Luke 23 — Guarani 2015 (Ñanderuete Ñe’ẽ Porã 2015)

1Opu’ãmba hikuái umi ijatyva’ekue ha ogueraha Hesúpe mburuvicha Piláto rendápe.

2Ha oñepyrũ omoĩ vai hag̃ua hikuái Hesúpe mburuvicha Piláto renondépe, he’ívo: Rojohu ningo pe ombyaíva ñane retã. Ha’e he’i norome’ẽiva’erãha impuésto Róma retã ruvichaguasúpe, ha he’i avei ijehe ha’eha pe Crísto, Israel retã ruvichaguasu.

3Upévo Piláto oporandu Hesúpe he’ívo: Nde piko Juda retã ruvicha. Ha Hesu ombohovái: Héẽ, Che ha’e.

4Upérõ Piláto he’i pa’i ruvichakuérape ha umi ijatývape: Mba’eveichagua mba’evai ningo ndajohúi ko kuimba’e kóva rehe.

5Ha’ekuéra he’i Pilátope: Ha’e oipota opaite Israelguakuéra oñemoĩ Róma retã ruvichaguasu rehe, oñepyrũ Galiléa guive og̃uahẽ meve Judéa peve.

6Piláto ohendúvo péva, oporandu Hesúpe: Nde piko peteĩ Galileaygua.

7Ha oikuaávo Hesu oiko hague Galiléape, oguerahauka ichupe Heródespe, Galiléa departaménto ruvicha rendápe, og̃uahẽmava avei Jerusalénpe areteguasurãme.

8Heródes ohechávo Hesúpe ovy’aite, yma guive voi ohechase ichupe, ohendu haguére heta mba’e Hesu rehe ha oha’ãrõ Hesu ojapotaha peteĩ milágro henondépe.

9Heródes oporandu heta mba’e Hesúpe, Hesu katu nombohováiri mba’evetépe ichupe.

10Upépe oñembyaty avei pa’i ruvichakuéra ha kuatia haihára omoĩ vai hag̃ua Hesúpe Heródes renondépe.

11Upévare Heródes, isoldadokuéra ndive, ndojapói ichupe mba’eve ramo ha oñembohory hag̃ua Hesúre omonde hese peteĩ ao ojegua ha overapáva, ha omondo jevy ichupe Piláto rendápe.

12Ha pe ára guive Heródes ha Piláto oiko porã jevy oñondive, pe ára péva mboyve oiko vaiva’ekue oñondive.

13Upérõ Piláto ombyaty pa’i ruvichakuérape, karai ancianokuérape ha Judayguakuérape,

14ha he’i ichupekuéra: Peẽ pegueru che rendápe ko kuimba’épe ha peje Ha’e ombyaiha pene retã ha peipota che acondena ichupe, che katu ndajohúi hekovépe mba’eve ivaíva ajukauka hag̃ua ichupe.

15Heródes jepe ndojohúi hese mba’eve ivaíva, ha ombou jevy ichupe che rendápe.

16Upévare ainupãukátante ichupe ha upéi apoíta ichugui.

17Pe areteguasu páscua jave ningo ojepokuaa ojepoi peteĩ cárcel peguágui.

18Upémaramo tetãyguakuéra osapukái joa he’ívo: Ejukauka Hesúpe, ha epoi oréve Barrabásgui.

19Ko Barrabas ojeapresava’ekue oñemoĩ haguére tetã ruvicháre ha oporojuka haguére avei.

20Piláto oñe’ẽ jevy katu Judayguakuérape, ha’e opoiségui ichupekuéra Hesúgui.

21Ha’ekuéra katu osapukái hatãve he’ívo: Emosãingo kurusúre, emosãingo kurusúre.

22Ha’e katu oñe’ẽ mbohapyha jevy ichupekuéra he’ívo: Mba’eichagua mba’evai piko kóva ojapóra’e. Che ningo ndajohúi mba’eve ivaíva hese ajukauka hag̃ua ichupe, ainupãukáta ichupe ha upéi apoíta ichugui.

23Ha’ekuéra katu sapukaipópe ojerure hatã jey jey oñemosãingo hag̃ua Hesúpe kurusúre, ha ipahápe ipu’aka hese.

24Upémaramo Piláto omoneĩ ojukauka hag̃ua Hesúpe,

25ha opoiuka Barrabásgui, oñemoingemava’ekue cárcelpe oñemoĩ haguére tetã ruvicháre ha oporojuka haguére. Upéicha Piláto ojapopa ha’ekuéra ojeruréva, ha ome’ẽ Hesúpe ipopekuéra ojukauka hag̃ua kurusúre.

26Ha ojegueraha Hesúpe oñemosãingo hag̃ua kurusúre, ha tapére ojapyhy Simon Cireneygua, ikokuégui ouvahína, ogueraha hag̃ua Hesu kurusu hapykuéri.

27Heta tetãyguakuéra oho Hesu rapykuéri ha kuñakaraikuéra ipyahẽ asy ha ojahe’o hese.

28Hesu katu oñembojerévo he’i ichupekuéra: Peẽ Jerusalen rajykuéra, ani penerasẽ cherehe, penerasẽ uvei pendejehe ha pene membykuéra rehe.

29Og̃uahẽta ningo pe ára oje’etahápe: Ovy’aite ningo umi kuña imemby’ỹva ha umi oporomokambu’ỹva’ekue.

