Luke 8 — Guarani 2015 (Ñanderuete Ñe’ẽ Porã 2015)

1Uperire Hesu oguata 12 hemimbo’e ndive opaite táva ha tava’i rupi omombe’úvo Ñanderuete retãguasu evangélio (marandu porã).

2Ha oĩmimi kuñakaraikuéra ohóva hendive, ichuguikuéra Hesu omosẽva’ekue mba’epochy térã ambuekuérape Ha’e omonguerava’ekue imba’asýgui, ijapytépe oĩ: María, hérava Magdaléna, ichugui Hesu omosẽva’ekue 7 mba’epochy,

3ha Juána, Chuza rembireko, ha’e Heródes rembiguaiguasu, Susána ha heta ambue kuñakarai oipytyvõva Hesúpe imba’eitágui.

4Ha oñembyaty rire Hesu rendápe heta hetãyguakuéra opaichagua távagui, Ha’e ombo’e ichupekuéra ñe’ẽ ñembojoja rupi, he’ívo:

5Peteĩ ñemitỹhára oho ikokuépe oñotỹ hag̃ua. Ha omosarambívo iñemitỹ ra’ỹinguéra oime ho’áva tapére, ha umi upérupi oguatáva opyrũ hesekuéra, ha guyrakuéra ho’upa.

6Ambue ha’ỹinguéra ho’a ita oĩháme, ha heñói porã ramojepe ipiru pya’e ndahapo pypukúigui.

7Ambue ha’ỹinguéra ho’a ñuatĩndýpe, ha heñóivo hendive umi ñuatĩ ombopytupa umi plánta porãvape.

8Ambue ha’ỹinguéra katu ho’a yvy porãháme, ha heñóivo hi’a porã, oñemono’õgui peteĩ ha’ỹinguégui 100 ha’ỹi ipyahúva. Hesu he’i rire ko’ã mba’e ko’ãva hatã he’i ichupekuéra: Upe ijapysáva ohendu hag̃ua, tohendu.

9Uperire hemimbo’ekuéra oporandu ichupe mba’épa he’ise pe ñe’ẽ ñembojoja.

10Ha Hesu ombohovái ichupekuéra: Peẽme ija peikuaa hag̃ua Ñanderuete retã ñemimby, ambuekuérape katu añe’ẽ ñe’ẽ mbojoja rupímante, umi ohecháva ohecha’ỹ hag̃ua, ha umi ohendúva, oentende’ỹ hag̃ua (hesakã’ỹ hag̃ua) ichupe.

11Pe ñe’ẽ ñembojoja ningo he’ise: Pe mba’e ra’ỹi ningo Ñanderuete ñe’ẽ.

12Ha umi mba’e ra’ỹi ho’ava’ekue tapére ningo umi ohendúva, ha voiete ou Satana (aña) oipe’a hag̃ua pe ñe’ẽ oñeñotỹmava ipy’apýpe, ani hag̃ua ojerovia ni ojesalva hikuái.

13Umi ita ári guare katu ningo umi ohendúva pe ñe’ẽ ha vy’apópe oñongatu ipy’apýpe. Ko’ãva katu ndahapói ojerovia porã hag̃ua, ha og̃uahẽ ramo pe jepy’ara’ã peteĩha opoi jevy ijerovia pyahúgui.

14Umi ho’áva ñuatĩndýpe katu ningo umi ohendúva, ha oho rire, ojepy’apy pláta ha ko yvyarigua rekove vy’a rehe ha upévare ndaikatúi hi’a.

15Umi mba’e ra’ỹi ho’ava’ekue yvy porãme ningo umi ipy’a porãva ha hekopeteguáva, oñongatu porãmba ipy’apýpe ohenduva’ekue guive ha hi’a porã paciéncia reheve.

16Avave nomyendýi tataindy omokañy hag̃ua mba’yrúpe térã tupa guýpe. Yvate tataindyenda ári uvei omoĩva’erã, ohesape hag̃ua upe oikétava pe kotypýpe.

