Luke 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Ko’ã mba’e rire Hesu omondo ambue 72 hemimbo’épe mokõi mokõime omyasãi hag̃ua iñe’ẽ umi táva Ha’e ohotahápe,

2ha he’i ichupekuéra: Añetehápe oĩ heta mba’e ñamono’õ hag̃ua, mbovymi katu oĩ umi omono’õva, upévare pejerure katu pe kokue Járape ombouve hag̃ua umi mono’õhára ikokueguasúpe g̃uarã.

3Tapeho, ha peikuaa porãke, Che pomondo ovecháicha aguara guasukuéra apytépe.

4Ani pegueraha pirapire, ni vosa, ni sapatu, ha ani pepyta tapére pemomaitei hag̃ua avavépe.

5Ha opaite óga peg̃uahẽháme, peje raẽ: Ta’ipy’aguapy opaite ko’ã ogayguakuéra.

6Ha upe óga upévape oiko ramo peteĩ ohayhúva pe py’aguapy, pende py’aguapy oñembohasáta avei ichupe g̃uarã, ha ndaipóri ramo avave ohayhúva py’aguapy, pe py’aguapy ojevýta peẽme g̃uarã.

7Upe óga upévape pepyta, pekaru ha pemboy’u oñeme’ẽva guive peẽme, pe omba’apóva ningo ohupity avei hembiapo repy. Ani pehasapeína peteĩ ógagui ambueha ógape.

8Ha opaite táva peikehápe ha penemog̃uahẽ porã ramo pepyta ha pe’u oñeme’ẽva guive peẽme,

9ha pemonguera umi hasývape, ha peje ichupekuéra: Pene rendápe oñemoag̃uíma Ñanderuete retãguasu.

10Ha oĩ ramo peteĩ táva napenemog̃uahẽiva, pesẽ okápe, ha peje:

11Pe yvy timbo ojáva ore py rehe jepe pende távagui, roityvyro jey pendeári oñemoĩ hag̃ua penderehe, ha peikuaa porãke Ñanderuete retãguasu oñemoag̃ui hague pene rendápe.

12Che voi ha’e peẽme: Sodomayguakuérape oñeperdonaveva’erã upe táva upévagui.

13Angái nde Corazin, angái nde Betsáida. Tíro ha Sidónpe ojejapo rire umi milágro ojejapova’ekue pende apytépe, ymáma oñembyasyva’erãmo’ãha, ao vosakue reheve, oguapyva’erãmo’ã tanimbúpe ha opoiva’erãmo’ã hape vaígui.

14Upévare ivevuiveva’erã pe castígo oñeme’ẽtava Tíro ha Sidónpe pendehegui pe ñembojovakeha árape.

15Ha nde Capernaum, reimo’ãva reñemopu’ãtaha yvága peve, katuete rejeitýta añaretã meve.

16Oimeraẽ penerendúva guive, cherendu chéve avei, ha oimeraẽ penemboykéva, chemboyke chéve avei, ha oimeraẽ chemboykéva omboyke avei pe chembouva’ekuépe.

17Ha umi 72 hemimbo’e ojevy vy’apópe Hesu rendápe, ha he’i: Ore Jára, ore ikatu romosẽ nde rérape mba’epochykuérape jepe.

18Hesu katu he’i ichupekuéra: Che ahechava’ekue Satana, aratirícha ho’a ramo yvágagui.

19Peikuaa porãke, Che pombopu’akáta pepyrũ hag̃ua mbói ha alacran rehe, ha pendepu’aka hag̃ua Satana rehe, ha’e katu ndaikatúi ojapo mba’eve ivaíva penderehe.

20Ani pevy’aite pemosẽ haguére umi mba’epochýpe, pevy’a uvei pende réra ojehai haguére yvágape.

21Ha pe hóra pévape Hesu ovy’aite Ipytu Porãme ha he’i: Che Ruete, yvy ha yvága Jára, Che romomba’eguasu, reñomi hag̃uére ko’ã mba’e iñarandúva ha heta mba’e oikuaávagui, ha rehechauka hag̃uére umi itavývape. Upeichaite voi Nde reipotava’ekue.

