Leviticus 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Ñanderuete oñe’ẽ Moiséspe, ha he’i:

2Peteĩ tetãygua oñemoangaipa ramo, nomomba’éivo pende Ruetépe nome’ẽsevéigui hapichápe pe mba’e oiporuva’ekue térã ojehejava’ekue ipópe, térã omondára’e hapichágui, térã oipe’ava’ekue mbaretépe hapichágui,

3térã ojohúra’e mba’e kañyngue ha he’i ramo Ñanderuete rérape ndojohúi hague térã oimeraẽ ambue mba’e peteĩ kuimba’e térã kuña oñemoangaipakuaa hapicha ndive;

4péicha ha’e oñemoangaipa ramo ha oporomoñeko’õi ramo, omyengovia jevyva’erã umi mba’e omondava’ekue térã oñongatuva’ekue hapichágui térã pe mba’e kañyngue ojohuva’ekue,

5térã opaite mba’e ohupityva’ekue oñe’ẽme’ẽ reiva’ekue; opaite ko’ã mba’e ome’ẽ jevyva’erã katuete ijárape, ha hi’ári ome’ẽveva’erã 20 por ciénto, upe ára upévape ha’e oikuave’ẽ ramo avei pe kuave’ẽmby ñemyengovia reheguáva.

6Ha pe ijejavy rehe ogueruva’erã peteĩ ovecha mácho iporãva ijovecha atýgui pende Ruetépe g̃uarã, ha pe pa’i ombohepy haguéicha, péva ome’ẽta pa’ípe.

7Ha pe pa’i oikuave’ẽta pe ovecha mácho iporãva oñeperdona hag̃ua ichupe koichagua mba’evai ojapova’ekuére.

8Ñanderuete oñe’ẽ jevy Moiséspe, ha he’i:

9Ere Aaron ha ita’yrakuérape: Kóa ningo pe tembiapoukapy kuave’ẽmby ojehapypáva rehegua: Pe kuave’ẽmby ojehapypáva oĩva’erã pe kuave’ẽmby renda ári, hata hendyva’erã pyhare pukukue ko’ẽmba peve.

10Pe pa’i omondeva’erã ijao líno inimboguiguáva ha icalzoncíllo avei, pe tata ombokusugue rire pe kuave’ẽmby, ha’e omohendáta pe tanimbukue pe kuave’ẽmby renda yke rehe.

11Upéi omboiva’erã ijehegui pe ao linoguiguáva ha omonde ambue ao oguenohẽ hag̃ua pe tanimbu pe tekohágui oka gotýo, peteĩ yvy pehẽngue ipotĩháme.

12Ha pe tata hendýva kuave’ẽmby renda ári ndogueiva’erã, pe pa’i omoĩ jevy jeyva’erã hi’ári jepe’a pyhareve guive ambue pyhareve peve, omohenda hag̃ua hi’ári pe kuave’ẽmby ojehapypáva, ha ohapy hag̃ua hi’ári pe kuave’ẽmby py’aguapy reheguáva kyrakue.

13Pe tata kuave’ẽmby renda pegua tapiaite hendyva’erã, ndogueiva’erã araka’eve.

14Ko’ã tembiapoukapy kuave’ẽmby tembi’u reheguáva: Aaron ra’ykuérante oikuave’ẽva’erã pende Ruete renondépe pe kuave’ẽmby renda ári.

15Umi mba’e apytégui ogueraháta peteĩ po renyhẽ trígo ku’i porã ha acéite oñekuave’ẽtava, ha mba’e ryakuã porã omoĩ hag̃ua pe kuave’ẽmby ári, ha pe pa’i ohapypava’erã; Ñanderuete ohetũ ramo ipy’aporã jevýta hendive, ha pe oikuave’ẽtava omomba’eguasúta ichupe.

16Umi mba’e hembýva Aaron ha ita’yrakuéra ho’uva’erã; levadura ’ ỹre oje’uva’erã pe tenda oñemboykémava pende Ruetépe, pe óga jojohuha korapýpe ha’ekuéra ho’upava’erã.

17Noñembojyiva’erã levadúra reheve, Che amboja’ógui ichupekuéra g̃uarã che kuave’ẽmby hendypyrévagui; kóva ningo mba’e oñemboykéva pende Ruetépe g̃uarã, ku kuave’ẽmby angaipa ha ñemyengovia reheguávaicha.

18Mayma kuimba’e Aaron ra’ykuéra apytépe ho’uva’erã ichugui. Ko ñe’ẽ kóva opyta peteĩ tembiapoukapýicha opaite ára peẽme ha pene ñemoñarenguérape g̃uarã; ha opaite mba’e ojáva guive hese, oñemboykémagui pende Ruetépe g̃uarã.

19Ñanderuete oñe’ẽve Moiséspe, ha he’i:

20Aaron ha ita’yrakuéra oñemonaha árape oikuave’ẽva’erã pende Ruetépe: 2,2 lítro trígo ku’i porã opaite árape g̃uarã; pyhareve toikuave’ẽ 1,1 lítro ha ka’aru pe hembýva 1,1 lítro.

21Ombochyryryva’erã acéite reheve páilape; oikuave’ẽva’erã pehẽngue pehẽnguépe mba’e ryakuã asýva ramo pende Ruetépe g̃uarã.

22Ha umi pa’i, oñemonamava’ekue Aaron ra’ykuéra apytégui, oikuave’ẽva’erã, ko kuave’ẽmby kóva ojehapypava’erã pende Ruetépe g̃uarã, kóa peteĩ tembiapoukapy opaite árape g̃uarã.

23Ko pa’i kuave’ẽmby ojehapypaiteva’erã; ichugui ndoje’uiva’erã mba’eve.

24Ha Ñanderuete oñe’ẽve Moiséspe, ha he’i:

25Eñe’ẽ Aaron ha ita’yrakuérape, ha ere ichupekuéra, ko’ãva ningo kuave’ẽmby angaipa reheguáva rembiapoukapy: Pe tenda ojeajúra kytĩháme pe kuave’ẽmby angaipa reheguáva, upépe ojeajúra kytĩva’erã avei pe kuave’ẽmby ojehapypáva pende Ruete renondépe; péva ningo mba’e oñemboykéva pende Ruetépe g̃uarã.

26Pe pa’i oikuave’ẽva pe kuave’ẽmby angaipa reheguáva, ho’uva’erã avei ichugui tenda oñemboykemava’ekue pende Ruetépe, pe óga jojohuha korapýpe.

27Opaite mba’e ojáva guive ho’okue rehe oñemboykeva’erã pende Ruetépe g̃uarã ha ohypýi ramo huguykue ijao rehe, ojejoheiva’erã tenda oñemboykemava’ekuépe pende Ruetépe g̃uarã.

28Ha pe ólla ñay’ũguiguáva oñembojy haguépe, ojejokava’erã; ha oñembojy ramo ólla bronceguiguávape ojekytyva’erã ha ojejohéi porãva’erã ýpe.

29Pa’ikuéra ñemoñare kuimba’éva guive ikatu ho’u ichugui; péva ningo mba’e oñemboykémagui pende Ruetépe g̃uarã.

30Ndoje’uiva’erã mba’eveichagua kuave’ẽmby angaipa rehegua ro’okue ojegueru ramo huguykue óga jojohuhápe; tatápe ojehapypava’erã ko kuave’ẽmby kóva.

← Chapter 5 Jump to: Chapter 7 →