Luke 7 — Guarani 2015 (Ñanderuete Ñe’ẽ Porã 2015)

1Hesu omoñe’ẽmbávo ko’ã mba’e ko’ãva opavave resa renondépe, Ha’e oike Capernaúmpe.

2Peteĩ soldádo ruvicha rembiguái hasyete, omano hag̃uáicha, ijára peteĩ Romaygua ruvicha ohayhuetéva ichupe.

3Ha ko soldádo ruvicha kóva ohendúvo Hesu ojapo hague heta milágro, omondo umi Israel karai anciáno Hesu rendápe, ojerure Hesúpe ou ha omonguerami hag̃ua hembiguáipe.

4Ko’ã karai anciáno og̃uahẽvo Hesu rendápe ojerure asy Hesúpe omoirũ hag̃ua ichupekuéra pe soldádo ruvicha róga peve ha he’i: Iporãiteva’erã Nde reho ramo hendápe reipytyvõ hag̃ua ichupe.

5Ha’e ningo ohayhu añetehápe ñane retãyguakuérape, ha ha’e voi omopu’ãuka oréve g̃uarã Ñanderuete róga.

6Ha Hesu omoirũ ichupekuéra. Ha Hesu oñemoag̃uívo pe Romaygua rógagui, ha’e he’iuka Hesúpe iñirũnguéra rupi: Karaiguasu, ani reñemyangekõive, che ningo ndachereko potĩriva, nde reike hag̃ua che rogaguýpe.

7Upévare ndaijái chéve, che voi aha hag̃ua ne rendápe, eremínte peteĩ ñe’ẽ ha che rembiguái okueráta katuete.

8Che ningo peteĩ kuimba’e aguerekóva che poguýpe soldadokuéra ha che ha’e ramo peteĩme: Tereho, ha’e oho, ha che ha’e ramo ambuépe: Eju, ha’e ou. Ha che ha’e ramo che rembiguáipe ejapo ko mba’e: Katuete ha’e ojapo.

9Hesu ohendúvo péva, oguerohory, ha oñembojere he’ívo opavave omoirũva guivépe ichupe: Añetehápe Che ha’e peẽme: Israelguakuéra apytépe ndajohúi gueteri koichagua jerovia tuicháva.

10Ha umi ojejokuáiva’ekue ojevývo pe soldádo ruvicha rógape, ojohu pe tembiguái péva okueraitéma.

11Uperire Hesu oho peteĩ távape, hérava Nain, hemimbo’ekuéra ha heta hetãyguakuéra omoirũ ichupe.

12Ha oñemoag̃uívo pe táva rokẽguasúgui, ojegueraha okápe peteĩ karia’y omanóvape oñeñotỹ hag̃uáme. Ha’e ningo isy memby peteĩmi, ha isy peteĩ viúda, heta tavaygua omoirũ ichupe.

13Ha Hesu ohechávo pe viúdape, oiporiahuverekoiterei, ha he’i ichupe: Ani rejahe’o.

14Ha Hesu oñemboja ha opoko upe te’õngue ryru rehe, omombyta ha he’i: Mitãrusu, Che ha’e ndéve, epu’ã.

15Ha upevovete pe mitãrusu opu’ã ha oguapy, ha oñepyrũ oñe’ẽ, upérõ Hesu ome’ẽ pe mitãrusu isýpe.

16Ha okyhyjepa joa hikuái ha omomba’eguasu Ñanderuetépe he’ívo: Peteĩ proféta tuichaitéva opu’ã ñande apytépe, Ñanderuete oñandúma hetãme.

17Ha Hesu rerakuã porã oñemyasãi opaite Juda departaménto rupi ha ijerekuévo avei.

18Ha Juan remimbo’ekuéra omombe’upa ko’ã mba’e Juan Bautístape, upéi Juan ohenói mokõi hemimbo’épe,

19omondo hag̃ua ichupekuéra Hesu rendápe, oporanduhávo ichupe: Nde piko upe ouva’erãva, térãpa roha’ãrõveva’erã gueteri ambuépe.

20Ha og̃uahẽvo hikuái Hesu rendápe, he’i: Juan Bautísta orembou ne rendápe roporandu hag̃ua ndéve: Nde piko upe ouva’erãva, térãpa roha’arõveva’erã gueteri ambuépe.

21Upejavete Hesu omonguera hetápe imba’asýgui ha ijejopy vaígui, omosẽvo mba’epochykuérape ha omonguerávo hesatũvape.

22Ha Hesu he’i ichupekuéra: Tapeho pemombe’u Juan Bautístape umi mba’e peẽ pehecháva ha pehendúva: Hesatũva ohecha jey, ijapáva oguata jey, iléprava okuera, ijapysapéva ohendu jey, omanomava’ekue oikove jey, mboriahukuérape oñemombe’u pe evangélio (marandu porã).

23Ha ovy’aite umi oñepysãnga’ỹva cherehe.

24Juan remimbo’ekuéra oho rire, Hesu oñepyrũ oñe’ẽ hetãyguakuérape Juan Bautísta rehe he’ívo: Mba’épa pesẽ pehecha hag̃ua desiértope. Peteĩ takuára pe yvytu ombovavávapa.

25Mba’e piko pesẽ ra’e pehecha hag̃ua. Peteĩ kuimba’e oñemondéva ao porãmepa. Peikuaa porãke, umi ijao hepýva ha vy’apópe oikóva, opyta hogaguasúpe.