17Ndaipóri voi ningo mba’eve oñemíva ojehechauka porã’ỹva’erãva, térã peteĩ ñemimby ojekuaa porã’ỹ hag̃ua.

18Pema’ẽ porãke, mba’éichapa pehendu. Oimeraẽva oguerekóvape oñeme’ẽveva’erã, ha upe oguerekóva michĩmi ha’e oimo’ãva oguerekoha ojepe’ava’erã avei.

19Hesu ryvykuéra ha isy ou hendápe ha ndaikatúi oñemboja heta tetãyguakuéra oñembyatýgui Hesu jerekuévo.

20Oñemombe’u katu Hesúpe: Nde sy ha nde ryvykuéra oĩ okápe, ha oñe’ẽse nendive.

21Hesu katu he’i ichupekuéra: Che sy ha che ryvykuéra ningo umi ohendúva ha ojapóva guive Ñanderuete rembipota.

22Umiha árape Hesu oike peteĩ canóape hemimbo’ekuéra ndive, ha he’i ichupekuéra: Jahasa yguasu mboypýri, ha oho hikuái.

23Ha ohasa aja hikuái Hesu oke, ha ou sapy’a peteĩ yvytu vai oipeju hatãva pe yguasu ári, heta y oñepyrũ oike canoapýpe ha oñemondyipa hikuái ohóvo.

24Ha oñemboja hendápe ha omombáy Hesúpe he’ívo: Mbo’ehára, mbo’ehára, ñañehundítama ningo. Ha Hesu opáyvo okorõi pe yvytúre ha pe y pochýpe, ha okirirĩ ha opiete.

25Upérõ Hesu he’i ichupekuéra: Moõ piko oime pende jerovia. Ha’ekuéra ohecharamoitévo, he’i ojupe: Máva piko Ha’e, pe yvytu ha y pochy jepe iñe’ẽrendu ha ojapóva iñe’ẽ (hembipota).

26Ha oho hikuái y rupi Gadára yvýpe, opytáva Galiléa rovái, yguasu mboypýri.

27Ha oguejývo pe canóagui oñemboja hendápe peteĩ Gadaraygua ipype oĩva mba’epochykuéra; ha’e aréma oiko ao’ỹre, ndoikovéi peteĩ ógape, oiko uvei umi itakuaguasúpe omanomava’ekue oñeñotỹ haguépe.

28Ha’e ohechávo Hesúpe ojeity henondépe ha osapukái he’ívo: Mba’e piko areko che nendive, nde Hesu, pe Yvatevéva Jára Ra’y, che ajerure ndéve ani chemyangekõinte jepe.

29Hesu he’ígui pe mba’epochýpe osẽ hag̃ua. Umi mba’epochy oñemomba’emava’ekue hese, ha ojepokua ha ojepykuapa ramojepe ichupe cadénape ha ijerekuévo oĩ ramo umi oñangarekóva hese, upeichavéramo jepe omondohopa ha umi mba’epochy ogueraha ichupe idesiertovehápe.

30Ha Hesu oporandu ichupe: Mba’éichapa nde réra, ha ha’e ombohovái he’ívo: Legion, he’iséva, hetaiterei aña oĩ ipype.

31Ha ha’ekuéra ojerure asy Hesúpe ani hag̃ua omondo ichupekuéra añaretã ruguápe.

32Ha upérupi oiko peteĩ kure aty ndetuichaitéva okaruvahína upe cérro rehe, ha ojerure asy hikuái Hesúpe, Ha’e oheja hag̃ua oike hikuái ipypekuéra, ha Hesu oheja.

33Ha umi pytu vai osẽvo pe kuimba’égui, oikepa umi kurepýpe, upémaramo umi kure odispara ha ojeitypa pe cérrogui yguasúpe ha ojahogapa hikuái.

34Umi kure rerekua ohechávo umi mba’e oikova’ekue okañymba hikuái táva ha tava’ikuérape omombe’u joa hag̃ua umi mba’e ojehuva’ekue.