30Upémaramo oñepyrũta hikuái he’i cerrokuérape: Pe’a ore’ári, ha umi yvy atyguasúpe: Orejaho’i.

31Ojehu ramo ko mba’evai kóva yvyra hokývare, mba’eichagua mba’evaietevéva piko ojehuva’erã umi yvyra piru rehe.

32Ojegueraha avei Hesu ndive mokõi oporojukava’ekue oñemosãingo hag̃ua hendive.

33Ha og̃uahẽvo pe Akãngue renda, omosãingo hikuái mbohapyvévape, Hesu imbytepekuéra, ha peteĩ oporojukava’ekue Hesu akatúape ha pe ambue ijasúpe.

34Hesu katu he’i: Che Ru, eperdona ichupekuéra, ndoikuaái ningo pe ojapóva: Ha oñomboja’o hag̃ua Hesu ao rehe umi soldádo oity po’a.

35Israelguakuéra oma’ẽ Hesu rehe, imburuvichakuéra katu oñembohory hese he’ívo: Ambuekuérape osalva, tojesalva Ha’e avei, ha’e ramo añetehápe pe Crísto, Ñanderuete rembiporavopyre.

36Umi soldadokuéra oñembohory avei Hesúre, ha peteĩ oñemboja Hesu rendápe omboy’uka hag̃ua ichupe víno hái (vinágre),

37ambuekuéra he’i: Nde ha’érõ añetehápe Judaygua retã ruvicha, ejesalva ndejupe.

38Hesu akã ári ojehaiva’ekue ningo: Kóva ningo Judaygua ruvicha.

39Ha peteĩ oporojukava’ekue ha oñemosãingóva Hesu ykére oñe’ẽ reity avei ichupe he’ívo: Nde ramo pe Crísto, ejesalvána ha oresalva oréve avei.

40Iñirũ katu okorõi ichupe he’ívo: Nderekyhyjéi piko Ñanderuetégui reime ramo jepe avei ko jehavira kóva poguýpe.

41Ñande ningo jahupity hekópe ñande castígo, ñamono’õnte ñane rembiapo vaikue, kóva katu ndojapói mba’eve ivaíva.

42Ha upéi he’i Hesúpe: Hesu, nemandu’amína cherehe reju vove ne retãguasúpe.

43Ha Hesu ombohovái ichupe: Añetehápe, Che ha’e ndéve, ko ára kóvape reiméta chendive paraísope.

44Ha iñypytũmba asaje pyte guive ka’aru las tres peve.

45Ha kuarahy iñypytũmba, ha oĩ peteĩ aosãingo puku Ñanderuete rogaguasu omboja’óva pe kotyguasu oñemboykéva pa’ikuérape ha pe ambue koty oñemboykéva Ñanderuete ha pa’iguasúpe g̃uarãnte, ha pe aosãingo puku osoro imbytépe.

46Ha sapukaipópe Hesu he’i: Che Ru, nde pópe amoĩ che Pytu Porã. Ha he’ipávo ko ñe’ẽ kóva Ha’e omano.

47Ha pe soldádo ruvicha ohechávo opaite ko’ã mba’e ojehuva’ekue omomba’eguasu Ñanderuetépe ha he’i: Añetehápe ko kuimba’e kóva heko porãva’ekue ha ojejukauka rei.

48Ha umi tetãygua oĩva guive upépe oma’ẽmbávo umi mba’e ojehúva rehe, ñembyasypópe ojepyti’a nupã hikuái ha ojevy joa Jerusalénpe.

49Opaite umi oikuaáva guive ichupe mombyrymi guive oma’ẽ porã opaite mba’e ojehúvare ha hasẽ joa hikuái, hendivekuéra oĩ avei umi kuñakarai omoirũva ichupe Galiléa guive.

50Peteĩ kuimba’e, hérava Jose, oikóva avei umi 70 karai anciáno apytépe ha omyakãva umi pa’iguasu ndive Israel retãme Romayguakuéra poguýpe; ko Jose kóva ningo peteĩ kuimba’e ipy’a porãva ha heko potĩva.

51Ha’e peteĩ Arimateaygua, ha oha’ãrõvahína Ñanderuete retãguasu ou hag̃ua, ha’e ndojohu porãi ambue karai anciáno ombojovake haguére Hesúpe ojejuka hag̃ua, ha upévare nome’ẽi avei iñe’ẽ (ivóto) ichupekuéra, ha’e oñemoĩ uvei hesekuéra.

52Ko Jose kóva oho Piláto rendápe ha ojerure ichupe Hesu retekue rehe.

53Ha’e omboguejy Hesu retekue ikurusúgui ha oñu’ã hetekue peteĩ savanáme ha omoĩ peteĩ itaguasu sepultúra jurúpe, ojejo’oramóva ha noñeñotỹi gueteri avavépe.

54Ha opaite ko mba’e kóva ojehu viérnes sánto árape.

55Ha umi kuñakarai ouva’ekue Hesu ndive Galiléa guive oho hikuái Jose rapykuéri ohecha hag̃ua mba’eichagua tyvýpepa (sepulturapépa) oñeñotỹta Hesúpe.

56Ha ojevy rire hógape ombosako’i hikuái mba’e ryakuã porã oipichy hag̃ua Hesu retekue rehe domíngo árape g̃uarã. Pe sábado katu opytu’u hikuái Moises rembiapoukapy he’i háicha.