Luke 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Ha ojehu ningo pe Róma retã ruvichaguasu Tibério oisãmbyhývo 15 áño, ha Póncio Piláto oisãmbyhývo Juda departaméntope, ha Heródes oisãmbyhývo Galiléa departaméntope, ha ityvýra Felípe oisãmbyhývo Ituréa ha Traconíte, ha Lisánias oisãmbyhy Abilénepe,

2Ñanderuete ñe’ẽ og̃uahẽ Juan, Zacarías ra’ýpe, ha’e oĩ jave desiértope, ha umi mokõi pa’iguasu Anas ha Caifas oiko aja.

3Ha Juan Bautísta omombe’u opaite ysyry Jordan rembe’ýpe: Hetãyguakuéra ojohutaha perdon hi’angaipakuéragui oñembyasyete ramo ojapo vai haguére ha ojebautizauka ramo.

4Ojehai háicha Isaías kuatiañe’ẽme: Oĩ ningo desiértope peteĩ oñe’ẽ hatãva: Pembosako’i katu Ñandejára raperã, pemyatyrõ hape po’i (Isaías 40,3-5).

5Opaite cerrokuéra pa’ũ (válle) oñemyenyhẽva’erã, ha opaite cérro oñembopepava’erã, ha umi tape ikarẽva oñemokarẽ’ova’erã, ha umi tape ijoja’ỹva, oñembojojava’erã.

6Ha opaite tetãyguakuéra ohechava’erã Ñanderuete salvacion.

7Upérõ Juan he’i hetãyguakuérape osẽva hendápe ojebautizauka hag̃ua: Peẽ mbói ñemoñare. Máva piko he’i peẽme, peẽ ikatuha pekañy pe jehaviraguasu oútavagui.

8Pehechauka pende a (rembiapo porã) porã rupi, peñembyasyha añetehápe peiko vai haguére, ha anítei peñepyrũ peje pendejupe: Ore ru ningo Abraham. Che ningo ha’e voi peẽme Ñanderuete ikatuha omoingo ko’ã itágui jepe Abraham ra’yrãnguéra.

9Ha pe hácha oñemoĩma pe yvyra rehe ojeity hag̃ua, opaite yvyra hi’a porã’ỹva ojeitýta ha oñemombóta tatápe,

10hetãyguakuéra oporandu ichupe he’ívo: Mba’e piko ore rojapova’erã.

11Juan ombohovái ichupekuéra ha he’i: Upe icamisa mokõiva tome’ẽ oguereko’ỹvape, ha upe hembi’úva, tome’ẽ upe oguereko’ỹvape.

12Juan rendápe oñemboja avei impuésto omono’õva ojebautizauka hag̃ua, ha oporandu hikuái: Mbo’ehára, mba’e piko ore rojapova’erã.

13Ha Juan he’i ichupekuéra: Ani pejerureve umi mburuvicha omono’õukava’erãgui.

14Ha soldadokuéra oporandu avei ichupe, ha he’i: Mba’e piko ore rojapóta. Ha Juan he’i ichupekuéra: Ani peiporu vai pende pu’aka, ani pejopy rei avavépe, ha pevy’ánte pene rembiapo repy reheve.

15Umi oñembyatýva ojepy’amongeta Juan rehe he’ívo: Kóva ha’énepa pe Crísto.

16Upérõ Juan he’i opavave renondépe: Che ningo añetehápe pobautiza ýpe, che rapykuéri katu ouhína pe Ipu’akavéva chehegui, ndaijái chéve ajora hag̃ua isapatu sãnte jepe, Ha’e pendebautizáta Pytu Porãmbáva ha tata reheve.

17Ipópe oĩma pe yrupẽ, omopotĩ hag̃ua pe trígo ra’ỹi, oñongatu hag̃ua pe trígo hógape ha pe trígo pirekue katu Ha’e ohapyukáta tata ogue’ỹtavape araka’eve.

18Upéicha Juan oporomomarandu ha ohekombo’e heta hetãyguakuérape, ha omombe’u pe evangélio.

19Heródes katu, pe Galiléa retã ruvicha, omoinge Juánpe cárcelpe ha’e he’i haguére ichupe naiporãiha ha’e oiko Herodías, ityvýra rembireko ndive, ha heta ambueve mba’evai ha’e ojapova’ekue rehe,

20upévare Heródes oity Juánpe cárcelpe.

21Upéva mboyve ningo Juan obautiza va’ekue heta hetãyguakuérape, ha obautiza avei Hesúpe, ha oñembo’e jave hína ojepe’a pe yvága,

22ha ojehecha oguejyha Hesu ári pe Pytu Porãmbáva peteĩ pykasúicha, ha oñehendu yvágagui peteĩ ñe’ẽ he’íva: Nde ningo che Ra’y ahayhúva ha chepy’aroryetéva.

23Ha Hesu oñepyrũvo hembiapo oguereko 30 áño rupi. Ojeguerovia ningo, oje’e háicha, Hesu Jose ra’yha, ha Jose Eli ra’yre,

24ha kóva Matat ra’yre, kóva Levi ra’yre, kóva Melqui ra’yre, kóva Jannai ra’yre, kóva Jose ra’yre,

25kóva Matatías ra’yre, kóva Amos ra’yre, kóva Nahum ra’yre, kóva Hesli ra’yre, kóva Nangay ra’yre,

26kóva Maat ra’yre, kóva Matatías ra’yre, kóva Semei ra’yre, kóva Jose ra’yre, kóva Juda ra’yre,

27kóva Joana ra’yre, kóva Resa ra’yre, kóva Zorobabel ra’yre, kóva Salatiel ra’yre, kóva Néri ra’yre,

28kóva Melqui ra’yre, kóva Addi ra’yre, kóva Cosam ra’yre, kóva Elmadam ra’yre, kóva Er ra’yre,

29kóva Josue ra’yre, kóva Eliezer ra’yre, kóva Jorim ra’yre, kóva Matat ra’yre,

30kóva Levi ra’yre, kóva Simeon ra’yre, kóva Juda ra’yre, kóva Jose ra’yre, kóva Jonam ra’yre, kóva Eliaquim ra’yre,

31kóva Melea ra’yre, kóva Mainan ra’yre, kóva Matata ra’yre, kóva Natan ra’yre,

32kóva David ra’yre, kóva Isay ra’yre, kóva Obed ra’yre, kóva Booz ra’yre, kóva Salmon ra’yre, kóva Naason ra’yre,

33kóva Aminadab ra’yre, kóva Admin ra’yre, kóva Aram ra’yre, kóva Esrom ra’yre, kóva Fares ra’yre, kóva Juda ra’yre,

34kóva Jacóbo ra’yre, kóva Isaac ra’yre, kóva Abraham ra’yre, kóva Tare ra’yre, kóva Nacor ra’yre,

35kóva Serug ra’yre, kóva Ragáu ra’yre, kóva Peleg ra’yre, kóva Eber ra’yre, kóva Sala ra’yre,

36kóva Cainan ra’yre, kóva Arfaxad ra’yre, kóva Sem ra’yre, kóva Noe ra’yre, kóva Lamec ra’yre,

37kóva Matusalen ra’yre, kóva Enoc ra’yre, kóva Jared ra’yre, kóva Maleleel ra’yre, kóva Cainan ra’yre,

38kóva Enos ra’yre, kóva Set ra’yre, kóva Adan ra’yre, kóvape Ñanderuete ojapova’ekue omoingove hag̃ua.

← Chapter 2 Jump to: Chapter 4 →