Luke 9 — Guarani 2015 (Ñanderuete Ñe’ẽ Porã 2015)

7Ha pe mburuvichaguasu Heródes ohendúvo opaite mba’e Hesu ojapóva hetãme ojepy’apyete, ha ndoikuaái mba’épa ojapóta; oĩ umi he’íva Juan oñemoingove jevyha,

8ambuekuéra katu he’i Hesu rehe, Ha’e ningo Elías, ambueve katu he’i Hesu ha’eha peteĩ profetakue oñemoingove jeýmava.

9Heródes katu he’i: Juan Bautístape che añakã’oukava’ekue, máva katu piko aipóramo kóva, hese ahendúma heta mba’e. Ha Heródes oñeha’ã ohecha hag̃ua Hesúpe.

10Ha Hesu remimbo’ekuéra ou jey rire omombe’u hikuái opaite mba’e ojapova’ekue. Ha Hesu oñemoha’eño hendivekuéra pe táva Betsáida ypýpe.

11Ha hetãyguakuéra oikuaávo péva oho hapykuéri. Ha og̃uahẽvo hendápe, Hesu oñe’ẽ ichupekuéra Ñanderuete retãguasu rehe, ha omonguera umi hasývape.

12Ha umi 12 hemimbo’e oñemboja Hesu rendápe ha he’i ichupe: Ka’aru pytũma, upévare emondóna tetãyguakuérape oho tava’ikuérape ha umi óga oĩva guive ñande jerekuévo ojohu hag̃ua hembi’urã, ñaime ningo ñaína desiértope.

13Hesu katu he’i ichupekuéra: Pemongaru peẽ voi ichupekuéra. Ha’ekuéra ombohovái Hesúpe: Ore roguereko 5 pan ha mokõi piránte, térãpa roho’arã rojogua tembi’urã ko atyguasu kóvape g̃uarã.

14Ha oñembyatýma ningo 5.000 kuimba’e rupi. Hesu katu he’i hemimbo’ekuérape: Pemboguapy ichupekuéra aty atýpe, 50 kuimba’e rupi.

15Ha ojapo hikuái Hesu he’i haguéicha, ha omboguapy ichupekuéra aty atýpe.

16Ha Hesu ojapyhy umi 5 pan ha mokõi pira, ojesaupi yvága rehe ha ohovasa pe tembi’u, upéi oipehe’ã ha ome’ẽ hemimbo’ekuérape ombohasa hag̃ua hetãyguakuérape.

17Opavave ho’u hyg̃uatã porã meve, ha umi tembi’u hembývagui ombyaty jey gueteri 12 ajaka renyhẽ.

18Ha ojehu ningo Hesu oñembo’e rire ha’eñoháme oporandu hemimbo’ekuérape: Mba’épa tetãyguakuéra he’i cherehe, mávapa Che.

19Ha’ekuéra ombohovái ichupe: Oime ningo he’íva Nde Juan Bautistaha; ambue he’i Nde Eliasha; ha ambueve katu Nde ha’eha peteĩ proféta ymaguare, oikove jevýva.

20Upérõ Hesu oporandu ichupekuéra: Ha mba’épa peẽ peje cherehe. Ha Pédro ombohovái ha he’i: Nde ningo pe Crísto, Ñanderuete ombouva’ekue.

21Ha Hesu he’i ichupekuéra anítei peje péva avavetépe.

22Uperire Hesu he’i: Yvyarigua Ra’y ningo ohasa asyva’erã gueteri, ha pa’iguasukuéra ha Juda karai ancianokuéra ha kuatia haiharakuéra omboykeva’erã ichupe, ha ojejukava’erã ha mbohapy ára haguépe oñemoingove jevyva’erã ichupe omanomava’ekue apytégui.

23Ha Hesu he’i opavavépe: Oimérõ ouséva che rapykuéri, toñembyesarái heko yvy ariguágui, tohupi ikurusu ijapére meme ára ha tachesegui.