26Mba’e piko ra’e pesẽ pehecha hag̃ua, peteĩ proféta piko. Héẽ, Che voi ha’e peẽme, ha’e katu mba’eguasuve peteĩ profétagui.

27Ñanderuete kuatiañe’ẽme oñe’ẽ hese: Peikuaa porãke, amondo che rembijokuái ne renonderãme, ombosako’i hag̃ua nde rape ne renonderãme, (Malaquías 3,1).

28Ha Che ha’e peẽme ndaipóri proféta ituichavéva Juángui, onaceva’ekue guive kuñakuéragui. Upe imichĩvéva katu Ñanderuete retãguasúpe ituichavéta ichugui.

29Opaite tetãyguakuéra, ohenduva’ekue guive ichupe, umi impuésto mono’õhára jepe, ohechakuaa porã Ñanderuete rembipota, ha ojebautizauka Juan bautísmope.

30Fariseokuéra ha umi ombo’éva Moises rembiapoukapykuéra omboyke katu Ñanderuete rape pyahu hekoveteépe g̃uarã, upévare ndojebautizaukái Juan bautísmope.

31Mávarehepa Che ikatu ambojoja ko’ag̃agua kuimba’ekuérape. Mba’épepa ojogua.

32Ojogua ningo umi mitãkuimba’épe oguapýva pe plázape ha osapukáiva ojupe, ha he’i: Rombopu ningo mimby peẽme ha peẽ ndapejerokýi, ropurahéi jahe’o pegua purahéi ha peẽ napenerasẽi.

33Juan ningo ou oporobautiza hag̃ua, ha’e ndo’úi pan ni víno, ha upeichavéramo jepe peẽ peje ha’e oguerekoha ipype peteĩ mba’epochy.

34Pe yvyarigua Ra’y katu okaru ha hoy’u, ha peẽ peje: Peikuaa porãke, ko kuimba’e kóva ikaruguasu ha ika’u, impuésto mono’õhára ha angaipavóra irũ (rayhupára).

35Ñanderuete arandu oñemoañeteva’ekue Hesu Crísto rembiapo rupi ha opavave ojeroviaitéva guive hese oikuaa porã voi ko añetegua kóva.

36Peteĩ fariséo, hérava Simon, ojerure Hesúpe okaru hag̃ua hendive, ha Hesu oike pe fariséo rógape ha oguapyñeno okaru hag̃ua imesápe.

37Ha upe táva upévape oiko peteĩ kuña heko vaíva, ha’e oikuaávo Hesu oĩha pe fariséo mesápe, ogueru peteĩ botélla henyhẽva mba’e ryakuã porãvagui.

38Ha pe kuña péva ou hapykuéguio oñesũ Hesu py renondépe, oñepyrũ ojahe’o ha omyakỹ Hesu pykuéra hesaýpe, omokã jey iñakã raguépe, ohetũ ipy, ha oipichy imba’e ryakuã porã reheve Hesu pykuéra.

39Pe fariséo oconvida va’ekue Hesúpe, ohechávo péva he’i ipy’apýpe: Ko kuimba’e kóva añetehápe proféta rire, oikuaava’erãmo’ã mávapa pe opokóva hese, ha mba’eichagua kuñápa ha’e, ha’e ningo peteĩ kuña reko vaíva.

40Upérõ Hesu he’i ichupe: Nde Simon, amombe’use ndéve peteĩ mba’e. Ha Simon ombohovái: Ere katu, mbo’ehára.

41Mokõi kuimba’e odeve pirapire hapichápe. Peteĩ odeve 500 ára tembiapo repy ha pe ambue 50 ára tembiapo repy.

42Mokõivéva ndaikatuiete omyengovia pe pirapire odevévape, ha upe karai ipy’a porãgui, oheja rei ha operdona mokõivévape. Máva piko, ko’ã mokõi apytégui ohayhuvéne pe odeveva’ekuépe.

43Simon ombohovái he’ívo: Hi’ã ningo chéve upe hetavévape oheja reiva’ekue. Ha Hesu he’i ichupe: Añetehápe, ere porã.

44Ha Hesu oñembojerévo pe kuña gotýo, he’i Simónpe: Rehechápa ko kuña kóvape. Aikékuri nde rógape, nde katu nereme’ẽi chéve y ajepyhéi hag̃ua, kóva katu omyakỹ hesaýpe che pykuéra, ha omokã jevy hi’ávape.

45Nde nacheretũi, kóva katu oike guive ohetũ che pykuéra.

46Nde neremoĩri acéite che akã rehe, ha’e katu oipichy imba’e ryakuã porã che pykuérare.

47Upévare, Che ha’e ndéve Simon: Ichupe g̃uarã oñeperdonáma iñangaipa heta, ha’e ohayhu hetágui. Upe michĩ oñeperdonava’ekue michĩ ohayhuva’erã avei.

48Upémaramo Hesu he’i pe kuñáme: Ne angaipakuéra oñeperdonáma.

49Upérõ umi okarúva guapyñenoháme Simon mesápe he’i joa ipy’apýpe: Máva piko kóva, ikatúva oporoperdona angaipa avei.

50Hesu katu he’i pe kuñáme: Nde rejerovia porãgui rejesalváma, tereho py’aguapýpe.