uarã peñembyaty hag̃ua (Jerusalénpe) che rogaguasu oĩtaháme.

3Seis ára (día) pemba’apova’erã, ha pe ára 7-ha katu pepytu’uva’erã, peju hag̃ua atyguasúpe; mba’eveichagua tembiapo ndapejapoiva’erã jepytu’uha árape, ko ára kóvape pende Ruete omboykéma avei peẽme g̃uarã mamo peikohápe.

4Ko’ãva hína ambue pende Ruete areteguasu peẽ Israelguakuéra peñembyaty hag̃ua che rogaguasu oĩháme:

5Pe jasy peteĩháme, pe ára 14-hápe, umi mokõi ka’aru pa’ũme, oikóta pende Ruete páscua.

6Ha pe ára 15-hápe ko jasy kóvape, (Abril) oikóta pe areteguasu pan ojejapóva levadura’ỹre pende Ruetépe g̃uarã. 7 ára pukukue pe’uva’erã pan ojejapóva levadura’ỹre.

7Pe ára peteĩháme oikóta atyguasu che rogaguasu oĩháme; mba’eveichagua tembiapo ndapejapoiva’erã.

8Peikuave’ẽva’erã pende Ruetépe 7 ára pukukue kuave’ẽmby hendýva; pe ára 7-ha oiko jevýta atyguasu che rogaguasu oĩháme; mba’eveichagua tembiapo ndapejapoiva’erã.

9Ha Ñanderuete oñe’ẽ Moiséspe, ha he’i:

10Eñe’ẽ Israel ñemoñarenguérape ha ere ichupekuéra: Peike vove pe yvýpe Che ame’ẽtava peẽme, ha pemono’õvo pende kóga ra’ỹi, pegueruva’erã pa’ípe pe háse (mázo) peteĩha umi mba’e pemono’õvagui.

11Ha pe pa’i omyatymoiva’erã pe háse pende Ruete renondépe, penemoĩ porã jevy hag̃ua; pe pytu’uha ára riregua omyatymoiva’erã.

12Ha upe háse peikuave’ẽha árape, peikuave’ẽva’erã avei peteĩ ovechara’y iporãitéva oguerekóva peteĩ áño, kuave’ẽmby ojehapypáva ramo pende Ruetépe g̃uarã.

13Pegueru avei 4,4 lítro trígo ku’i iporãva oñembojehe’apyréva acéite reheve, kuave’ẽmby hendýva ramo, hyakuã asy hag̃ua pende Ruetépe g̃uarã; pegueru avei kuave’ẽmby ramo 0,9 lítro víno.

14Anítei pe’u pan, térã trígo ra’ỹingue pyahu oñemaimbepyréva, térã trígo kyrỹi, peikuave’ẽ meve pene kuave’ẽmby pende Jára mba’erãva; ko ñe’ẽ kóva peteĩ tembiapoukapy opaite ára peẽme g̃uarã mamo peikoha rupi.

15Ha peipapáta ko pytu’uha ára guive, peikuave’ẽva’ekue avei pe trígo háse kuave’ẽmby myatymoi ramo, 7 semána oñemboty peve.

16Pe pytu’uha ára guive peipapava’erã 50 ára (día) peikuave’ẽ hag̃ua pe mba’e ra’ỹi pyahu pemomba’eguasúvo pende Ruetépe.

17Pende rógagui pegueruva’erã mokõi pan ojejapova’ekue 4,4 lítro trígo ku’i porãgui, ha levadúra reheve kuave’ẽmby oñemyatymoi ypy ramo pende Ruetépe g̃uarã.

18Ha umi pan reheve peikuave’ẽta 7 ovecha ra’yrusu iporãitéva oguerekóva peteĩ áño, ha peteĩ tóro ra’yrusu, ha mokõi ovecha mácho; ko’ãva pehapýta kuave’ẽmby ramo pemomba’eguasúvo pende Ruetépe, ha umi kuave’ẽmby reheve peguerúta avei víno, kuave’ẽmby hendypáva ramo hyakuã asy hag̃ua pende Ruetépe g̃uarã.

19Peikuave’ẽva’erã avei peteĩ kavara mácho kuave’ẽmby angaipa reheguáva ramo, ha mokõi ovechara’y oguerekóva peteĩ áño, kuave’ẽmby py’aguapy reheguáva ramo.

20Ha pe pa’i oikuave’ẽva’erã umía kuave’ẽmby oñemyatymoiva ramo pende Ruete renondépe, umi mokõi pan ypykuéva ha mokõi ovecha ra’yrusu reheve; ko’ã mba’e oñemboykégui pende Ruetépe, opyta pa’ípe g̃uarã.

21Ko araitépe pehenoimbáta atyguasúpe; mba’eveichagua tembiapo ndapejapoiva’erã; kóva peteĩ tembiapoukapy peẽme ha pene ñemoñarenguérape g̃uarã mamo peikoha rupi.

22Pemono’õ ramo pende kóga ra’ỹi, napemono’õiva’erã pende kokue rembe’yete peve, ha ndapejeporekái jevyva’erã umi mba’e ho’ava’ekuére, hembyre topytã mboriahu ha tetã ambueyguápe g̃uarã, Che ningo Jahve, pende Jára.