24Oimeraẽ osalvaséva hekove, ohundiva’erã, ha oimeraẽ hakate’ỹ’ỹva hekove cherehehápe ojesalva va’erã.

25Mba’eichagua provéchopa kuimba’e ha kuñakuéra ohupitýta ha’e oñemomba’epa ramojepe opaite yvy arigua mba’e repy rehe ha upéi ohundírõ hekove térã hi’ánga.

26Upe oguerotĩva che réra térã che ñe’ẽ, pe yvyarigua Ra’y oguerotĩva’erã avei ichupe, ou vove Ñanderuete reko jajaipápe, Hesu jajaipa hi’angelkuéra heko porãva ndive.

27Añetehápe Che ha’e peẽme: Oĩ ningo ko’ã oñembo’ýva apytépe umi omano’ỹva’erãva ohecha peve Ñanderuete retãguasu ñepyrũ.

28Ojehu ningo, ko’ã mba’e rire 8 ára haguépe, Hesu ogueraha hendive Pédro, Juan ha Jacóbo ha ojupi peteĩ cérro ru’ãme oñembo’e hag̃ua.

29Ha Hesu oñembo’e jave hína, hova oñemoambue, ijao oñemomorotĩ ha ojajaipa opytávo.

30Ha ou mokõi kuimba’e, Moises ha Elías, oñemongeta hag̃ua hendive.

31Ha’ekuéra omimbipa avei ha oñe’ẽ Hesu ndive hembiaporã ha iñemanorã rehe Jerusalénpe.

32Pédro ha iñirũnguéra katu hopehyieterei, ha opayetévo ohecha hikuái avei Moises ha Elíaspe imimbikue reheve.

33Ha Moises ha Elías ojei ramoguare Hesu rendágui Pédro he’i Hesúpe: Mbo’ehára iporã ningo ñande japyta ko’ápe, upevarã romopu’ãta mbohapy tapỹi, peteĩ ndéve g̃uarã, ambue Moiséspe g̃uarã ha pe ambue Elíaspe g̃uarã. Ha’e ndoikuaái katu mba’épa he’i.

34Ha Pédro oñe’ẽ jave ou peteĩ arai ha ojaho’i ichupekuéra, ha oñemondyiete hikuái pe arai ojaho’ívo ichupekuéra.

35Ha oñehendu ko ñe’ẽ: Kóva ningo che Ra’y ahayhúva, pehendúke ichupe.

36Ha opa rire pe oñe’ẽva, Hesu opyta jey ha’eño, ha okirirĩ hikuái, ha umi ára umívape ha’ekuéra nde’íri mba’eve avavépe umi mba’e ohechava’ekue rehe.

37Ha pe ára ambuépe ha’ekuéra oguejývo pe cérrogui, peteĩ aty ndetuicháva ou Hesu rendápe.

38Ha peteĩ kuimba’e pe aty apytégui osapukái ha he’i: Mbo’ehára, ajerure ndéve ema’ẽmi che ra’y peteĩmi arekóvare.

39Peteĩ pytu vai ojapyhy ichupe, ombosapukái ha oityvyro hatã ichupe ha ombojuru ryjuipa ichupe, ha sapy’a py’ánte opoi ichugui, ha ikangypa opytávo.

40Ha ajerurékuri ne remimbo’ekuérape omosẽ hag̃ua pe mba’epochýpe, ha’ekuéra katu ndaipu’akái hese.

41Hesu ombohovái ha he’i: Peẽ ñemoñare ñaña ha jerovia’ỹva. Araka’e pevépa Che apytáta penendive ha pogueropu’akáta. Eru katu nde ra’ýpe.

42Ha pe mitãkuimba’e oñembojávo Hesu rendápe, pe mba’epochy oity ichupe yvýre ha oityvyro ichupe, Hesu katu okorói pe mba’epochýpe ha omosẽ ichupe, ha pe mitãkuimba’e okuera opytávo.

