Luke 6 — Guarani 2015 (Ñanderuete Ñe’ẽ Porã 2015)

1Peteĩ sábado árape Hesu ohasa hemimbo’ekuéra ndive peteĩ kokue rupi, ha hemimbo’ekuéra oipo’omi trigoky, ojykýi ha ho’u.

2Ha umi fariséo ohechávo péva he’i: Mba’érehe piko pejapo sábado árape umi mba’e ndaijáiva ojejapo.

3Hesu katu ombohovái ichupekuéra: Napemoñe’ẽi piko gueteri Ñanderuete kuatiañe’ẽme mba’épa David ha iñirũnguéra iñembyahýi ramoguare ojapova’ekue, (1 Samuel 21,1-7).

4Oike voi Ñanderuete rógape ha ojapyhy pe pan oñemoĩmava’ekue upépe peteĩ mesa ári techaukaha ramo ha oñemboykéva Ñanderuetépe g̃uarã, ha’e voi ho’u ha ome’ẽ avei iñirũnguérape. Pa’ikuéra añónte jepe ija ho’u hag̃ua umi pan.

5Ha he’i ichupekuéra: Pe yvyarigua Ra’y ningo sábado Jarateéva voi avei.

6Ambue sábado árape Hesu oike avei peteĩ Ñanderuete rógape oporombo’e hag̃ua, ha umi oñembyatýva apytépe oĩ peteĩ kuimba’e ipo akatúa ypíva.

7Ha umi kuatia haihára ha fariseokuéra omaña porã hese oikuaaségui omongueránepa sábado árape, ojohu hag̃ua hikuái peteĩ mba’e omoĩ vai hag̃ua ichupe.

8Hesu oikuaa porã katu umi mba’e ha’ekuéra ojepy’amongetavahína, upévare he’i pe kuimba’e ipo ypívape: Epu’ã ha eñembo’y ore mbytépe. Ha ha’e opu’ã ha oñembo’y imbytepekuéra.

9Ha Hesu he’i ichupekuéra: Aporandúta peẽme peteĩ mba’e: Ikatúpa ojejapo sábado árape mba’eporã térã mba’evai. Jasalva ñande rapicha rekove térãpa ñahundi ñande rapicha rekove.

10Hesu oma’ẽ porã opavave ijerekuévo oĩva rehe ha he’i pe kuimba’e pévape: Eipyso nde po. Ha’e oipyso rire ipo okuera.

11Ha’ekuéra katu okapu pochýgui, ha oñe’ẽ oñondive mba’épa ikatu ojejapo Hesu rehe.

12Ha ojehu ningo umi árape Hesu oho cérrope oñembo’e hag̃ua, ha ohasa pe pyhare pukukue oñembo’évo Ñanderuetépe.

13Ko’ẽmba rire Hesu ohenói hemimbo’ekuérape, ha ijapytégui oiporavo 12, ha oñembohéra ichupekuéra apostolkuéra (temimondo).

14Umíva ningo: Simon, hérava avei Pédro, ityvýra Andres, upéi Jacóbo ha Juan, Felípe ha Bartolome,

15Matéo ha Tomas, Jacóbo, Alféo ra’y, ha Simon hérava avei Zelóte,

16Júdas, Jacóbo ra’y, ha Júdas Iscarióte, pe otraicionátava Hesúpe.

17Ha Hesu oguejy hendivekuéra pe cérrogui, ha opyta peteĩ ñu potĩme, ha upépe oñembyaty heta Israelgua, Jerusalengua, Tíro ha Sidon yguasu rembe’y peguáva,

18ohendu ha oñemonguerauka hag̃ua imba’asykuéragui ha omosẽ hag̃ua avei mba’epochykuérape; ha Hesu omonguerapa ichupekuéra.

19Opavave oñeha’ãmba joa opoko hag̃ua hese, Hesúgui osẽ pu’aka oporomonguerapáva.

20Ha Hesu ojesaupívo hemimbo’ekuéra rehe he’i: Pevy’aite peẽ mboriahukuéra, Ñanderuete retãguasu ningo pene mba’e.

21Pevy’aite peẽ ko’ág̃a peneñembyahýiva, peneryg̃uatãmbava’erãgui. Pevy’aite peẽ ko’ág̃a penerasẽva, peẽ pepukava’erãgui.

22Pevy’aite peẽ, umi kuimba’e ha kuñakuéra ndaija’éi ramo penderehe ha oñemomombyry ramo pendehegui, ha pendeja’órõ ha omboykérõ pende réra iñañáva ramo yvy arigua Ra’y (Hesu Crísto) rehehápe.

23Pevy’a ha pendepy’arory upeha árape, ha peikuaa porãke tuicha oñemyengoviava’erãha peẽme yvágape; upéicha ningo ituvakuéra ojapómi avei profetakuéra rehe.

24Angái, peẽ penemba’eitáva, peẽ pehupitýma pene angapyhy.

25Angái, peẽ peneryg̃uatãmbáva, og̃uahẽva’erã pe ára peẽ peneñembyahýita. Angái, peẽ ko’ág̃a pepukáva, og̃uahẽva’erã pe ára peẽ penerasẽva’erãha.

26Angái peẽ, opavave oñe’ẽ porã ramo penderehe, ituvakuéra upeichaite ojapova’ekue avei umi proféta gua’u rehe.

27Che katu ha’e peẽ cherendúvape: Pehayhu penderehe ija’e’ỹvape, pejapo mba’eporã umi oñemoĩvape penderehe.

