Luke 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Ha Hesu oike Jericópe ha ohasávo upérupi,

2ohecha peteĩ impuésto mbyatyhára ruvicha, hérava Zaquéo, imba’e retáva.

3Zaquéo oñeha’ãmba ohecha hag̃ua Hesúpe, ha’e ndaikatúi ohecha ichupe ikarapeitereígui ha hetaitereígui oñembo’ýva Hesu jerére.

4Upévare Zaquéo oñani oñemotenonde hag̃ua ha ojupi peteĩ sicómoro mátare, ohecha porã hag̃ua Hesúpe, Ha’e ohasa ramo henondépe.

5Ha Hesu og̃uahẽvo upépe ojesaupi ha ohechávo ichupe he’i: Zaquéo, pya’e eguejy, Che apytava’erã ko árape nde rógape.

6Upérõ Zaquéo pya’ete oguejy ha vy’apópe ogueraha Hesúpe hógape.

7Ha hetãyguakuéra ohendúvo péva, oñe’ẽngururu ha he’i: E’ána, Hesu oike peteĩ kuimba’e heko vaíva rógape opyta hag̃ua.

8Zaquéo katu oñembo’y ha he’i: Che Jára, amboja’óta che mba’e reta mbyte rupi, ame’ẽ hag̃ua mboriahukuérape peteĩ mbytekue, ha umi che ambotavyva’ekuépe, amyengoviáta ichupekuéra irundy jevyve pe pirapire aipe’a reiva’ekue ichuguikuéra.

9Upérõ Hesu he’i ichupe: Ko ára kóvape ojesalva ko óga jára, ha’e ningo avei Abraham ñemoñare.

10Pe yvyarigua Ra’y ningo ou yvy apére osalva hag̃ua umi oñehundiva’ekuépe.

11Ha ohendu aja hikuái ko’ã mba’e oñemboja ohóvo Jerusalénre. Hetãyguakuéra oimo’ãmba katu ojehechaukapotaha Ñanderuete retãguasu, upévare Hesu omombe’u ichupekuéra ko ñe’ẽ mbojoja kóva, ha he’i:

12Peteĩ karaiguasu oho tetã ambuépe ojeporavouka hag̃ua tetã ruvicha ramo, ha upéi ojevy hag̃ua.

13Oho mboyve ohenói 10 hembiguaikuérape ha ome’ẽ ichupekuéra 30.000.000 guarani rupi, ha he’i ichupekuéra peiporu porã ko pirapire, peñemu oñemboheta hetave hag̃ua aju jevy ramo g̃uarã. (Peteĩteĩme ome’ẽ 3.000.000 guarani).

14Hetãyguakuéra katu he’iuka hapykuerigua peteĩ ñe’ẽ he’íva: Ore ningo ndoroipotái péva opyta ore mburuvicharã.

15Opáichavo pe karaiguasu ojevy mburuvicha ramo, ha ohenói umi 10 hembiguáipe, ome’ẽva’ekuépe ipirapire, peteĩteĩva omombe’u porã hag̃ua mba’épa ojapo ra’e ipirapire reheve ha mboýpa oñembohetave.

16Ha ou pe tembiguái peteĩha ha he’i imburuvichápe: Nde 3.000.000 guaranígui ahupity 30.000.000 guarani.

17Ha pe mburuvicha he’i ichupe: Nde, tembiguái katupyry, nde reñangareko porã haguére ha hekopete che pláta rehe, ame’ẽta ndéve 10 táva reisãmbyhy hag̃ua.

18Ha ou pe tembiguái mokõiha ha he’i imburuvichápe: Nde 3.000.000 guaranígui ahupity 15.000.000 guarani.

19Ha pe mburuvicha he’i avei ichupe: Che ame’ẽta ndéve 5 táva, reisãmbyhy hag̃ua, neakã porãitégui.

20Ha ou pe tembiguái mbohapyha ha he’i imburuvichápe: Karai na’ápe oĩ nde 3.000.000 guarani, añongatuva’ekue peteĩ ao pehẽnguépe.

21Akyhyjégui ndehegui, nde ningo peteĩ karai oporojopýva, ha remono’õva reñotỹ’ỹ hague rupi.

22Upémaramo imburuvicha he’i ichupe: Ne ñe’ẽtee rupi che rombojovakéta nde, tembiguái ñaña. Mba’éicha piko nde reikuaa che ha’eha peteĩ karai oporojopýva, ha aipe’a reíva che rapicha mba’e, ha amono’õha añotỹ’ỹ haguégui.

23Mba’érehe piko nde neremoĩri che pirapire peteĩ pirapire rógape (Báncope) ha ajúrõ g̃uarã oñemyengoviapa hag̃ua chéve interes reheve.