22Opaite mba’e che Ruete omoĩma che pópe. Avave ndoikuaái pe Ta’ýrape, pe Túvamante. Ha avave ndoikuaái pe Túvape, Ita’ýramante, ha Ha’e oikuaaukasévapemante oikuaaukáta.

23Ha oma’ẽvo hemimbo’ekuérare he’i ichupekuéra: Ovy’aite pe tesa ohecháva peẽ pehechavapeína.

24Añetehápe Che ha’e peẽme, heta proféta ha tetã ruvichakuéra ohechaseva’ekue peẽ pehechavapeína ha ndohechái hikuái, ha’ekuéra ohenduseva’ekue peẽ pehenduvapeína, ha nohendúi hikuái.

25Upéi ou peteĩ oporombo’éva Ñanderuete kuatiañe’ẽ oipy’ara’ã hag̃ua Hesúpe ha he’i: Mbo’ehára, mba’épa ajapova’erã ahupity hag̃ua pe tekove tapia g̃uarãva.

26Ha Hesu he’i ichupe: Mba’épa Moises rembiapoukapykuérape he’i, ha mba’épa rejohu ipype.

27Ha ha’e ombohovái Hesúpe he’ívo: Rehayhuva’erã Ñanderuetépe nde py’aite guive, ha opaite ne ánga ha nde pu’aka reheve, ha opaite ne pensamiénto reheve ha ehayhu nde rapichápe nde voi rejehayhu haichaite.

28Hesu he’i ichupe: Ere porãite, péicha rejapo ramo, reikovéta.

29Ha’e katu ndovy’ái ko ñembohovái kóva rehe, ha oporanduve Hesúpe: Ha he’i máva piko che rapicha.

30Ha Hesu ombohovái ichupe: Peteĩ kuimba’e oguejy ohóvo Jerusaléngui Jerico gotýo ha ohokuévo ho’a mondahakuéra pópe, ha’ekuéra oipe’apa ichugui oguerekóva guive, oinupã vaipa ha ojuka vaivaíma ramo ichupe oje’ói hikuái, ha oheja rei ichupe.

31Kurimive ohasa upe tape rupi peteĩ pa’i, ha ohechávo upe omanombotávape, ojere ichugui ha ohasánte.

32Upéi ou peteĩ Levigua, ha ohechávo upe omanombotávape, ojere ichugui ha ohasa meme avei.

33Péva rire ou peteĩ Samariaygua, ha kóva ohechávo upe omanombotávape, oiporiahuvereko ichupe.

34Oñemboja hendápe oipohãno hag̃ua ichupe acéite ha vínope ha ojokua porã hag̃ua iñenupã hague ha ohupi ichupe henda ári ha ogueraha ichupe peteĩ mbohupa rógape oñangareko hag̃ua hese.

35Ko’ẽmbávo oguenohẽ mokõi ára tembiapo repy ha ome’ẽ pe mbohupa róga járape ha he’i ichupe: Eñangarekomína chéve pe hasýva rehe, ha nde reipohãnovéta ramo che amyengoviáta ndéve ajukuévo.

36Mávapa ko’ã mbohapy apytégui, hi’ã ndéve, pe hasýva rapichaha.

37Ha upe oporombo’éva Ñanderuete kuatiañe’ẽ rehe he’i Hesúpe: Upe oiporiahuverekova’ekue ichupe.

38Ha Hesu ohóvo tape rupi og̃uahẽ peteĩ tava’ípe ha oike ipype. Ha peteĩ kuñakarai, hérava Márta, omog̃uahẽ ichupe hógape.

39Márta kypy’y, hérava María, oguapy Hesu py renondépe ojapysaka porã hag̃ua iñe’ẽ rehe.

40Márta katu ojepy’apy hóga rembiapoita rehe ha upévare oñemboja Hesu rendápe ha he’i ichupe: Che Jára, nderehechakuaái piko che kypy’y cherejaha che año ajapopa hag̃ua ko óga rembiapo. Eréna ichupe, ha’e tachepytyvõ.

41Hesu katu he’i ichupe: Márta, Márta, nde rejepy’apy heta mba’e rehe ha reñemoangekõiete;

42peteĩ mba’énte oñekotevẽva, ha péva María oiporavóma, ndojepe’amo’ãi ichugui.

← Chapter 9 Jump to: Chapter 11 →