35Ha umi Gadaraygua osẽmba hekohágui ohecha hag̃ua umi mba’e ojehuva’ekue, ha og̃uahẽvo Hesu rendápe, ojohu pe kuimba’épe osẽ haguégui umi mba’epochy, hesãi ha oñemonde potĩ asy, oguapyvahína Hesu renondépe, ha oñemondyipa hikuái.

36Ha umi techahare omombe’u ichupekuéra opaite mba’e ohechava’ekue guive ha mba’éichapa pe imba’epochyva’ekue oñemonguerákuri.

37Ha opaite umi Gadára retãygua ojerure asy Hesúpe osẽ hag̃ua hetãgui, okyhyjepágui hikuái. Upéramo Hesu oike pe canóape oho hag̃ua.

38Upérõ upe kuimba’e osẽva’ekue ichugui umi mba’epochy ojerure asy Hesúpe omoirũ hag̃ua ichupe, Hesu katu he’i ichupe:

39Ejevy nde rógape ha emombe’u opaite mba’e Ñanderuete ojapova’ekue nderehe. Ha pe kuimba’e péva ojevývo omombe’u opárupi umi mba’e tuicháva Hesu ojapova’ekue hekovépe.

40Hesu ojevývo oguerohory joa hikuái ichupe, opavave oha’ãrõmagui voi hína.

41Ha peteĩ kuimba’e hérava Jáiro, ha’e ningo peteĩ Ñanderuete róga rerekua, ojeity Hesu renondépe ha ojerure asy ichupe oike hag̃ua hógape.

42Itajýra peteĩmi, 12 áño rupi oguerekóva, hasyete omano hag̃uáicha. Ha Hesu ohóvo Jáiro róga gotýo hetãyguakuéra ojopypa ichupe.

43Ha peteĩ kuñakarai 12 áñoma hasy hague tuguy syrýgui, ome’ẽmbámava oguerekova’ekue guive pohãnohárape, opáichavo avave ndaikatui omonguera ichupe.

44Ha’e oñemboja Hesu rendápe hapykuéguio, ha opoko ijao rembe’ýre ha upevovete oñandu huguy opytamaha.

45Upérõ Hesu oporandu: Mávapa opoko cherehe. Avave, he’i joa. Ha Pédro ha hendive oĩva he’i: Mbo’ehára, tetãyguakuéra ndejopypa ha nemyaña ápe ha péguio, ha Nde reporandu gueteri: Mávapa opoko cherehe.

46Hesu katu he’i: Oĩ ningo peteĩ opokóva cherehe, añandúgui osẽ hague chehegui pu’aka.

47Ha upe kuñakarai ohechávo ndaikatuveimaha oñemi, ryryipópe ojeity henondépe ha omombe’upa Hesúpe hetãyguakuéra renondépe mba’éichapa ha’e okuera opoko rire Hesu ao rembe’ýre.

48Ha Hesu he’i ichupe: Nde jerovia ningo ndesalva, tereho py’aguapýpe.

49Hesu oñe’ẽ ramo gueteri hína og̃uahẽ peteĩ Jáiro rogaygua ha he’i ichupe: Omanóma nde rajy, ani remyangekõive mbo’ehárape.

50Hesu ohendúvo péva, he’i Jáirope: Ani rekyhyje, ejeroviánte ha ojesalváta ha’e.

51Ha Hesu og̃uahẽvo Jáiro rógape, ohejánte Pédro, Juan, Jacóbo, pe mitã ru ha isy oike hag̃ua hendive pe mitãkuña kotýpe.

52Hasẽmba ha oñembyasy hikuái pe mitãkuña omano haguére. Hesu katu he’i ichupekuéra: Ani penerasẽ, ha’e ningo nomanói, okentehína.

53Ha oñembohory hese, oikuaágui omanóma hague pe mitã.

54Hesu katu omopu’ã pe mitãkuña ipógui, ha he’i: Nde mitãkuña, epu’ã.

55Ha pe mitãkuña pytu porã ojevy, ha upevovete pe mitãkuña opu’ã, ha Hesu omongaruka ichupe.

56Ha itúva ha isy ipy’andýi opytávo. Hesu katu he’i ichupekuéra ani hag̃ua omombe’u avavépe umi mba’e oikova’ekue.