24Ha upe mburuvicha he’i umi oĩva ijerekuévope, peipe’a umi 3.000.000 guarani ichugui, ha peme’ẽ pe ohupityva’ekuépe 30.000.000 guarani.

25Upérõ he’i hikuái ichupe: Karaiguasu, ohupitýma ningo 30.000.000 guarani.

26Ha pe mburuvicha katu he’i: Oimeraẽva oguerekóvape, oñeme’ẽveva’erã, ha pe oguereko’ỹvagui ojepe’ava’erã gueteri pe oguerekomimíva jepe.

27Ha umi cherehe ija’e’ỹva ha oñemoĩva cherehe ndoipotáigui hikuái che aiko imburuvicha ramo, pegueru ko’ápe ha pejuka ichupekuéra che renondépe.

28Ha Hesu he’ipa rire ko’ã ñe’ẽ oho oguatávo Jerusalen gotýo.

29Ha Hesu oñemoag̃uívo Betfage ha Betánia ypýgui, pe cérro Olivoty oĩháme, Ha’e omondo mokõi hembiguáipe henondépe, ha he’i ichupekuéra:

30Tapeho pe tava’i oĩva ñande rováipe, upépe pejohúta peteĩ búrro ra’yrusu oñeñapytĩvape, avave ojupi’ỹva gueteri hi’ári, pejora ha pegueru chéve ko’ápe.

31Ha oime ramo oporandúva peẽme: Ma’erã piko pejora. Pejéta ichupe: Ñandejára oikotevẽha hese.

32Upérõ oho umi mokõi hemimbo’e ha ojohupa Hesu he’i haguéicha ichupekuéra.

33Ha ojora jave hína, umi tymba jára oporandu: Ma’erã piko pejora ore rymba.

34Ha’ekuéra he’i: Orejára (Hesu) oikotevẽ hese.

35Ha oguerúvo hikuái pe búrro ra’yrusu Hesu rendápe, omoĩ hikuái ijaokuéra pe búrro ra’yrusu apére, ha ombojupi Hesu hi’ári.

36Ha oguata aja ohóvo, oipyso hikuái tapére ijaokuéra Hesu renondépe.

37Ha oguejypapotávo pe cérro Olivoty rehegua, Hesu remimbo’ekuéra atyguasu oñepyrũ, osapukái ha vy’apópe omomba’eguasu Ñanderuetépe, opaite milágro (techapyrã) ohechava’ekue rehe,

38ha he’i hikuái: Toñemomba’eguasu pe ouvahína Ñanderuete rérape, pe mburuvichaguasuetéva, yvágape oĩ py’aguapy ha teko jajaipa, upévare ñamomba’eguasuñaína Ñanderuetépe.

39Umi fariséo oĩva Hesu remimbo’ekuéra apytépe he’i Hesúpe: Eréna ne remimbo’ekuérape, okirirĩ hag̃ua.

40Hesu katu he’i ichupekuéra: Che ningo ha’e peẽme: Ko’ãva okirirĩ ramo umi itakuéra jepe osapukaiva’erã.

41Ha Hesu og̃uahẽmbotávo Jerusalénpe ha ohechávo pe tavaguasu ojahe’o hese,

42ha he’i: Nde Jerusalen, nde reikuaa porã rire umi mba’e ojehúva ko ára kóvape ndepype nde rehupityva’erãmo’ã avei pe py’aguapy añeteguáva. Opáichavo upéva okañyhína nde reságui.

43Nde ári og̃uahẽva’erã umi ára nderehe ija’e’ỹva omongorapáta nde tavaguasu ha ndejopýta oparupiete.

44Nderehe ija’e’ỹva ndereitypáta yvýre ha ne mitãkuérape avei; ha ndohejamo’ãi peteĩ ita jepe ojo’ári, (Salmokuéra 137,7), nderehechakuaái haguére pe hóra porãitéva nde Jára ou neandúvo.

45Ha Hesu oikévo Ñanderuete rogaguasúpe, oñepyrũ omosẽmba umi upépe oñemúva ha ojoguávape.

46Ha he’i ichupekuéra: Ñanderuete kuatiañe’ẽme he’i: Che róga ningo peteĩ óga oñembo’e hag̃ua, peẽ katu pejapo ichugui mondaha kuára.

47Hesu oporombo’e opaite ára Ñanderuete rogaguasúpe. Pa’i ruvichakuéra, kuatia haihára ha umi karai anciáno katu oñeha’ã ojuka hag̃ua ichupe.

48Ndoikuaái katu mba’eichaitépa ojukáta ichupe, opaite hetãyguakuéra ojapysakaséguinte ipy’aite guive hese.

← Chapter 18 Jump to: Chapter 20 →