43Ha opavave ohecharamoite, ohechávo opaite mba’e Hesu ojapóva guive. Upérõ Hesu he’i hemimbo’ekuérape:

44Pejapysaka porãke ko ñe’ẽ kóva rehe: Pe yvyarigua Ra’y ningo oñeme’ẽta tetãyguakuéra pópe.

45Hemimbo’ekuéra noentendéi katu mba’épa Hesu he’ise ko ñe’ẽ kóva rupi, oñemi opytávo ko ñe’ẽ, ha ndaipy’aguasúi hikuái oporandu hag̃ua ichupe.

46Ha oñepyrũ ojuavy hikuái, mávapa pe ituichavéva ijapytepekuéra.

47Hesu katu oikuaávo ipy’apýpe oĩva, omohenda peteĩ mitãme ijykére,

48ha he’i ichupekuéra: Oimeraẽva omog̃uahẽva ko mitã kóvape che rérape, chéve chemog̃uahẽ. Ha upe chemog̃uahẽva hekovépe, omog̃uahẽ pe chembouva’ekuépe. Upe michĩvéva pende apytépe, upéva ningo pe tuichavéva.

49Upérõ Juan ombohovái ichupe ha he’i: Mbo’ehára, rohecha ningo peteĩ omosẽva mba’epochýpe nde rérape, ha ore rojoko ichupe nañanemoirũigui.

50Hesu katu he’i ichupe: Ani pejoko ichupe, upe oñemoĩ’ỹva ñanderehe, oĩ ñanendive.

51Ha og̃uahẽtama ramo pe ára Hesu ojupi jey hag̃ua Ñanderuete rekohápe, Ha’e oñembopy’apeteĩ oho hag̃ua Jerusalénpe omano hag̃ua.

52Ha Hesu omondo hembijokuái henonderãme ombosako’i hag̃ua hendag̃ua, ha ha’ekuéra oikévo peteĩ Samária pegua távape,

53ha’ekuéra nomog̃uahẽséi ichupekuéra, ohógui Jerusalen gotýo.

54Hemimbo’ekuéra Jacóbo ha Juan ohechávo péva he’i hikuái Hesúpe: Mbo’ehára reipotápa ore rojerure tata yvágagui ho’a hag̃ua hi’arikuéra ohapy hag̃ua ichupekuéra, Elías ojapo haguéicha.

55Hesu oma’ẽ porãvo hesekuéra ojoko ichupekuéra he’ívo: Ndapeikuaái piko mba’eichagua Pytu Porãmáva ra’ykuérapa hína peẽ.

56Pe yvyarigua Ra’y ningo ndoúi oporohundi hag̃ua, oporosalva hag̃ua uvei, ha upéicha oho hikuái ambue tava’ípe.

57Ha oho aja hikuái, peteĩ kuimba’e tapére oĩva, he’i Hesúpe: Che romoirũse mamo Nde rehohápe.

58Hesu katu ombohovái ichupe: Umi aguara ningo ikuára ha umi guyra árare ovevéva ningo hupa, pe yvyarigua Ra’y katu nahendag̃uái omombytu’u hag̃ua iñakã jepe ko yvy apére.

59Ha ambuépe Hesu he’i: Eju che rapykuéri (chemoirũ hag̃ua). Ha’e katu ombohovái: Che Jára, ehejána taha tañotỹ raẽ che rúpe.

60Hesu katu he’i ichupe: Ehejána umi omanóva toñotỹ omanóvape, nde katu tereho ha emombe’u Ñanderuete retãguasu reheguáva.

61Ambueve katu he’i Hesúpe: Che romoirũse, che Jára. Ehejána che tajedespedi che rogayguakuéragui.

62Ha Hesu ombohovái ichupe: Peteĩ kuimba’e ojapyhy ramo pe arádo (ojo’o hag̃ua ikokue yvy), ha oma’ẽ ramo hapykue gotýo, ndaijái ichupe (ndaikatupyrýi) oike hag̃ua Ñanderuete retãguasúpe.