28Peñe’ẽ porã ha pehovasa umi penemaldecívape, ha peñembo’e pendeja’óva rehe.

29Ha oime ramo nenupãva nde rova yképe, eme’ẽ ichupe ambue nde rova yke. Ha oime ramo oipe’áva ndehegui ne póncho, eme’ẽ avei ichupe ne camisa.

30Ha oime ramo peteĩ mba’ejerure ndéve, ani rembotove (renegátei), eme’ẽ katu; ha upe ogueraháva ne mba’éva ani rejerure jevy.

31Ha peẽ peipota háicha umi kuimba’e ha kuñakuéra ojapo penderehe, upeichaite pejapo avei peẽ hesekuéra.

32Peẽ pehayhúnte ramo umi penderayhúvape, mba’eichagua agradecimiéntopa peha’ãrõ. Umi jukahára jepe ohayhu iñirũnguérape.

33Ha peẽ pejapónte ramo mba’eporã umi ojapóva mba’eporã peẽme, mba’eichagua agradecimiéntopa peha’ãrõ mba’evai apohára ningo peichaite avei ojapo.

34Ha peẽ peiporukánte ramo umi ikatúvape oiporuka avei imba’éva peẽme, mba’eichagua agradecimiéntopa peha’ãrõ mba’evai apohára ningo oiporuka avei iñirũnguérape ha oha’ãrõ avei ha’ekuéra oiporuka avei imba’ekuéra.

35Pehayhu katu penderehe ija’e’ỹvape, ha pejapo mba’eporã ichupekuéra g̃uarã, ha peiporuka ichupekuéra peha’ãrõ jevy’ỹre mba’eve, ha pehupityva’erã mba’e tuicháva ha oikóta pendehegui Yvatevéva ra’ykuéra, Ha’e voi ipy’a porã avei umi oagradece’ỹva ha umi iñañáva ndive.

36Peiporiahuverekókena, pende Ruete oporoporiahuvereko háicha.

37Ani pembojovake pende rapichápe, ani hag̃ua peẽ peñembojovake avei, ha ani pecondena pende rapichápe, ani hag̃ua ha’ekuéra penecondena avei. Peperdona uvei pende rapichápe, ha peñeperdonáta avei peẽ.

38Peme’ẽ ha oñeme’ẽva’erã avei peẽme, upéichamante oñemyengovia peẽme medída porã henyhẽ porãva, oñembokacha porãva ha oñemyenyhẽ porãva’erãva avei pende vosa. Pe medída peiporúva pende rapicha rehe ojeporu jevyva’erã penderehe.

39Ha Hesu omombe’u ichupekuéra peteĩ ñe’ẽ mbojoja: Ikatu piko peteĩ hesatũva oisãmbyhy porã ambue hesatũvape, ndo’aichénepa mokõivéva yvykuápe.

40Pe temimbo’e ningo ndaituichavéi imbo’eháragui, oñembo’e porã rire ichupe ha’e oikóta imbo’eharakuéicha.

41Ma’erãpa rema’ẽ pe yvyra ku’imi rehe oĩva nde rapicha resápe ha nde nderehechaséi pe yvyra oĩva nde resateépe.

42Mba’éicha piko eréta nde ryvýpe: Che ryvy, eheja tanohẽ pe yvyra ku’imi nde resápe oĩva, ha nde nerema’ẽi pe yvyra nde resateépe oĩvare. Nde, tovamokõi, eipe’a raẽ pe yvyra nde resápe oĩva, ha upéi rehecha porãve rire ae enohẽ pe yvyra ku’imi oĩva nde ryvy resápe.

43Peteĩ yvyra porã ha hesãiva hi’a porãva’erã, ha peteĩ yvyra hasýva hi’a vaiva’erã (hasypágui).

44Opaichagua yvyra ojekuaa hi’a rupi, ndojepo’ói ningo arasa ñuatĩgui, ni guavira ñana reígui.

45Pe tekove ipy’a porãva ningo oguenohẽ mba’eporã ipy’apy porãgui, ha pe tekove vai oguenohẽ mba’evai ipy’apy vaígui, ha umi mba’e omyenyhẽva ñande py’apy, umía katuete osẽ jevyva’erã ñande juru rupi, taha’e ñe’ẽ iporãva, taha’e ñe’ẽ ivaíva.

46Mba’érehe piko peẽ chembohéra che Jára, che Jára, ha ndapejapói umi mba’e Che ha’éva guive.

47Opaite oúva che rendápe, ohendúvo che ñe’ẽ, ha ojapo avei Che ha’éva,

48ojogua peteĩ kuimba’e ojogapo porãvape, ha’e ojo’o pypuku ohupity peve itaguasu ha hi’ári omopu’ã iladrillokuéra, mása porã reheve. Ha oky tuichaite ramo jepe, ha pe y osyry mbarete ha omyaña hatã ramo jepe pe óga tápia, ndaikatúi omomýi, pe óga oñemopu’ã porãgui itaguasu ári.

49Upe ohendúva che ñe’ẽ ha ndojapóiva katu ojogua peteĩ kuimba’e omopu’ãva hóga rapo yvyku’i rei ári ojo’o’ỹre, ha pe y osyry mbarete ramo ha omyaña hatã ramo pe óga tápia ho’ava’erã, noñemopu’ãigui ita guasu ári, yvy ku’i árinte uvei.