23Ha Ñanderuete oñe’ẽ Moiséspe, ha he’i:

24Eñe’ẽ Israel ñemoñarenguérape ha ere ichupekuéra: Pe jasy 7-hápe, (Octúbre), pe jasy oñepyrũha árape, peguerekóta jepytu’uha ára, penemomandu’a hag̃ua oñembopúta turu, pejupa hag̃ua atyguasúpe che rogaguasu oĩháme.

25Mba’eveichagua tembiapo ndapejapoiva’erã; ha peikuave’ẽva’erã kuave’ẽmby hendypáva pende Ruetépe g̃uarã.

26Ñanderuete oñe’ẽ Moiséspe, ha he’i:

27Ko jasy 7-ha, pe ára 10-hápe oikóta avei atyguasu che rogaguasu oĩháme, peñemoĩ porã jevy hag̃ua pende Ruete ndive peñemomirĩ ha pekaru’ỹ, ha peikuave’ẽva’erã kuave’ẽmby hendypáva pende Ruete, pende Járape g̃uarã.

28Mba’eveichagua tembiapo ndapejapoiva’erã ko ára kóvape; péva penemoĩ porã ha peiko porã jevy hag̃ua pende Ruete, pende Jára renondépe.

29Opaite tapicha okarúva pe ára pévape, ojejukáta hetãyguakuéra apytégui, peẽ pendepy’a nandiva’erã.

30Ha oimeraẽ tapicha ojapóva oime haichagua tembiapo pe ára pévape, Che voi ahundíta upe tapicha upévape hetãyguakuéra apytégui.

31Mba’eveichagua tembiapo ndapejapoiva’erã; ko ñe’ẽ kóva peteĩ tembiapoukapy peẽme ha pene ñemoñarenguérape g̃uarã mamo peikoha rupi.

32Kóva ningo jepytu’uha ára peẽme g̃uarã, peñemomirĩ, ha ndapekaruiva’erã pe ára 9-ha, ka’arupytũ guive ambue ára ka’arupytũ meve.

33Ha Ñanderuete oñe’ẽ Moiséspe, ha he’i:

34Eñe’ẽ Israel ñemoñarenguérape ha ere ichupekuéra: Ko jasy 7-hápe, pe ára 15-ha guive 21-ha peve, 7 ára pukukue, pemboaretéta ko enramada, ko arete pukukue aja peikóta pindo rogue guýpe.

35Pe oñepyrũha árape oikóta atyguasu; mba’eveichagua tembiapo ndapejapoiva’erã.

36Siéte ára pukukue peikuave’ẽva’erã kuave’ẽmby hendypáva pende Ruetépe g̃uarã; ha pe ára 8-hápe peguereko jevýta atyguasu, ha pe arete pévape peikuave’ẽva’erã kuave’ẽmby hendýva pende Ruetépe g̃uarã, mba’eveichagua tembiapo ndapejapoiva’erã.

37Ko’ãvahína umi areteguasu pende Ruete mba’éva ha umi árape peñembyatyva’erã atyguasúpe, che rogaguasu oĩháme, ha oñekuave’ẽva’erã kuave’ẽmby hendýva Jahvépe g̃uarã, kuave’ẽmby ojehapypáva ha kuave’ẽmby tembi’u reheguáva, kuave’ẽmby angaipa ha víno reheguáva; opaite kuave’ẽmbynguéra hi’óra ha hi’araitépe peikuave’ẽva’erã.

38Pembojoapy avei pende Ruete pytu’uha ára, pende jopoikuéra, pene kuave’ẽmbynguéra ha avei pene kuave’ẽmbynguéra pendejeheguieténte pejaposéva Jahvépe g̃uarã.

39Ha pe jasy 7-hápe, pe ára 15-hápe, pemono’õ rire pende kóga ra’ỹi pejapóta vy’aguasu pende Ruetépe 7 ára pukukue; pe ára tenondegua pytu’uha ára, ha pe ára 8-ha pytu’uha ára jevy.

40Ha pe ñepyrũha árape pembyatýta yvyrarakã iporãva hi’a reheve, pindo rakã, yvyra rakãnguéra ikuarahy’ã porãva, ha sáuce (yvyra rakã pukuete) umi yakã rupiguaréva, ha pevy’a joáta pende Ruete, pende Jára renondépe 7 ára pukukue.

41Ha pejapóta vy’aguasu Jahvépe g̃uarã 7 ára pukukue meme áñope; péva tembiapoukapy peẽme g̃uarã ha opaite pene ñemoñarenguérape g̃uarã; pe jasy 7-hápe pejapopava’erã ko’ã mba’e.

42Yvyra rakã guýpe peikova’erã 7 ára pukukue, mayma Israel ñemoñare guive oikova’erã umía guýpe.

43Pene ñemoñarenguéra oikuaa hag̃ua Che amoingove hague Israel ñemoñarenguérape tapỹi (ráncho) yvyra rakãguiguápe aguenohẽ ramoguare ichupekuéra Egípto retãgui, Che pende Ruete, ha’égui pende Jára.

44Ko’ã mba’e Moises he’i Israel ñemoñarenguérape Jahve areteguasukuéra rehe.

← Chapter 22 Jump to: Chapter 24 →